«Dva-try tydni maksimum — i vajna skončycca». Arastovič patłumačyŭ tyja svaje słovy
Były daradca Ofisa prezidenta Ukrainy Alaksiej Arastovič raskazaŭ, jak u pačatku vajny ŭdzielničaŭ u pieramovach, jakim bačyć pieramirje z Rasijaj i ci časta bačycca z žonkaj paśla adjezdu z Ukrainy.
Alaksiej Arastovič. Skryn videa: skazhigordeevoy / YouTube
«Jość mif, što ja supakojvaŭ»
U intervju na jutub-kanale «Skaži Hordiejevoj» Alaksiej Arastovič kaža, što ŭ pačatku vajny asnoŭnaj svajoj zadačaj ličyŭ padtrymku psichałahičnaha stanu hramadstva:
«Ja viedaŭ, što z pačatkam vajny ludzi vielmi mocna «prasiaduć», bo heta kałasalny ŭdar pa psichicy. Maja zadača była, kab my nie prajhrali.
Jość mif, što ja supakojvaŭ. Ale heta pabočnaje ŭździejańnie. Ja nie supakojvaŭ, ja nastrojvaŭ na pieramohu. Kali ŭvažliva pahladzieć, što ja havaru, heta dakładny nastroj na pieramohu. Farmavańnie namieraŭ. Nie moža być inšaj budučyni, dzie my nie pieramahajem».
«Tady treba było farmiravać hety namier, tamu što ŭsio litaralna sypałasia», — adznačaje Arastovič i raskazvaje, što 25 lutaha na sutki źjechaŭ z Kijeva («treba było vyrašyć niekatoryja dziaržaŭnyja zadačy»), a kali jechaŭ nazad, to bačyŭ svabodnuju darohu na ŭschod i zabityja darohi na zachad.
«Maja mašyna była adzinaj, jakaja išła z zachadu nazad na Kijeŭ. Ja pamiataju całkam zabityja darohi ŭ toj bok. Ludzi źbiahali. Heta było masavaje abrušeńnie. Ja jechaŭ i paralelna davaŭ intervju, što my pieramožam».
Čamu abiacaŭ, što «dva-try tydni — i vajna skončycca»
Na pačatku vajny Arastovič śćviardžaŭ: «Dva-try tydni maksimum — i vajna skončycca». Jon tłumačyć tyja słovy:
«Dva-try tydni byli absalutna apraŭdanymi. Ja byŭ členam stambulskaj pieramoŭnaj hrupy. I viedaŭ terminy pieramovaŭ i damovy ab spynieńni ahniu».
Na zaŭvahu, što jaho nie vidać na videa ź pieramovaŭ, były palityk kaža: «Mianie rasijanie «źbili» — paprasili biełarusaŭ zavieści kryminalnuju spravu paśla taho, jak ja zaklikaŭ uzryvać čyhunku ŭ Biełarusi. I takim čynam mianie adchilili. (…) Ale ja ŭsio roŭna zastaŭsia. Ja siadzieŭ za kadram, viedaŭ ab płanavanaj sustrečy Zialenskaha z Pucinym i mierkavanym spynieńni ahniu — 9 krasavika. Tamu zastavałasia dva-try tydni.
Ja ŭžyŭ termin «dva-try tydni», bo bačyŭ pa vajennaj dynamicy, što rasijanie adyduć ad Kijeva. Ja nie havaryŭ, što pieramožam voś paślazaŭtra, a što ŭvohule pieramožam u hetaj vajnie. Toje, što my zastaniemsia isnavać navat u abrezanym varyjancie, ličycie, što my ŭžo pieramahli. Nadta vialikaja roźnica pamiž nami i Rasijaj. U dziasiatki razoŭ pa vajennaj mahutnaści. I nam prosta nie prajhrać aznačaje pieramahčy».
«Pucin jašče ŭ sakaviku 2022 hoda zrazumieŭ, što vajna — heta pamyłka»
Arastovič śćviardžaje, što Pucin jašče ŭ sakaviku 2022 hoda razumieŭ, što vajna — heta kałasalnaja pamyłka.
«Ja bačyŭ, jak išła pierahavornaja hrupa. Buča ŭžo była. 9 krasavika Pucin daje kamandu praz Abramoviča praciahnuć pieramovy.
I heta paśla taho, jak Łaŭroŭ zrabiŭ niekalki niepryjemnych zajavaŭ, što ŭkrainski bok niekanstruktyŭny. Pucin usio chacieŭ prymirycca. Apošniaje ŭzajemadziejańnie pa Stambulskaj hrupie — 17 maja, praz paŭtara miesiaca paśla Bučy. Jon usio chacieŭ mirycca.
26 krasavika byŭ «Ramštajn» (kantaktnaja hrupa pa abaronie Ukrainy. — NN). Jany vydatna razumieli, što ŭsio nie pajechała, što płan uvarvańnia parušany».
