Jak dapamahatary zarablajuć na polskich vizach z novaj sełfi-vieryfikacyjaj
Sełfi-vieryfikacyja na sajcie VFS, vyhladaje, zrabiła pasłuhi «pamočnikaŭ» daražejšymi. U čatach pišuć navat pra 2000 rubloŭ za «chutka i z harantyjaj», paviedamlaje Devby.
«Biez čarhi i zapisy praz sajt, ale košt — ad 2000 rubloŭ»
U čacie łoŭli dat na polskuju vizu zaŭsiody žyvoje abmierkavańnie: słotaŭ na roznyja typy viz mała (i redka), ź vieryfikacyjaj składanaści, nie ŭsie žadajuć marnavać na heta čas, u šmatlikich «pamočnikaŭ» za 300—500+ rubloŭ, ale heta taksama dapamahaje nie ŭsim. Adzin z karystalnikaŭ cikavicca, «ci ok, kali dapamahatar nie moža zapisać 4 miesiacy».
Niekatoryja ŭ pošukach tych, chto zrobić «chutka i z harantyjaj» — miarkujučy pa paviedamleńniach u čacie, takija taksama jość (doraha). Adzin z karystalnikaŭ napisaŭ, što jamu ahučyli ličbu ŭ 2000 rubloŭ. Praviarać infarmacyju jon nie staŭ, bo jamu «nie patrebna viza pa takim košcie».
Ivan raskazvaje, što jamu dva tydni tamu ŭ inšym čacie rekamiendavali čałavieka, jaki «dapamoža za 1500+ rubloŭ». Da taho momantu małady čałaviek užo supracoŭničaŭ ź inšymi «dapamahatarami», jany vystavili rachunak u 550 rubloŭ za zapis — 2 miesiacy nijakaha vyniku. Ivan stamiŭsia čakać, užo hatovy byŭ raskašelicca — i jamu dali kantakt. Jon patelefanavaŭ svaim «pamočnikam», kab razarvać damovu.
— Ale niečakana pośpiech: u toj ža dzień jany zapisali mianie na padaču ŭ Homieli (moža spałochalisia, što hrošy syduć, i kinuli na heta ŭsie siły). Heta było dva tydni tamu.
Vital kaža, što naprykancy traŭnia zmoh z dapamohaj zapisać na vizu dziaciej — «chutka, tamu što dzieciam nie treba prachodzić vieryfikacyju».
— Pa 300 rubloŭ za kožnaha: pieradpłata — 50%, astatniaja suma paśla.
A voś jaho žonku ŭsio nie mohuć nijak zapisać, «varyjantu paskoryć praces ciapier niama».
Siabry Vitala padavalisia «biez čarhi i zapisy praz sajt, ale tam košt — ad 2000 rubloŭ, dla nas heta doraha».
— Jany skinuli «pamočniku» fota pašpartoŭ i pieraličyli hrošy, a na nastupny dzień im paviedamili datu, čas i miesca padačy. Ni vieryfikacyi, ni tałona na padaču nie było.
Instrumientaryj takoha «dapamahatara» (jak i fakt jaho isnavańnia) nie zusim zrazumieły: pa słovach Vitala, jaho siabry dali abiacańnie «nie raskazvać pra jaho».
«U mnohich rascenki vyraśli na 150-200 rubloŭ»
Nievialikaje paraŭnańnie pakazvaje, što pasłuhi niekatorych ahienctvaŭ sapraŭdy padaraželi. 2 hady tamu rascenki na zapis na sajcie sietki vizavych centraŭ VisaVisa (jany nazyvajuć siabie «numaram 1 u Biełarusi») składali 500 rubloŭ, ciapier — ad 700 da 1050 rubloŭ. Na sajcie jość udakładnieńnie, što pa nižniaj miažy płaciać tyja, chto sam rychtuje dakumienty.
Abmierkavać niuansy, naprykład, terminy i harantyju vyniku, žurnalistu devby.io nie ŭdałosia — u čacie na sajcie supracoŭniki ahienctva, na žal, nie adkazvajuć, pa telefonie taksama nie datelefanavacca.
Dalejšy siorfinh pakazaŭ, što ŭ cełym rascenki ŭ ahienctvaŭ pačynajucca ad 500 rubloŭ, kali zaprašeńnie ad pracadaŭcy daje klijent, i dachodziać da 800 — kali jaho robić ahienctva. Terminy — ad 2 tydniaŭ i bolš.
Čytačy kažuć, što «ŭ mnohich, chto zajmaŭsia zapisam na vizy, rascenki vyraśli na 150-200 rubloŭ».
