Čamu biełaruskija ŭłady aścierahajucca zakryćcia miažy z Polščaj?
Polšča papiaredziła, što razhladaje mahčymaść zakryć reštu pierachodaŭ na miažy ź Biełaruśsiu. Aficyjny Minsk adreahavaŭ — z zajavaŭ vynikaje, što biełaruskija ŭłady nie zacikaŭleny ŭ poŭnaj błakadzie miažy. Voś čamu.
Ciapier na miažy z Polščaj pracuje adzin lehkavy i adzin hruzavy punkty propusku. Ilustracyjny zdymak. Fota: AP Photo / Michal Dyjuk
Ad prapanovy adkryć «Babroŭniki» da dumak pra poŭnaje zakryćcio miažy adzin krok
Za apošnija miesiacy rytoryka polskaha boku datyčna miažy ź Biełaruśsiu źmianiłasia na 180 hradusaŭ. Miesiac tamu polski premjer Donald Tusk zajaŭlaŭ, što Polšča moža adnavić pracu pamiežnaha punkta «Babroŭniki» («Bierastavica»).
«U najbližejšy čas razhledzim mahčymaść adkryćcia pamiežnaha pierachodu «Babroŭniki» dla pasažyrapatoku. Ja całkam padtrymlivaju heta!» — havaryŭ Tusk 25 maja.
Nie prajšło i miesiaca, jak 22 červienia ministr zamiežnych spraŭ Polščy Radasłaŭ Sikorski zajaviŭ, što Polšča razhladaje mahčymaść zakryć reštu pierachodaŭ na miažy ź Biełaruśsiu.
Na radykalnuju źmienu pazicyi vidavočna paŭpłyvaŭ toj fakt, što praź niekalki dzion paśla prapanovy adnavić pracu «Babroŭnikaŭ» polskija pamiežniki atrymali traŭmy, sprabujučy spynić sproby hrupy mihrantaŭ prarvacca praź miažu.
Adzin polski sałdat, paranieny mihrantam na biełaruskaj miažy, paźniej pamior.
Pa słovach ministra zamiežnych spraŭ Polščy, na zaklik znajści i vydać zabojcu pamiežnika Biełaruś adkazała abvinavačvańniami. Adnak paśla taho, jak Polšča pryhraziła całkam zakryć ruch praź miažu, rytoryka Minska źmianiłasia.
Paśla śmierci polskaha sałdata na miažy pazicyja ŭładaŭ Polščy źmianiłasia. Ilustracyjnaje fota: twitter.com/Straz_Graniczna
Čamu dla ŭładaŭ heta balučaje pytańnie
Zajava ministra zamiežnych spraŭ Biełarusi Siarhieja Alejnika śviedčyć pra toje, što režym nie choča davodzić situacyju da poŭnaha zakryćcia miažy.
Biełaruskija ŭłady, vyhladaje, nie chočuć poŭnaha zakryćcia miažy z Polščaj. Ilustracyjny zdymak. Fota: «Naša Niva»
«U hetych umovach adziny šlach deeskałacyi — heta šlach da dyjałohu. Kali Polšča da hetaha hatovaja, chacia b pa pytańniach pryhraničnaha supracoŭnictva, jakoje zhornuta pa inicyjatyvie polskaha boku i inšych jeŭrapiejskich partnioraŭ, to my hatovyja hetyja temy abmiarkoŭvać. Ale, biezumoŭna, na raŭnapraŭnaj i ŭzajemapavažlivaj asnovie», — kazaŭ Alejnik.
Choć nie abyšłosia i biez paprokaŭ u polski bok.
Z reakcyi aficyjnaha Minska možna zrazumieć, što dla ŭładaŭ pytańnie zakryćcia miažy z Polščaj balučaje.
Reč u tym, što mienavita «Kazłovičy» źjaŭlajucca asnoŭnymi varotami dla dastaŭki hruzaŭ u abodva baki.
Dva litoŭskija i adzin łatvijskija punkty propusku razam uziatyja prapuskajuć praz sabie našmat mienš hruzavikoŭ, čym adzin polski.
«Kazłovičy» — asnoŭnyja varoty dla dastaŭki hruzaŭ u abodva baki. Fota: t.me/gpkgovby
Tak, naprykład, pa stanie na 24 červienia, praz «Kazłovičy» prajechała 773 fury ŭ adzin bok.
