Bai miascovaha značeńnia

U niadzielu ŭ Biełarusi adbuducca miascovyja vybary. Łukašenkaŭcy vypraboŭvajuć na ich novuju technałohiju psieŭdaalternatyŭnaści. Kandydaty-načalniki majuć sparynh-partniorak miedsiaścior i pradaŭščyc.

Hetyja vybary stanuć pieršymi, što projduć pa ŭdakładnienym zakanadaŭstvie. Na miascovych vybarach admienienaja abaviazkovaja płanka ŭ 50% tych, chto pryjdzie na hałasavańnie. H.zn. bajkot maje tolki palityčny, a nie jurydyčny sens. Deputaty ŭsio adno buduć abranyja. Druhoha tura taksama nie budzie: usie narodnyja abrańniki stanuć viadomyja ŭžo ŭ hetuju niadzielu.

U paraŭnańni z vybarami trochhadovaj daŭniny niaznačna ŭzros konkurs na adno miesca. Na 21 301 deputacki mandat pretendujuć 25 033 kandydaty. To bok siaredni konkurs pa krainie składzie 1,17 čałavieka na miesca, a ŭ 2007 hodzie jon składaŭ usiaho 1,05.

Na minułych vybarach biezalternatyŭnymi byli 95% akruhaŭ, ciapier usiaho tolki 85%.

Asablivy ž razhuł demakratyi nazirajecca ŭ Minsku — 3,9 čałavieka na miesca.

Absalutna savieckaja biezalternatyŭnaść nazirajecca na bolšaści ŭčastkaŭ, dzie vybirajucca deputaty ŭ sielsaviety.

Niahledziačy na skiepsis adnosna vybaraŭ — hałasuj ni hałasuj… — a

pazicyja vyłučyła bolš za 400 svaich kandydataŭ.

Biełaruskaja partyja levych «Spraviadlivy śviet» — 99, Biełaruskaja chryścijanskaja demakratyja — 82, Abjadnanaja hramadzianskaja partyja — 77, Ruch «Za Svabodu» — 65, Partyja BNF — 33, Biełaruskaja sacyjał‑demakratyčnaja partyja — 29, «Pravy aljans» — 5, Biełaruskaja sacyjał‑demakratyčnaja hramada — 2. Ale vyłučency ad apazicyi składajuć usiaho tolki 1,5% ad ahulnaj kolkaści zarehistravanych.

Try hady tamu ad apazicyi vyłučałasia 230 čałaviek, i ŭ miascovyja saviety jany zmahli pravieści nie bolš za dziasiatak čałaviek. Pieramahli Alaksandr Ahiejeŭ u Mahilovie, Źmicier Kuchlej — u Mastach.

U 2003, kali ad apazicyi išło blizu tysiačy čałaviek, i vynik byŭ zusim inšy. Deputatami stali bolš za sotniu čałaviek. Z toj kampanii ŭ palityku startavali Aleś Michalevič, Juraś Hubarevič, Aleś Zarembiuk, Siarhiej Sałaš, jakija zmahli vyraści ŭ mocnych nacyjanalnych i rehijanalnych lideraŭ.

U boj iduć adny miedsiostry

Cikavuju taktyku prymianili aršanskija haradskija ŭłady. Miascovaja kaalicyja ADS zaklikała svaich kandydataŭ nie vyłučacca ŭ deputaty. Čakałasia, što vybary mohuć być całkam biezalternatyŭnymi. Nie ŭdałosia. U supierniki asnoŭnym praŭładnym kandydatam byli vyłučanyja… miedsiostry.

Tak, u Instrumientalnaj akruzie № 21 bałatujecca dyrektar zavoda «Čyrvony baraćbit» Alaksandr Šulhin i miedsiastra UAZ «Aršanskaja centralnaja paliklinika» Valancina Salanikava.

U Partyzanskaj akruzie № 22 z namieśnikam dyrektara miechanika‑ekanamičnaha kaledža Taćcianaj Zacharavaj za mandat budzie zmahacca miedsiastra Śviatłana Fiadorčanka.