Jaŭhien svaich «pamočnikaŭ» nazyvaje «pravieranymi»: raniej małady čałaviek dvojčy zapisvaŭsia ź ich dapamohaj na vizu, pryčym u dzień zvarotu.
— Umovy byli takimi: 50% — pieradpłata, jašče stolki ž — paśla zapisu, usia suma składała 450 rubloŭ. Dapamahali z ankietaj i razdrukoŭkaj/ksierakopijami ŭsio, što nieabchodna.
Na žal, u tyja abodva razy Jaŭhien atrymaŭ admovy. Matyviroŭka — prasłavuty punkt 10, jaki hučyć tak: «Majucca abhruntavanyja sumnievy z nahody dakładnaści zroblenych Vami zajaŭ ab mecie Vašaha znachodžańnia na terytoryi Respubliki Polšča ŭ suviazi z najaŭnymi dokazami ci abjektyŭnymi abstavinami, jakija pakazvajuć na toje, što meta pajezdki moža być inšaj, čym było zajaŭlena». Padobnyja admovy mahli być źviazanyja ź vizavym skandałam.
Jaŭhien zrabiŭ niekalki sprobaŭ zapisacca samastojna — i znoŭ pryjšoŭ da «pamočnikaŭ». Daviedaŭsia, što z uviadzieńniem novych pravił vieryfikacyi na sajcie VFS ich pasłuhi padaraželi — i kaštujuć užo 600 rubloŭ.
— Kožny tydzień na sajcie niešta mianiałasia — i boty ad «dapamahataraŭ» vidavočna nie paśpiavali za źmienami. Ja bačyŭ volnyja daty ŭ botach — ale pakul prachodziŭ praz hory pamyłak vielmi kryvoha sajta, ich užo nie było.
Niekalki razoŭ Jaŭhien byŭ blizki da mety — zastavaŭsia ŭsiaho adzin krok, apošni, ale za im małady čałaviek znoŭ apyniaŭsia na staroncy ŭvachodu ŭ akaŭnt.
— Na minułym tydni — znoŭ novyja źmieny: 4 spasyłki vieryfikacyi — i ban. I pakolki ŭsio pryviazana da numara pašparta, źmiena akaŭnta ničoha nie daje. Ličy — jašče adzin tydzień u pralocie.
Jaŭhien kaža, što rady b niejak paskoryć praces — «ale taki varyjant nie prapanoŭvaŭsia».
«Tydzień možna samomu sprabavać — a potym daty znoŭ za chvilinu sychodziać»
U čacie łoŭli dat jość paviedamleńni ad tych, kamu ŭdałosia samastojna zapisacca. Chutčej za ŭsio, bolšaść takich karystalnikaŭ prosta nie daje spravazdaču ŭ čacie.
30 červienia niechta padzialiŭsia pośpiechami: «Učora śviakroŭ zapisałasia sama — ale ja kantralavaŭ pa fejstajmie. U mamy byŭ pašpart zabłočany, ale prajšło 24 hadziny — i siońnia my prakrucili toje ž samaje. Viadoma nie ź pieršaha razu».
Krychu vyšej u hety ž dzień jašče paviedamleńnie: dziaŭčyna zapisałasia na padaču ŭ Homiel, vieryfikacyju prajšła z druhoha razu — a da hetaha było «amal 4 miesiacy sprob».
Za 29 červienia cełych 8 paviedamleńniaŭ ad ščaśliŭčykaŭ, jakija zmahli zapisacca.
«Nie biez prykołaŭ, viadoma, — dzielicca adzin ź ich. — Spačatku nie prajšoŭ vieryfikacyju, ale kali pasprabavaŭ nanova, zjaviłasia paviedamleńnie, što jana projdziena. U kalendary nie było słotaŭ, ale ja pramataŭ na paru miesiacaŭ napierad i viarnuŭsia na lipień — i daty zjavilisia. Na etapie paćvierdžańnia zapisu vyskačyła pamyłka — ja zajšoŭ paŭtorna i ŭbačyŭ, što vieryfikacyja zachavałasia. Astatnija kroki prajšoŭ chutka».
1 lipienia adzin z karystalnikaŭ padsumavaŭ, što ŭ apošniuju «razdaču bolš ludziej sami zapisalisia, čym z «pamočnikami». Pa jaho nazirańniach, tak byvaje, kali raspracoŭščyki vykočvajuć na sajt abnaŭleńni — «tydzień možna samomu sprabavać, a potym daty znoŭ za chvilinu sychodziać».
Čytajcie taksama:
Polšča praciahnuła sproščany paradak vydačy biełarusam prajaznoha dakumienta inšaziemca
