За сарваны дзяржаўны сцяг 19-гадовага мінчука пакаралі вялізным штрафам: 4350 рублёў
Мінскі раённы суд 14 верасня разгледзеў крымінальную справу 19-гадовага Антона Мінкевіча, абвінавачанага ў хуліганстве па арт. 339 Крымінальнага кодэкса, паведамляюць праваабаронцы.
Антон вучыўся на другім курсе ў БНТУ, але быў адлічаны за свой учынак. Працаваў ў «Макдональдсе».
Тое здарэнне адбылося вечарам 18 чэрвеня. Паводле следства, хлопец у стане алкагольнага ап’янення сарваў дзяржаўны сцяг, які вісеў над пад'ездам у інтэрнаце, дзе ён жыве.
Мінкевіча затрымалі ў той жа дзень на 72 гадзіны. 20 ліпеня затрымалі яшчэ раз і выставілі абвінавачванне.
Суд ішоў два дні. Антон прызнаў віну. Пракурор запрасіў для Мінкевіча пакаранне ў выглядзе штрафу ў 150 базавых велічынь (4350 рублёў).
Менавіта такі прысуд і вынесла 14 верасня суддзя Казлова.
Звычайна падобныя ўчынкі падпадаюць пад дзеянне артыкула 370 Крымінальнага кодэкса (знявага дзяржаўных сімвалаў). Аднак праваабаронцы фіксуюць таксама і справы, у якіх следства класіфікуе апаганьванне дзяржаўных сімвалаў як звычайнае хуліганства.