U Zasłonaŭskaj akruzie №24 «spaborničajuć» dyrektarka čyhunačnaha technikuma Alena Kazłova i znoŭ miedsiastra Ina Kasuchina.

Takim čynam, pratestna nastrojenyja vybarcy atrymlivajuć psieŭdaalternatyvu kandydatam ad uładaŭ.

Psieŭdaalternatyŭnaść u Horkach i Žodzinie

Aktyvist z Horak Illa Zaranok kaža, što niešta padobnaje nazirajecca ŭ Drybinskim i Mścisłaŭskim rajonach, dzie vyłučencaŭ ad apazicyi niama zusim. «Pa akruzie vyłučajucca, skažam, dva piensijaniery, dva dyrektary, dva beeresemaŭcy», — kaža I.Zaranok.

U samich Horkach bałatujucca try aktyvisty: Halina Budnaja (BNF), Eduard Brokaraŭ (BNF), Žanna Ščarbinina (BCHD).

Absalutna va ŭsich 34‑ch akruhach budzie kankurencyja ŭ Žodzinie. Ale tam tak lohka i nie vyznačyš, chto ž źjaŭlajecca kandydatam ad ułady. Spaborničać buduć namieśnik dyrektara Žodzinskaj CEC i načalnik słužby ekspłuatacyi rajonnaha ŭpraŭleńnia «Smalavičyrajhaz», dyrektar sacyjalna‑piedahahičnaha centra i dyrektar zavoda, načalnik adździeła daznańnia haradskoj milicyi i dyrektar pradpryjemstva ŽKH.

Niešmatlikim apazicyjanieram taksama pastavili pa dva supierniki — siabra AHP Alaksandr Vałčanin bałatujecca ŭ adnoj akruzie z dyrektaram pradpryjemstva i načalnikam cecha, a lider ruchu vieteranaŭ Afhanistana Alaksandr Kamaroŭski — z načalnikam techbiuro BiełAZa i dyrektaram himnazii.

U susiednim Barysavie z 34 akruh tolki ŭ troch budzie alternatyva.

Amatara Stalina nie zarehistravali

U Mazyry byŭ zarehistravany palitrekrut Franak Viačorka. Svaju kampaniju chłopiec pačynaŭ jašče, kali byŭ zvyčajnym radavym. U nastupny dzień paśla kamisavańnia Franak znoŭ nakiravaŭsia ŭ Mazyr, kab vieści ahitacyju. Supiernikam Viačorki pa akruzie budzie dyrektar spartyŭna‑harnałyžnaha kompleksu Karobkin.

U Mazyry taksama jašče zarehistravany Siarhiej Łapusta z AHP, jaki budzie zmahacca ź biźniesmienam Čabanianam (jamu naležyć sietka aptek).

Cikavy vypadak adbyŭsia ŭ Śvisłačy (Hrodzienskaja vobłaść), dzie nie zarehistravali byłoha staršyniu rajvykankama Anatola Kuźmu. Hety čałaviek byŭ viadomy tym, što inicyjavaŭ ustalavańnie ŭ miastečku adzinaha ŭ krainie pomnika Iosifu Stalinu.

Fienomien Vałabujeva

U Salihorsku aktyŭna prachodzić vybarčaja kampanija Alaksieja Vałabujeva. «Małada¬frontaviec» uziaŭ i vyklikaŭ na debaty svajho supiernika — vajskovaha kamisara Valera Zainčkoŭskaha. A jon vaźmi dy pahadzisia. Debaty prajšli 20 krasavika ŭ Domie budaŭnikoŭ.

I adna Karač

U Viciebsku va ŭsich 40 akruhach jość vyłučency ad ułady. Pałova ź ich — heta dyrektary pradpryjemstvaŭ i ich namieśniki, a taksama piać hałoŭnych daktaroŭ miascovych balnic i paliklinik. Akramia taho, u kandydatach u deputaty jość prarektar VNU, kamandzir vajskovaj čaści i vajskovy kamisar, načalnik pažarnaha avaryjna‑vyratavalnaha atrada «Viciaź». Ad apazicyi ŭ Viciebsku idzie Volha Karač z AHP.

