Jakuju ekaściežku ŭ Biełarusi abrać dla padarožža vychadnoha dnia?
Leta — idealny čas dla padarožžaŭ i adkryćciaŭ. U Biełarusi jość mnostva ŭnikalnych pryrodnych miescaŭ, kožnaje ź jakich ujaŭlaje saboj sapraŭdnuju piarlinu. A kab znajomstva ź imi było zručnym, cikavym i ekałahičnym, na mnohich ź ich byli stvoranyja ekałahičnyja ściežki i maršruty. Jany nie tolki dazvalajuć atrymlivać asałodu ad pryhožych krajavidaŭ, ale i dajuć mahčymaść daviedacca šmat novaha pra miascovuju fłoru i faŭnu. «Zialony partał» prapanuje prajścisia pa troch ekaściežkach, kožnaja ź jakich padoryć niezabyŭnyja ŭražańni i jarkija emocyi.
Fota: Alona Vachramiejeva
Ekałahičnyja ściežka «Błakitnyja aziory»
U samym sercy biełaruskaha Paazierja raźlahajecca ŭnikalny, stvorany tysiačy hadoŭ tamu ledavikom uzhorysta-aziorny pryrodny kompleks, viadomy jak «Błakitnyja aziory».
Fota: Alona Vachramiejeva
Heta miesca, dzie vysokija pahorki płaŭna pierachodziać u hłybokija aziornyja katłaviny, stvarajučy cudoŭnyja piejzažy i idealnyja ŭmovy dla ekałahičnaha turyzmu. Adna ź piarlin hetaha rehijonu — ekałahičnaja ściežka z adnajmiennaj nazvaj, jakaja ŭvachodzić u skład nacyjanalnaha parku «Naračanski».
Vypraŭlajemsia ŭ zachaplalnaje padarožža praz raznastajnyja pryrodnyja zony i malaŭničyja aziory.
Fota: Alona Vachramiejeva
Uvachod na ekaściežku
Ekałahičnaja ściežka pačynajecca ŭ rajonie vioski Alševa. Tut vy možacie samastojna vypravicca ŭ padarožža abo zamović ekskursiju ŭ adździele turyzmu nacyjanalnaha parku.
Košt uvachodnaha kvitka składaje 3 rubli, a kaardynaty ŭvachodu na ściežku: 54.960451, 26.361573.
Fota: Alona Vachramiejeva
Maršrut i jaho asablivaści
Ściežka prapanuje try asnoŭnyja varyjanty maršrutu: praciahłaściu 3, 4 i 7 km.
Usie jany prachodziać pa mocna pierasiečanaj miascovaści, achoplivajučy hrebień ozavaj hrady, ihličnyja lasy, malaŭničyja aziory i zabałočanyja ŭčastki. Ale pry hetym tut kamfortnaja dla prahułak infrastruktura — uzdoŭž ściežki pastaŭlenyja pakazalniki i infarmacyjnyja anšłahi, abstalavanyja naziralnyja placoŭki i miescy dla adpačynku.
Fota: Alona Vachramiejeva
Sustrečy z pryrodnymi cudami
Pieršyja kroki pa ściežcy pryvodziać nas da raki Strača. Noraŭ jaje pieravažna davoli burlivy — z parohami i pierakatami, jakija časam nahadvajuć hornyja. Nie adno pakaleńnie bajdaračnikaŭ pačynała svoj šlach mienavita z hetaj raki.
Ale mienavita na hetym učastku ekałahičnaj ściežki Strača mirna ciače, piatlajučy i ŭtvarajučy maleńki vostraŭ, na jaki možna trapić, prajšoŭšy pa draŭlanym moście.
I viadoma ž, sami dziŭnyja pa pryhažości Błakitnyja aziory! U pryrodnym kompleksie ich 14, ale padčas prahułki pa ekałahičnaj ściežcy vy zmožacie paznajomicca tolki z tryma ź ich.
Hłubla. Fota: Alona Vachramiejeva
Voziera Hłubla dzivić prazrystaściu i čyścinioj vady, jakaja ŭ soniečnaje nadvorje nabyvaje błakitnavata-zialonaje adcieńnie dziakujučy śvietłym vapnavym donnym adkładam.
