У МУС разглядаюць ідэю пазбаўляць грамадзянства беларусаў, якія з'ехалі за мяжу
Вячаслаў Арлоўскі, начальнік аддзела Галоўнага ўпраўлення па барацьбе з арганізаванай злачыннасцю і карупцыяй МУС, выказаў «СБ. Беларусь сегодня» ідэю аб тым, каб пазбаўляць грамадзянства беларусаў, якія з'ехалі за мяжу і «адтуль робяць усё магчымае, каб нашкодзіць дзяржаве».
Ён нагадаў, што ў чэрвені ўступілі ў сілу ініцыяваныя МУС змены ў закон аб грамадзянстве:
— З гэтага моманту асобы, якія набылі беларускае грамадзянства, могуць яго страціць, калі па прысудзе яны будуць прызнаныя вінаватымі ў здзяйсненні шэрагу злачынстваў — экстрэмісцкіх, тэрарыстычных альбо тых, якія наносяць цяжкую шкоду інтарэсам Беларусі. Ёсць у гэтым спісе і артыкул 361 КК, пра які цяпер гаворым. Варта адзначыць, што гэтыя змены мы распрацоўвалі два гады. І тады гаворка ішла толькі аб страце грамадзянства асобамі, якія набылі грамадзянства, а не сталі беларусамі па праве нараджэння.
Але я лічу, што трэба паглядзець далей. Людзі, якія збеглі з нашай краіны, ненавідзяць яе і сёння працуюць у інтарэсах заходніх краін, не павінны мець права называцца беларусамі.
На думку Вячаслава Арлоўскага, ёсць неабходнасць разгледзець пытанне аб пазбаўленні іх грамадзянства.
— Калі яны адвярнуліся ад краіны, чаму краіна не можа адвярнуцца ад іх? У выніку яны не змогуць прыехаць у Беларусь у вольным парадку, не змогуць удзельнічаць у электаральных працэсах, грамадска-палітычным жыцці дзяржавы, — заявіў прадстаўнік ГУБАЗіК.