U Navapołacku ŭsie 65 kandydataŭ (na 34 miescy) biespartyjnyja. Tut kandydatam‑načalnikam taksama pastavili ŭ supierniki nastaŭnikaŭ, vychavacielek dziciačych sadkoŭ i pradaŭščyc.

Absalutna biezalternatyŭnyja rajony jość jak u tradycyjna nacyjanalistyčnych rehijonach na Zachadzie krainy (Astraviec, Stolin), tak i ŭ homielskim apiryščy łukašenkaŭcaŭ (Akciabrski, Čačersk).

U Baranavičach ź dziesiaci apazicyjanieraŭ zarehistravany tolki adzin.

Na minułych miascovych vybarach jaŭka hramadzian skłała krychu bolš za 70%. Ciažka pavieryć, što sioleta, biez pryciahnieńnia administratyŭnaha resursu, jana moža być bolšaj.

Źmicier Pankaviec

* * *

Vostraŭ imitacyjnaj demakratyi

Z 57 minskich vybarčych akruhaŭ niama nivodnaj biezalternatyŭnaj. U stalicy stvoranaja bačnaść baraćby. Apazicyja ŭ Minsku vystaviła, u asnoŭnym, moładź.

Adna z najbolš cikavych akruh u Minsku — Mašeraŭskaja №47. Napeŭna, takoha ŭ nas jašče nie było, kab u adnym vybarčym biuleteni byli adnačasova proźviščy muža i žonki. A voś u hetaj akruzie mienavita tak. U harsaviet bałatujucca Alaksandr i Taćciana Kuŭšynava.

Kampanija ŭ apošniaj była dosyć aktyŭnaja. Centr Minska byŭ zaviešany płakacikami «Naša Tania :)». Kuŭšynava idzie na vybary z łozunham «Charastvo vyratuje Minsk». Dziaŭčyna dosyć aktyŭnaja ŭ sacyjalnych sietkach, maje ŭłasny sajt. Kampanija prachodzić całkam na rasijskaj movie. Napeŭna, mienavita Kuŭšynava i jość adnoj z najbolš jarkich kandydatak na hetych vybarach.

Taksama ŭ Mašeraŭskaj akruzie idzie siabar łukašenkaŭskaj Kampartyi Jury Vaskrasienski. U svoj čas jon vyłučaŭsia na parłamienckich vybarach pa adnoj akruzie ź lideram byłoha PKB Siarhiejem Kalakinym. Pieramahčy abodva kandydaty nie zmahli, ale voś hałasoŭ Vaskrasienski ŭ sustaršyni ADS adciahnuŭ.

Kiryła Baravik pradstaŭlaje libieralna‑demakratyčnuju partyju. Na ŭlotkach kožnaha libierał‑demakrata źvierchu źmieščany partret ichniaha pravadyra Siarhieja Hajdukieviča z podpisam, što heta budučy kandydat u prezidenty. Darečy, bolšaść kandydataŭ ad ŁDPB majuć stałuju pracu — stalar, kantralor zavoda, indyvidualny pradprymalnik i navat strałok achovy Biełaruskaj čyhunki. A voś apazicyjaniery časta iduć na vybary jak vymušana biespracoŭnyja.

Lideru Partyi BNF Alaksieju Janukieviču ŭ Haładziedaŭskaj akruzie procistaić načalnik aŭtaparka №6 Alaksandr Ciškievič. Treciaj budzie 19‑hadovaja Volha Biahun z ŁDPB.

U byłoha palitviaźnia Artura Fińkieviča taksama dva supierniki — dyrektar handlovaha kamunalnaha ŭnitarnaha pradpryjemstva «Univiermah «Biełaruś» Mikałaj Miatlicki i vadziciel Dźmitry Malčeŭski (znoŭ ŁDPB).

A voś u staršyni niezarehistravanaj Partyi svabody i prahresu Uładzimira Navasiada supiernikaŭ u Plachanaŭskaj akruzie bolš. Tut i 19‑hadovy student Maskoŭskaha ŭniviersiteta ekanomiki Alaksiej Rašetnik, hałoŭny doktar centra hihijeny i epidemijałohii Leninskaha rajona Viktar Žukoŭski, inžynier‑elektronik politechničnaj himnazii №6 Mikałaj Dylko, pradaviec pradpryjemstva «Pradukty i napoi» Vieranika Ramančyk.

