Стала вядома пра яшчэ адну галадоўку на Акрэсціна
Былы арыштант, які вызваліўся днямі, распавёў пра жудасныя ўмовы ўтрымання ў ЦІП на Акрэсціна. Ён паведаміў, што ў канцы кастрычніка мужчынская «палітычная» камера №13 абвяшчала галадоўку, каб адстаяць нармальныя ўмовы ўтрымання.
І яны дамагліся гэтага, піша «Вясна назірае».
У чатырохмясцовых камерах утрымліваюцца прыблізна па 16 чалавек. Часам у камеру да «палітычных» закідваюць бяздомных людзей, на падлогу выліваюць хлорку. Па словах мужчыны, перадачы не даходзілі, а лекі сталі браць не ўсе. У апошні час перасталі даходзіць аскарбінкі і гематаген, а таксама дзягцярнае мыла.
Арыштант распавёў, што калі ў камеру №13 закінулі бяздомнага чалавека, то яны ўсёй камерай з 20 кастрычніка абвясцілі галадоўку і праз двое сутак адміністрацыя здалася і забрала бяздомнага. Па словах мужчыны, у сённяшніх умовах галадоўка ў беларускіх ізалятарах — адзіны спосаб абароны сваіх правоў.
Раней паведамлялася пра галадоўку ў жаночай камеры на Акрэсціна.
