U Mahilovie źbirajucca pabudavać muziejny kompleks u honar rasijskaha cara Mikałaja II
Ekspazicyi buduć pryśviečany padziejam pačatku XX stahodździa.
Fota: Mahiloŭ Anłajn
Muziejny kompleks płanujuć uźvieści ŭ parku Horkaha pobač z chramam śviatych Carskich Strastacierpcaŭ — u takim čynie ŭ RPC była kananizavana siamja apošniaha rasijskaha impieratara Mikałaja II.
Novyja muziei buduć pryśviečanyja padziejam pačatku XX stahodździa, piša «Mahiloŭ anłajn». Siarod asnoŭnych tem — Pieršaja Suśvietnaja vajna, Staŭka Viarchoŭnaha hałoŭnakamandujučaha rasijskaj armii, siamja Mikałaja II, hieorhijeŭskija kavalery, Lutaŭskaja revalucyja 1917 hoda.
Terminy realizacyi prajektu pakul nie nazyvajucca, adnak užo jość eskizy architekturnaha ansambla.
U Mahilovie ŭ 1915-1917 hadach znachodziłasia Staŭka Viarchoŭnaha hałoŭnakamandujučaha armii Rasijskaj impieryi. Tut pieršyja dni Lutaŭskaj revalucyi pravioŭ Mikałaj II.