Jakim bačyć pieramirje
Alaksiej Arastovič ličyć, što prapanova ab pieramirji pavinna sychodzić ad rasijskaha boku. Ale dla pačatku pieramovaŭ nieabchodna pasiarednictva takich dziaržaŭ, jak Francyja, Kitaj, ZŠA, z harantyjami.
Pa słovach palityka, prezident Francyi Makron prapanavaŭ pieramirje na čas Alimpijskich hulniaŭ. Ale pytańnie ŭ tym, jak da hetaha staviacca ZŠA i Kitaj, Pucin i Zialenski. Pakul heta nieviadoma.
Kali b Rasija prapanavała spynić ahoń, ličyć Arastovič, to pastaviła b Ukrainu ŭ biazvychadnaje stanovišča — prapanovu treba było b pryniać.
«Inakš nas rezka asudzić usia suśvietnaja supolnaść: voś vam dali šanc spynić vajnu, ale vy heta nie zrabili.
Kali Zialenski prapanoŭvaje, to Pucin taksama moh by na heta pajści. Ale Zialenski nie prapanuje. Jon vyrazna naležyć da partyi vajny. Jon vybudavaŭ asabistuju palityčnuju značnaść na partyi vajny, na miažy 1991 hoda. Chacia ciapier źjavilisia ahavorki typu «ŭsio skončycca pieramovami».
Jak raspracoŭvaŭ Duhina
Alaksiej Arastovič raniej pracavaŭ u raźviedcy. Jon zhadvaje, što ŭ 2005 hodzie prymaŭ udzieł u Jeŭrazijskim źjeździe moładzi — ultrapravaj arhanizacyi, jakaja źjaŭlajecca moładzievaj častkaj Mižnarodnaha jeŭrazijskaha ruchu Alaksandra Duhina. Razam ź fiłosafam jon pryniaŭ udzieł u pres-kanfierencyi.
«Ja raspracoŭvaŭ Duhina. (…) U mianie była zadača zrabić pieršasnuju acenku piersanaža. Ja dumaju, jak jaho aceńvać. Pačaŭ hladzieć na suviazi, bo sistema suviaziej vyznačaje, što heta za čałaviek («haradzić» jon moža ŭsio, što zaŭhodna). I pa joj było vidać, što jon nievypadkovaja fihura».
Pa słovach Arastoviča, kali paśla sustrečy z Duhinym u 2005 hodzie jon prynios dakładnuju, to jaho ŭłasnaje ŭpraŭleńnie biaśpieki napisała, što zaviadzie na jaho kryminalnuju spravu za toje, što jon imkniecca pasvaryć dva brackija narody.
«Heta nie było rašeńniem tahačasnaha kamandavańnia HUR i palityčnym rašeńniem. Heta było rašeńniem, skažam tak, hrupy patryjotaŭ Ukrainy, jakija razumieli hetu niebiaśpieku», — havoryć mužčyna i zaŭvažaje, što paśla hetaha jon syšoŭ z HUR. Pryčynaj stała jaho «zališniaja inicyjatyva».
Jak zhadvaje Arastovič, u svajoj spravazdačy jon napisaŭ, što vajna z Rasijaj niepaźbiežna. I da jaje nieabchodna maksimalna chutka rychtavacca. Asnoŭnaja zadača HUR — praduchilać źniešniuju ahresiju. «Ale ŭ toj čas byŭ Juščanka, jaki maksimalna chutka raspradavaŭ armiju, usio skaračaŭ, prybiraŭ. I ja mieŭ śmiełaść pakrytykavać prezidenta. (…) Niejki kapitan krytykuje prezidenta, padstaŭlaje kiraŭnictva, hienierałaŭ. Jany spužalisia».
Što ŭ adnosinach z žonkaj
Alaksiej Arastovič ciapier žyvie nie va Ukrainie. Žonka da jaho pryjazdžaje raz na miesiac. I jon vieryć u toje, što isnuje šlub na adlehłaści.
«My sazvońvajemsia kožny dzień, hadzinami razmaŭlajem, abmiarkoŭvajem usie padrabiaznaści», — kaža mužčyna i dadaje, što spadziajecca, što takija adnosiny nienadoŭha, usio skončycca «ŭ razumnyja terminy».
Čytajcie taksama:
Arastovič źbirajecca ŭ prezidenty Ukrainy. Krym i Danbas jon prapanoŭvaje časova pakinuć Rasii
Arastovič nazvaŭ najbolš vierahodny scenar pieramien u Biełarusi i toje, što da hetaha viadzie
Alaksiej Arastovič pryjšoŭ na strym z zaleplenym vokam FOTAFAKT
Ale Miša "Praŭda Hajdukieviča" Padalak naŭradci pojdzie padobnym šlacham, bo jon značna bolš prymityŭny.