Kaja Kałas, Ursuła fon der Lajen, Antoniju Košta. Uzhodnienyja kandydatury na klučavyja pasady ŭ jeŭrastrukturach
Pieramoŭcy ad hałoŭnych palityčnych siłaŭ Jeŭrasajuza zaklučyli pahadnieńnie ab raźmierkavańni najvyšejšych pasadaŭ u jeŭrastrukturach paśla niadaŭnich vybaraŭ u Jeŭraparłamient, paviedamlaje Euronews.
Fota: Benis Arapovic / vecteezy.com
Pavodle damoŭlenaści, na svajoj pasadzie na druhi termin na nastupnyja 5 hadoŭ zastaniecca kiraŭnica Jeŭrapiejskaj kamisii Ursuła fon der Lajen z Hiermanii.
Ursuła fon der Lajen. Fota: AP
Pasadu viarchoŭnaha pradstaŭnika Jeŭrasajuza pa zamiežnych spravach i palitycy biaśpieki zojmie ciapierašniaja premjer-ministarka Estonii Kaja Kałas. Jana zamienić na miescy hałoŭnaha dypłamata ES Žazepa Barela ź Ispanii.
Kaja Kałas. Fota: AP Photo/Harry Nakos
A novym staršynioj Jeŭrapiejskaj rady zamiest bielhijca Šarla Mišela stanie były premjer-ministr Partuhalii Antoniju Košta.
Antoniju Košta. Fota: AP Photo/Alastair Grant, File
Aficyjna kandydatury na hetyja pasady pavinny być zaćvierdžanyja na samicie ES, jaki adbudziecca 27 červienia.
Ursule fon der Lajen jašče spatrebicca padtrymka Jeŭraparłamienta, novy skład jakoha źbiarecca na ŭstanoŭčaje pasiadžeńnie ŭ siaredzinie lipienia.
Čytajcie taksama:
Novym hienieralnym sakratarom Rady Jeŭropy abrali byłoha prezidenta Šviejcaryi