Voziera Hłubielka ździŭlaje tym, što vada kala jaho dna nie źmiešvałasia z pavierchnievaj na praciahu niekalkich tysiač hadoŭ, što robić jaho ŭnikalnym pa svaich charaktarystykach. Akramia taho, heta samaje ramantyčnaje voziera ŭ krainie. Forma voziera nahadvaje serca, vostraŭ u centry nadaje asablivuju pryhažość.
Hłubielka z vyšyni. Fota: Alona Vachramiejeva
Voziera Miortvaje maje žaŭtlava-karyčnievy koler vady z-za ściokaŭ z bahnistych bierahoŭ, stvarajučy zahadkavuju i niezvyčajnuju atmaśfieru.
Voziera Miortvaje — heta katłavan, zapoŭnieny padziemnymi vodami, jaki ŭtvaryŭsia ŭ vyniku pravału płasta ziamli, adnosicca da azior karstavaha pachodžańnia. Vierchni płast 12 m — presnaja vada, nižni ŭzrovień — paražnina, zapoŭnienaja sieravadarodam.
Voziera Miortvaje. Fota: Alona Vachramiejeva
Darečy, azioram kala 10 tysiač hadoŭ!
Asablivaja mahija hetaha maršrutu vyjaŭlajecca i ŭ mnohich inšych detalach. Adna z takich słavutaściaŭ — sasna «Stary manach», jakaja, pa miascovych pavierjach, vykonvaje žadańni.
Sasna «Stary manach». Fota: Alona Vachramiejeva
Uzdoŭž maršrutu vy taksama pabačycie ślady dziejnaści dzikich žyvioł i padkormačnyja placoŭki dla kapytnych. Uviesnu tut možna lubavacca ćvitučymi palanami kuraślepu, son-travy i łandyšaŭ.
Špacyr pa ściežcy zachoplivaje nie tolki pryrodnymi vidami, ale i architekturnymi abjektami.
U siaredzinie maršrutu kala voziera Hłubla možna spynicca na pryvał i atrymać asałodu ad spakoju i pryhažości vodnaj roŭniadzi.
A jašče abaviazkova naviedajcie ahladnuju placoŭku «Łysaja hara», adkul adkryvajecca niezvyčajny vid na navakolle. Ahladnaja hara ŭparadkavanaja łavačkaj i samoj nievialikaj ahladnaj placoŭkaj. Z-za dreŭ bačnyja aziory Hłubla i Hłubielka.
Ściežka na stendzie. Fota: Alona Vachramiejeva
Važnyja praviły dla naviedvalnikaŭ
Pamiatajcie, što bolšaja častka pryrodnaha kompleksu «Błakitnyja aziory» raźmieščanaja ŭ zapaviednaj zonie.
Heta značyć, što padarožničać možna tolki pa paznačanych maršrutach, parkavać mašyny i stavić pałatki — tolki ŭ śpiecyjalna adviedzienych miescach. Heta nieabchodna dla zachavańnia i adnaŭleńnia kaštoŭnych pryrodnych ekasistem.
Ekałahičnaja ściežka «U krai viartlavaj čarotaŭki»: padarožža pa zakaźniku «Sporaŭski»
Ujavicie sabie miesca, dzie zaraśniki asaki i bałoty atačajuć vas, a z naziralnych vyšak adkryvajucca vidy, zdolnyja zaniać duch.
Fota: Alona Vachramiejeva
Heta miesca, respublikanski bijałahičny zakaźnik «Sporaŭski» ŭ Bresckaj vobłaści — najbujniejšy masiŭ nizinnych bałot Paleśsia, raźmieščanych u pojmie raki Jasieldy, jaki źjaŭlajecca ŭnikalnym pa płoščy i naturalnaj zachavanaści dla centralnaj častki Jeŭropy.
Fota: Alona Vachramiejeva
Sporaŭskija bałoty dajšli da nas praktyčna ŭ pieršapačatkovym vyhladzie, što dazvoliła zachavacca šmatlikim amal źnikłym vidam raślin, žyvioł i ptušak, uklučajučy viartlavuju čarotaŭku — samuju redkuju piavučuju ptušku Jeŭropy.
Hety vid pad hłabalnaj pahrozaj žyvie tolki na nizinnych asakovych bałotach, źniščanych amal pa ŭsioj Jeŭropie. U Biełarusi hniazdujecca kala 30-40% jaje suśvietnaj papulacyi — dziakujučy tamu, što tut zastalisia vialikija bałotnyja masivy.
