«Kab nie razmova pra hrošy za kanapaj, ja b jaho nie paznała». Źniavolenaja raskazała pra sustreču ź Cichanoŭskim u turemnym ciahniku
Alesia Bunievič, dyrektarka vilenskaj kramy A2.print, jakaja adsiadzieła ŭ Biełarusi za dapamohu ŭ evakuacyi ludziej z krainy, raskazała, jak sustreła na etapie Siarhieja Cichanoŭskaha.
Skrynšot ź videa, jakoje źjaviłasia ŭ lipieni 2023 hoda, kab źniapraŭdzić čutki pra śmierć Cichanoŭskaha. Krynica: progomel.by
«Ja prachodziła mima jaho ŭ prybiralniu. Musiła niešta jamu skazać, i nie znajšła ničoha lepšaha, jak «Pryvitańnie ad ekstremistaŭ Maładziečna!» Prosta durnica, jak možna było takoje lapnuć?! Viartajusia, i jon zapytvaje, pa jakoj ja spravie prachodžu. A ja jašče nie advykła ad svajho artykuła pa teraryźmie, dyk i kažu jamu, takaja dziaŭčynka ŭ akularčykach i z koskami — teraryzm!» — kaža Bunievič.
Pavodle jaje słoŭ, Siarhiej mocna źmianiŭsia ŭ źniavoleńni, jaho ciažka paznać.
«Jon byŭ schudnieły, zmarnieły tvaram, mieŭ ziamlisty koler tvaru. Kab nie hołas i razmova pra hrošy za kanapaj, ja b jaho, napeŭna, nie paznała. Heta byŭ dzień jaho narodzinaŭ, 18 žniŭnia, jaho etapavali ŭ krytuju turmu ŭ Žodzina. Dla mianie hetaja sustreča była kłasnym znakam, što ŭsio budzie dobra. Siarhiej vielmi bajavy, chacia i hladzieć na jaho było baluča, ale ŭnutranaja moc adčuvałasia ŭ razmovie z kanvairami, jakuju ja trochi čuła. Jon nie apuskaje ruki», — kaža Alesia.
Siarhiej Cichanoŭski ŭ śniežni 2021-ha byŭ asudžany na 18 hadoŭ kałonii. Paźniej da jaho terminu dadali jašče paŭtara hoda — za «złosnaje niepadparadkavańnie patrabavańniam administracyi». Siamja nie atrymlivaje ad jaho nijakich źviestak.
Čytajcie artykuł całkam:
Čytajcie taksama:
