Stała viadoma, kolki biełarusaŭ asudzili za ŭchileńnie ad pryzyvu ŭ vojska
Sudździa Viarchoŭnaha suda Uładzimir Davydaŭ u intervju vydańniu «SB. Biełaruś siehodnia» zajaviŭ, što kolkaść hramadzian, jakija pryciahvajucca da adkaznaści za ŭchileńnie ad vajskovaha pryzyvu, u Biełarusi skaračajecca, i pryvioŭ adpaviednuju statystyku.
Pavodle słoŭ Uładzimira Davydava, kali ŭ 2016 hodzie pa art. 435 Kryminalnaha kodeksa (uchileńnie ad mierapryjemstvaŭ pa pryzyvu na vajskovuju słužbu) było asudžana 676 čałaviek, to ŭ 2023-m — tolki 266.
«Źmianšajecca i kolkaść čałaviek, na jakich nakładajucca administracyjnyja spahnańni za niajaŭku na mierapryjemstvy pa pryzyvu. Choć treba skazać, što hety pakazčyk da niadaŭniaha času zastavaŭsia značnym. Naprykład, u 2020 hodzie miery pryniatyja ŭ dačynieńni da 1 333 hramadzian, a ŭ 2018-m — 2 073», — adznačyŭ Davydaŭ.
Na jahonuju dumku, «źnižeńnie niehatyŭnych danych statystyki» siarod inšaha źviazana z tym, što «hramadzianie stali bolš śviadoma padychodzić da vykanańnia svajho vajskovaha abaviazku, udziełu ŭ mierapryjemstvach pryzyvu».
Akramia taho, «napeŭna, usio ž taki pracuje i adpaviednaje infarmacyjnaje zabieśpiačeńnie ŭsioj hetaj dziejnaści, nakiravanaje na papiaredžańnie złačynstvaŭ», — skazaŭ sudovy čynoŭnik.
Taksama sudździa adznačyŭ uzmacnieńnie strohaści zakanadaŭstva, jakoje tyčycca adkaznaści za ŭchileńnie ad pryzyvu. Tak, złačynstva pa artykule 435 Kryminalnaha kodeksa pierajšło z tych, jakija nie ŭjaŭlajuć vialikaj hramadskaj niebiaśpieki, u katehoryju mienš ciažkich, i maksimalnaja płanka pakarańnia padniałasia z dvuch hadoŭ pazbaŭleńnia voli da troch.
«Akramia taho, pavialičanyja sankcyi ŭ vyhladzie štrafu (ad 10 da 30 bazavych vieličyń) za niajaŭku na mierapryjemstvy pa pryzyvie i za parušeńnie hramadzianami abaviazkaŭ pa vajskovym uliku (da 25 bazavych vieličyń). I, jak nastupstva, nazvanyja administracyjnyja pravaparušeńni pierajšli z katehoryi praviny ŭ katehoryju značnych», — padkreśliŭ Uładzimir Davydaŭ.
Čytajcie taksama:
Hienprakuratura pryznała ekstremisckim sajt pasłuh pa lehalnym vyzvaleńni ad vajskovaj słužby
Dvanaccać navučencaŭ nie zdali pieršy CE, bo ich pryzvali ŭ armiju
U Minsku vajennaabaviazanych pryzyvajuć u terabaronu — ich adpraviać na parad
![Клас Клас](https://nashaniva.com/images/reactions/reaction-like.png)
![Панылы сорам Панылы сорам](https://nashaniva.com/images/reactions/reaction-facepalm.png)
![Ха-ха Ха-ха](https://nashaniva.com/images/reactions/reaction-smile.png)
![Ого Ого](https://nashaniva.com/images/reactions/reaction-omg.png)
![Сумна Сумна](https://nashaniva.com/images/reactions/reaction-sad.png)
![Абуральна Абуральна](https://nashaniva.com/images/reactions/reaction-anger.png)