I mienavita ŭ honar redkaj ptuški nazvanaja miascovaja ekałahičnaja ściežka «U krai viartlavaj čarotaŭki». Naviedaŭšy jaje, vy akunieciesia ŭ śviet dzikaj pryrody i atrymajecie asałodu ad jaho pryhažości, bo daloka nie ŭsie bałoty lohka dastupnyja dla piešaha turysta.
Fota: Alona Vachramiejeva
Pryrodnyja słavutaści i zajmalnyja atrakcyi na ściežcy
Kali vy nabližajeciesia da pačatku ściežki, vas sustrakaje draŭlany naścił, jaki viadzie praz zapaviednyja ŭčastki zakaźnika.
Ściežka ŭjaŭlaje saboj kalcavy maršrut daŭžynioj paŭtara kiłamietra, što dazvalaje prajści poŭny kruh i viarnucca ŭ zychodny punkt, nie paŭtarajučy šlach.
Padarožničajučy pa ściežcy, vy zmožacie nie tolki atrymać asałodu ad pryrody, ale i daviedacca šmat novaha. Supravadžajučy hid raskaža vam pra viartlavuju čarotaŭku, a ŭ peŭny čas hoda vy zmožacie i sami ŭbačyć jaje ŭ naturalnym asiarodździ žyćcia i pačuć jaje śpieŭ.
Parom praź Jasieldu. Fota: Alona Vachramiejeva
Adna z asablivaściaŭ ekaściežki — dźvie paromnyja pierapravy praz raku Jasieldu, što dadaje elemient pryhodaŭ i dazvalaje nazirać za vodnym žyćciom raki prosta z paroma.
Hetaja atrakcyja nie pakidaje abyjakavymi ni darosłych, ni dziaciej. Heta nie tolki zručny srodak pieramiaščeńnia, ale i cikavy vopyt, asabliva dla tych, chto ŭpieršyniu karystajecca paromam.
A supravadžajučyja hidy sočać za biaśpiekaj na pierapravie, kab pryhody byli zajmalnymi i biaśpiečnymi.
Fota: Alona Vachramiejeva
Pa chodzie maršrutu vy ŭbačycie mnostva cikavych miescaŭ:
- raka Jasielda ź jaje malaŭničymi bierahami i raźmieranaj płyńniu.
- bałota, dzie možna nazirać za ptuškami i inšymi žyviołami.
- ahladnyja vyški, adkul adkryvajucca cudoŭnyja vidy na navakolnyja łandšafty.
- interaktyŭnyja stendy, jakija dazvolać vam daviedacca bolš pra miascovyja fłoru i faŭnu. Tut možna taktylna adčuć formy žyvioł i raślin, što asabliva karysna dla ludziej z parušeńniami zroku.
Fota: Alona Vachramiejeva
Čas dla naviedvańnia i rekamiendacyi
Naviedvańnie ściežki mahčymaje ŭ lubuju paru hoda, adnak viasnoj i letam maršrut asabliva pryvabny dziakujučy kvitniejučym raślinam i aktyŭnamu žyćciu žyvioł. U hety čas možna ŭbačyć i pačuć viartlavuju čarotaŭku.
Dla tych, chto addaje pieravahu bolš hłybokamu apuskańniu ŭ temu, dastupnaja pasłuha ekskursavoda. Supravadžeńnie hidam robić padarožža jašče bolš infarmatyŭnym i cikavym, dazvalajučy daviedacca mnostva cikavych faktaŭ pra pryrodu i historyju zakaźnika.
Ekałahičnyja maršruty na «Saračanskich aziorach»
Na samaj poŭnačy Astravieckaha rajona raskinuŭsia sapraŭdny skarb Biełarusi — «Saračanskija aziory». Heta miesca, taksama viadomaje jak «bryljantavyja karali» krainy, prapanuje svaim haściam nievierahodnaje bahaćcie pryrody i ŭnikalnyja mahčymaści dla adpačynku i daśledavańniaŭ.
Fota: Alona Vachramiejeva
Čaroŭnaja pryroda Saračanskich azior
Kali vy apynajeciesia na Saračanskich aziorach, pierad vami adkryvajecca ŭzrušalnaja karcina: reliktavyja lasy pieraplatajucca sa spadzistymi raŭninami i zabałočanymi nizinami, a pahorki ledavikovaha pachodžańnia płaŭna źmianiajucca malaŭničymi aziorami.