Viadomy zmahar z pjanstvam, baćka piaci dziaciej, siabar Chryścijanskaj demakratyi Leanid Skarabahaty bałatujecca ŭ Kastryčnickaj akruzie №17. Razam ź im u biuleteniach značacca člen BRSM Uładzimir Ciuchaj (pra jaho my pisali ŭ №14), staršynia prafkama Zavoda paŭpravadnikovych pryboraŭ navukova‑vytvorčaha abjadnańnia «Intehrał» Halina Marcinovič.

Biźniesmien Juryj Dańkoŭ, jaki sprabavaŭ vyłučycca na prezidenckija vybary ŭ 2001 hodzie, sprabuje prabicca ŭ harsaviet u Kupryjanaŭskaj akruzie. Tut jon zmahajecca z namieśnikam načalnika «Minskaha mietrapalitena» Anatolem Sarokinym.

Jurasiu Mielaškieviču z Ruchu «Za Svabodu» daviadziecca, jak i Alaksieju Janukieviču, supierničać z dyrektaram aŭtaparka. Michaił Marcul uznačalvaje aŭtobusny park №5.

Ažno vosiem proźviščaŭ budzie ŭ biuleteniach žycharoŭ Sucharaŭskaj akruhi. Tam bałatujecca palitołah, siabra Ruchu «Za Svabodu» Aleś Łahviniec. Vyhladaje na toje, što kandydatam ad ułady pa akruzie idzie dyrektarka siaredniaj škoły №158 Maryna Mušnickaja.

Taksama na hetaj akruzie budzie adrazu try kandydaty maładziejšyja za 30 hadoŭ: viadučy inžynier pradpryjemstva «PromMVT» Arciom Arłoŭ, hałoŭny buchhałtar zamiežnaha TAA «Chlebadar» Hanna Harškova i dyrektar Asacyjacyi małoha i siaredniaha pradprymalnictva Arciom Šarkoŭ. Na troch maładych adzin piensijanier — 76‑hadovy Viktar Kavalkoŭ z apazicyjnaha «Spraviadlivaha śvietu».

Znoŭ u deputaty sprabuje trapić były sacyjał‑demakrat Uładzimir Niściuk, jaki pieršy zahavaryŭ pra dyjałoh apazicyi z uładaj. U Niściuka supiernikami buduć jak dyrektarka škoły №125 Taćciana Bieraścievič, tak i junaja siabroŭka AHP Hanna Jahorava.

Kiraŭnik minskaj haradskoj arhanizacyi Partyi BNF Viktar Ivaškievič bałatujecca ŭ Staravilenskaj akruzie. Hałoŭnym jahonym kankurentam vystupaje pamočnik deputata pałaty pradstaŭnikoŭ Hieorhij Atamanaŭ, siabra KPB.

Iduć na vybary nie tolki prafiesijnyja palityki. Zarehistravaŭsia ŭ Navavilenskaj akruzie namieśnik dyrektara vydaviectva «Halijafy» Michaś Bašura. Ad ułady pa hetaj akruzie idzie staršynia respublikanskaha kamiteta Biełaruskaha prafsajuza rabotnikaŭ dziaržaŭnych ustanoŭ Siarhiej Chalava. A ad apazicyi — Vital Stažaraŭ z AHP.

U Mirašničenkaŭskaj akruzie bałatujecca Vincuk Viačorka z Partyi BNF. Razam ź im iduć jašče dva partyjcy — Uładzimir Hałaburda (Partyja pracy i spraviadlivaści) i Eduard Kuźniacoŭ (ŁDPB).

Namieśnik Kalakina pa «Spraviadlivym śviecie» Valery Uchnaloŭ zarehistravany ŭ Akademičnaj vybarčaj akruzie, były palitviazień Źmicier Kaśpiarovič — u Kujbyšaŭskaj.

Nu a vybarcy Traktarazavodskaj akruhi zmohuć prahałasavać za sapraŭdnaha hrafa. Pa śpisach BCHD tut idzie Alaksandr Prušynski.

