Kazachski biznesoviec śćviardžaje, što nie vinavaty ŭ maštabnym pažary na vostravie kala Afinaŭ
Usiaho ahniom było achoplena kala 30 hiektaraŭ sasnovaha lesu.
Ilustracyjnaje fota Yorgos Karahalis / AP
Adzin z najbahaciejšych biznesoŭcaŭ Kazachstana Danijar Abułhazin zajaviŭ, što nie datyčny da lasnoha pažaru ŭ kancy červienia na hreckaj vyśpie Idra (Hidra) niepadalok ad Afin, jaki, pavodle źviestak miascovych uładaŭ, moh adbycca paśla zapusku fiejervierkaŭ z supierjachty Persefoni I, piša Bi-bi-si.
Abułhazin paćvierdziŭ, što arandavaŭ jachtu ź siabrami, ale zajaviŭ, što ni jon, ni jaho hości nie rabili ničoha supraćzakonnaha.
«Ja kateharyčna admaŭlaju jakija-niebudź pravaparušeńni. Ni ja, ni maje hości nie rabili nijakich dziejańniaŭ, jakija mahli b pryvieści da pažaru. My stroha prytrymlivalisia praviłaŭ pažarnaj biaśpieki, ustanoŭlenych na jachcie. Ni ja, ni maje hości nie prasili ekipaž jachty ci inšych trecich asob pradprymać jakija-niebudź dziejańni, jakija mahli b pryvieści da pažaru», — havorycca ŭ zajavie biznesoŭca, jakuju cytujuć kazachstanskija ŚMI.
Pažar na vostravie ŭspychnuŭ uviečary 21 červienia, kali jachta znachodziłasia niepadalok. Usiaho ahniom było achoplena kala 30 hiektaraŭ sasnovaha lesu.
Pa słovach Abułhazina, pierad adjezdam z Hrecyi z haściami razmaŭlali pradstaŭniki hreckich uładaŭ, jakija nie pradjavili nijakich pretenzij u suviazi ź incydentam.
Spačatku ŭłady śćviardžali, što fiejervierki zapuskalisia prosta z sudna, adnak ciapier ŚMI pišuć, što heta mahło adbycca na plažy, na jaki mierkavana vysadzilisia pasažyry jachty.
Ekipaž jachty paśla incydentu byŭ zatrymany. Kapitan jachty i jaho staršy pamočnik znachodziacca pad vartaj, jašče 11 členaŭ ekipaža vyzvalenyja pad zakład. Usie jany adprečvajuć abvinavačvańni.
U niadzielu ŚMI paviedamili, što miascovyja prakurory pradjavili abvinavačvańni ŭ saŭdziele ŭ padpale i arandataram jachty, a taksama zapytali dapamohu ŭładaŭ Kazachstana.
Pa słovach Abułhazina, jakija źjavilisia ŭ ŚMI, abvinavačvańni stali dla jaho niečakanaściu. Jon zapeŭniŭ, što hatovy i dalej supracoŭničać z uładami Hrecyi.
Hrecyja niadaŭna zrabiła bolš strohim pakarańnie za padpał lasoŭ — vinavatym pahražaje da 20 hadoŭ turmy i štraf u pamiery da 200 tysiač jeŭra.
Abułhazin źjaŭlajecca važnaj fihuraj u Kazachstanskaj naftavaj pramysłovaści, jaho bahaćcie aceńvajecca amal u 400 miljonaŭ dalaraŭ.
