Дачку лыжніка Сяргея Далідовіча адхілілі ад спаборніцтваў на год

Фармальнай падставай, як паведаміў яе бацька ў Фэйсбуку, стала тое, што Дар'я Далідовіч «шпурляла прызы на спаборніцтвах», паводзіла сябе неадпаведным чынам для спартсмена». Але сам не сумняецца, што «дзеці за бацькоў атрымліваюць».

Дар'я Далідовіч. Фота з Фэйсбука Сяргея Далідовіча

Далідовіч напісаў:

«Федэрацыя зрабіла падарунак на Новы год: дэактывавала фіскод дачцы Дар'і і адхіліла на год ад спаборніцтваў. Падставы? Кажуць, шпурляла прызы на спаборніцтвах, паводзіла сябе неадпаведным спосабам для спартсмена. Рашэннем трэнерскай рады, кажуць, аднагалосна прынята рашэнне. Нашай трэнерскай тусоўцы — прывітанне! Праз 2,5 месяцы пасля ўзнагароджання. Без тлумачэнняў ад спартсменкі. Усё геніяльнае проста! Міма юніёрскага ЧС і Еўрапейскага фестываля моладзі. Дзіця ў слязах. Краіна для жыцця».

Раней Далідовіч расказваў, што Дар'і, таксама, як і ён сам, лыжніцы, на Мінскім Кубку па лыжаролерах у кастрычніку замест прыза за першае месца, якое яна рэальна заняла, аддалі толькі за трэцяе. Тады яна ад гэтага прыза адмовілася.

Сам Сяргей Далідовіч вядомы прынцыповай грамадскай пазіцыяй. Ён неаднаразова выказваўся супраць гвалту, падпісаў ліст за сумленныя выбары, абараняў нацыянальную сімволіку.