U toj ža čas praz «Bieniakoni» — 98, «Kamienny Łoh» — 49, «Hryharaŭščynu» — 63. Razam — 210 vielikahruzaŭ. Heta ŭ 3,7 raza mienš, čym praz adziny dziejny hruzavy punkt propusku na biełaruska-polskaj miažy.
Tamu, kali Polšča vyrašyć jaho zakryć, i biez taho składanaja situacyja z dastaŭkaj hruzaŭ moža zajmieć katastrafičnyja maštaby.
U takim vypadku hruzavikam daviadziecca pravodzić u čerhach užo nie tydni, a miesiacy. Heta, u svaju čarhu, mocna adabjecca na košcie dastaŭki, jak heta ŭžo adbyvałasia paśla zakryćcia inšych punktaŭ propusku.
Ekanomika patrabuje adkrytych miežaŭ
Ekśpiert BEROC Anastasija Łuzhina adznačaje, što poŭnaje zakryćcio ruchu hruzaŭ i pasažyraŭ praź biełaruska-polskuju miažu budzie adčuvalnym dla našaj ekanomiki.
«Niahledziačy na toje, što Biełaruś užo straciła raniejšyja pazicyi jak tranzitnaja kraina, hruzy iduć jak ź Jeŭropy, tak i ŭ Jeŭropu. Mahčymaje zakryćcio ŭsich punktaŭ propusku na miažy z Polščaj adabjecca na abjomach handlu, pakolki na pakinutych punktach propusku budzie kałaps», — ličyć ekanamist.
Poŭnaje zakryćcio polska-biełaruskaj miažy moža ŭdaryć i pa pradpryjemstvach. Ilustracyjny zdymak. Fota: «Naša Niva»
Taksama mohuć paciarpieć pradpryjemstvy, jakim nieabchodnyja roznyja kampanienty, syravina, abstalavańnie, jakija pastaŭlajucca ź Jeŭropy. Heta moža pryvieści nie tolki da padaražeńnia kančatkovaha praduktu, ale i da źnižeńnia jaho jakaści, a niedzie, mahčyma, i skaračeńnia vytvorčaści.
«Praz adsutnaść fizičnaj mahčymaści pryniać i adpravić hruzy pradpryjemstvam, jakija jašče pracujuć ź Jeŭropaj, daviadziecca pieraaryjentavacca na Rasiju i krainy Azii», — adznačaje ekanamist.
Taksama ad zakryćcia miežaŭ mocna pacierpić transpartny siektar — jak hruzavy, tak i pasažyrski. Aŭtobusy i maršrutki ŭ Jeŭropu buduć vymušanyja skaračać kolkaść pajezdak.
Situacyja zakranie i tak zvany pamiežny biznes, jaki ŭ Breście ŭsio jašče dosyć aktyŭny.
Kitaj suprać eskałacyi
Siarod inšaha, treba razumieć, što poŭnaje zakryćcio biełaruska-polskaj miažy nie adpaviadaje intaresam trecich krain. U tym liku takoha bujnoha hulca, jak Kitaj.
Prezident Polščy Andžej Duda niadaŭna sustrakaŭsia z kiraŭnikom Kitaja Si Czińpinam i zhadvaŭ tam Biełaruś. Fota: AP Photo / Tatan Syuflana
U MZS Kitaja adznačyli, što spadziajucca na deeskałacyju kanfliktu.
Andžej Duda na niadaŭniaj sustrečy ź Si Czińpinam zakranuŭ temu kryzisu na miažy ź Biełaruśsiu.
«Kitaj spadziajecca, što abodva baki buduć stavicca adzin da adnaho z pavahaj i buduć vyrašać prablemu šlacham kansultacyj, kab paźbiehnuć eskałacyi napružanaści», — adznačyli ŭ kitajskim MZS.
Padobnyja sihnały dajuć nadzieju, što biełaruski bok budzie spryjać tamu, kab mihrancki kryzis, arhanizavany režymam jašče ŭ 2021 hodzie, pajšoŭ na spad.
Čytajcie taksama:
Polšča razhladaje mahčymaść zakryć reštu pierachodaŭ na miažy ź Biełaruśsiu
Kitaj spadziajecca, što Biełaruś i Polšča vyrašać kanflikt biez zakryćcia miažy
Paśla kansultacyj z Łaŭrovym Alejnik prakamientavaŭ mahčymaje zakryćcio pierachodaŭ z Polščaj
