«My znachodzimsia pobač ź miažoj Biełarusi». Mer Vilni pradstaviŭ płan abarony horada
Płanujucca zakupki bietonnych błokaŭ, «zuboŭ drakona» i «stalovych vožykaŭ».
Mer Vilni Vałdas Bienkunskas apublikavaŭ płan palityki pa abaronie litoŭskaj stalicy. Kiraŭnik horada zajaviŭ, što Vilnia, u vypadku kanfliktu, stanie metaj numar adzin, piša Delfi.
«I, pa-za ŭsiakim sumnievam, — my znachodzimsia pobač ź miažoj Biełarusi. Za niekalki dziasiatkaŭ kiłamietraŭ ad Vilni jość Astravieckaja AES, jakaja źjaŭlajecca pahrozaj», — adznačyŭ mer.
Płan možna padzialić na dźvie častki: dapamohu abaronie i ŭmacavańnie hramadzianskaj abarony. Dapamoha abaronie ŭklučaje park mier pa kontrmabilnaści, novuju prastoru dla dronaŭ, vajennuju kamiendaturu i pryniaćcie niamieckaj bryhady ŭ stalicy i ŭ Litvie.
Miery pa kontrmabilnaści achopiać uschodniuju i paŭdniovuju častki horada, płan pavinny realizavać da vosieni. Płanujecca abjavić konkurs na zakupki bietonnych błokaŭ dla pierakryćcia daroh, procitankavych nadaŭbniaŭ (zuboŭ drakona), zbornych kamplektaŭ stalovych «vožykaŭ».
«Jany ŭ pieršuju čarhu patrebnyja dla błakavańnia ŭjezdu ŭ horad pa darohach. Asnoŭnyja darohi ŭ paŭdniovym i ŭschodnim kirunku, kali hladzieć na źniešniuju miažu NATA. Heta achoplivaje i sietku nievialikich daroh, pačynajučy ź lasnych, hravijnych, jakija mahli b vykarystoŭvacca padčas ataki na horad», — raspavioŭ mer.
Na praciahu hoda mierami kontrmabilnaści źbirajucca pakryć uvieś horad.
Kartu daroh, jakija buduć pierakryvać u vypadku vajny, publičyć nie buduć. Jaje raspracujuć sumiesna z vajennymi śpiecyjalistami. Taksama płanujecca stvaryć novuju trasu dla dronaŭ, dzie pa papiaredniaj rehistracyi zmohuć treniravacca dzieci i darosłyja.