ZP

* * *

Uładnyja kandydaty demanstrujuć vysokija prybytki

Tradycyjna małacikavaja jak šarahovym vybarščykam, tak i mnohim palitykam vybarčaja kampanija ŭ miascovyja saviety sioleta vyklikała ŭsplosk cikavaści. A padahreli jaje publikacyi ŭ miascovych aficyjnych vydańniach dekłaracyj sukupnych hadavych zarobkaŭ zarehistravanych kandydataŭ.

Vyjaviłasia, što roźnica pamiž zarobkami kandydataŭ siahaje sotni razoŭ. Zvyšprybytki (pa biełaruskich mierkach) prademanstravała načalstva.

130‑miljonny hadavy zarobak prarektara Homielskaha ŭniviersiteta imia F. Skaryny Siarhieja Chanieni vyklikaŭ sapraŭdny furor u vybarcaŭ. I nie dziva — miesiačny zarobak prarektara bolšy za hadavuju piensiju jahonaha kankurenta ad apazicyi 73‑hadovaha siabra partyi «Spraviadlivy śviet» Anatola Iljinčyka.

92 miljony zadekłaravaŭ dyrektar Homielskaha chimzavoda Ihar Lašenka, 84 miljony ŭ hiendyrektara likiora‑harełačnaha zavoda Haliny Kardasievaj, 81 miljon u dyrektara fabryki «Spartak» Alesi Samsonavaj i h.d.

Ažyjataž vakoł zarobkaŭ homielskich čynoŭnikaŭ i funkcyjanieraŭ naściarožyŭ ich kalehaŭ z Hrodna.

Numar «Hrodzienskaj praŭdy» sa źviestkami pra zarobki kandydataŭ nie pastupiŭ u volny prodaž, aznajomicca ź imi možna tolki ŭ biblijatekach.

Adšukać źviestki pra zarobki kandydataŭ u dziaržaŭnych vydańniach nie tak prosta: mnohija rajonki nadrukavali źviestki pra patencyjnych narodnych abrańnikaŭ, ale «zabyli» paznačyć ich dachody. A mnohija haziety admovilisia drukavać padobnuju infarmacyju, matyvujučy heta vialikaj kolkaściu kandydataŭ i, adpaviedna, adsutnaściu volnaha miesca na pałosach.

Lideram siarod hrodziencaŭ staŭ hiendyrektar «Hrodnažyłbuda» Oleš Uškievič — 119 miljonaŭ. Hadavy zarobak rektara Hrodzienskaha dziaržuniviersiteta imia Janki Kupały vyhladaje ścipła ŭ paraŭnańni zarobkam homielskaha prarektara — «usiaho» 79 miljonaŭ.

Imavierna, takija zarobki typovyja dla łukašenkaŭskaj drobnaj namienkłatury.

Varta adznačyć, što zhodna art. 68 Vybarčaha kodeksa, raźmiaščeńnie ŭ ŚMI źviestak pra zarehistravanych kandydataŭ, u tym liku i pra ich sukupny hadavy prybytak, abaviazkovaje. U vypadku niemahčymaści publikacyi hetaj infarmacyi ŭ hazietach, vybarčyja kamisii abaviazanyja danieści jaje da vybarščykaŭ inšym sposabam. Naprykład, raźmiaščeńniem hetych źviestak na ahitacyjnych płakatach.

Siamion Piečanko

Top‑5 kandydataŭ u deputaty z samymi vysokimi zarobkami

130 młn. — Siarhiej Chanienia, prarektar Homielskaha ŭniviersiteta imia F. Skaryny

119 młn. —Oleš Uškievič, hiendyrektar «Hrodnažyłbuda»

116 młn. — Mikałaj Patrončyk, načalnik Kruhlanskaha PMK‑266

102 młn. — Siarhiej Sasnoŭski, hienieralny dyrektar RUP «Homieltransnafta» «Družba»

92 młn. — Ihar Lašenka, dyrektar AAT «Homielski chimičny zavod»

Pavodle źviestak, raźmieščanych u rehijanalnych ŚMI, dastupnych »NN»

0

0

0

0

0

0