Niaredka ich nazyvajuć błakitnymi karalami Astravieččyny. Bo 14 azior ledavikovaha pachodžańnia niby nanizanyja na raku Saračanku, jakaja ich złučaje, i raściahnutyja łancužkom na 18 kiłamietraŭ.
Fota: Alona Vachramiejeva
Aziory stali jadrom Respublikanskaha łandšaftnaha zakaźnika z adnajmiennaj nazvaj «Saračanskija aziory».
Toj samy ledavik, jakomu biełaruskaje Paazierje abaviazana svaim źjaŭleńniem, na terytoryi zakaźnika stvaryŭ aziornyja katłaviny tak zvanaha evarzijnaha typu.
Jany ŭtvoranyja padajučymi z pavierchni ledavika tałymi vodami. Akramia taho, tut taksama jość cikavaje hieałahičnaje ŭtvareńnie — ahaleńnie mižledavikovych hlinaŭ (razrez) pad nazvaj «Kamaryški».
Fota: Alona Vachramiejeva
U Saračanskich aziorach vada źmiešvajecca słaba, u vyniku ŭ prydonnych płastach bolšuju častku hoda adsutničaje kisłarod, a heta vyklikaje źjaŭleńnie tut sieravadarodu. Saračanskija aziory vielmi čystyja i prazrystyja.
Fota: Alona Vachramiejeva
Jany roznyja pa składzie vady, kožnaje maje svoj koler: adno zusim prazrystaje, inšaje śvietła-błakitnaje, jašče adno — zialonaje… Heta tłumačycca tym, što aziory, choć i źviazanyja pratokami, kožnaje maje svoj skład vady i ŭzrovień minieralizacyi. Maksimalny ŭzrovień minieralizacyi ŭ voziery Kajminskim.
Fota: Alona Vachramiejeva
Prahułki pa ekałahičnych maršrutach
Dla tych, chto choča paznajomicca z pryrodaj Saračanskich azior bližej, raspracavanyja dva asnoŭnyja maršruty:
1. Piešachodny maršrut «Praleska» praciahłaściu siem kiłamietraŭ. Hety šlach prachodzić uzdoŭž voziera Kajminskaha i dazvalaje za niekalki hadzin atrymać asałodu ad pryhažości pryrody, ubačyć redkija vidy raślin i prosta adpačyć na śviežym pavietry.
Fota: Alona Vachramiejeva
2. Maršrut «Viecier Paazierja», jaki možna pieraadoleć za try dni ci navat za dva tydni. Hety maršrut padychodzić dla piešych prahułak, viełasipiednych pajezdak, aŭtamabilnych turaŭ i spłavaŭ na bajdarkach. Jon achoplivaje bolš šyrokija terytoryi i doryć niezabyŭnyja ŭražańni ad znajomstva z pryrodaj zakaźnika.
Fota: Alona Vachramiejeva
Vyhody dla turystaŭ
Dla zručnaści haściej u zakaźniku praduhledžanyja roznyja pasłuhi: arenda altanak, turystyčnyja stajanki, prakat łodak i vyratavalnyja kamizelki. Na bierahach azior abstalavanyja miescy dla adpačynku, dzie možna zładzić piknik, vykupacca ŭ kryštalova čystaj vadzie abo parybačyć.
Tut možna adčuć sapraŭdnuju adzinotu, atrymać asałodu ad cišyni i pryhažościu pryrody, zabycca pra haradskuju mituśniu i prosta adpačyć dušoj i ciełam.
Fota: Alona Vachramiejeva
Ekałahičnyja ściežki — nie prosta špacyry na śviežym pavietry. Heta sapraŭdnyja padarožžy ŭ śviet dziŭnych pryrodnych źjaŭ i ŭzrušvalnych piejzažaŭ, jakija idealna padychodziać dla tych, chto choča atrymać asałodu ad pryhažości biełaruskaj pryrody, daviedacca bolš pra miascovuju fłoru i faŭnu.
Čytajcie taksama:
Top malaŭničych miescaŭ dla letnich vandrovak pa Biełarusi, dalej ad haradskoj zaduchi
Biełarusy stali bolš chadzić pa bałotach
Biełaruskaja mabilnaja prahrama dla ekałahičnych padarožžaŭ trapiła ŭ top-3 u Google Play
