Dzieci pravodziać dni ŭ čarzie pa apastyl na atestat
Kab paćvierdzić jurydyčnuju siłu atestata, učorašnija školniki pryjazdžajuć z rehijonaŭ i sielacca ŭ staličnych chostełach za 30 rubloŭ za sutki, piša Tochka.by
Adzinaccacikłaśniki atrymali atestaty 14 červienia, šeść dzion tamu. Zdavałasia b, školniki vydychnuli, bo ŭsie CE i CT užo minuli. Ale nie ŭsio tak prosta.
Vypuskniki, jakija vyrašyli pastupać nie ŭ biełaruskija VNU, a pasprabavać svaje siły za miažoj, pavinny prajści praz dadatkovuju praceduru — lehalizacyju ŭłasnaha dakumienta ab adukacyi.
Kali abranaja kraina, dzie płanujecca navučańnie, uvachodzić u Haahskuju kanviencyju, na atestat prastaŭlajuć apastyl. Zajmajucca hetym u Departamiencie kantrolu jakaści adukacyi Minadukacyi.
Mienavita pad jaho budynkam užo niekalki červieńskich dzion staić doŭhaja čarha z achvotnych lehalizavać dakumient ab adukacyi.
Žurnalisty pahavaryli ź biełarusami, jakija sprabavali padać dakumienty na apastyl.
Jak pastavić apastyl
Situacyja ź lehalizacyjaj atestataŭ chutka mianiajecca, niuansy i asablivaści pracedury karektujucca litaralna na vačach.
Tak, pieršapačatkova ŭsie achvotnyja zapisvalisia ŭ nieaficyjnuju čarhu. Śpis viali ŭ sšytku, dzie kožnamu prysvojvali paradkavy numar, u adpaviednaści ź jakim ludzi i padavalisia na apastyl.
Niuansy abmiarkoŭvali ŭ stvoranych čatach u miesiendžarach. Praŭda, infarmacyja pra ich nie zanadta razyšłasia. Tamu niekatoryja ŭ piatnicu, 14 červienia, adstojvali žyvuju čarhu biez papiaredniaha zapisu; a daviedaŭšysia, što jość niejki paradak, mocna niervavalisia.
Užo ŭ aŭtorak, 18 červienia, Minadukacyi abviaściła pra źmienu praviłaŭ prastaŭleńnia apastylu z 1 lipienia. Tak, płanavali ŭvieści papiaredni zapis u samim Departamiencie, a taksama prymać dakumienty i vydavać užo aformlenyja na praciahu adnaho pracoŭnaha dnia.
Adnak da źmieny praviłaŭ u padparadkavanym Ministerstvu viedamstvie prystupili ŭžo na nastupnyja sutki.
Tak, pryjom dakumientaŭ na apastyl z 20 červienia budzie prachodzić vyklučna pa papiarednim zapisie, jaki viadzie sam Departamient.
Takim čynam, u sieradu, 19 červienia, čerhaŭ u biełarusaŭ stała dźvie: «pa sšytku» dla padačy dakumientaŭ i «za tałonam» z ukazańniem daty, kali možna prynieści atestat na lehalizacyju.
Źniała chosteł dziela apastyla
Michaił (imia źmieniena pa prośbie hieroja) pryjechaŭ z Bresta. Hieroj pryciahnuŭ našu ŭvahu čornym bliskučym čamadanam na kołcach: chłopiec tolki ź ciahnika. Ab čacie ŭ miesiendžary zahadzia nie viedaŭ. Spasyłku na jaho atrymaŭ vypadkova ad svajakoŭ u dzień pajezdki.
Tamu navina pra dźvie čarhi Michaiła nie źbiantežyła: adrazu staŭ za tałonam.
«Adbyvajecca tak: toj, chto byŭ zapisany ŭ sšytak, padaje dakumienty siońnia, a tyja, chto krychu dalej [u pieraliku. — Tochka.by], ciapier stajać u čarzie, kab atrymać tałon», — rastłumačyŭ chłopiec.
U čarzie «ad Departamienta» Michaił byŭ prykładna paŭtary hadziny. Na momant razmovy chłopiec byŭ bližej da ŭvachodu ŭ budynak, čym da kanca «šarenhi».
Jak paźniej rastłumačyli ŭ čacie, tałony vydavali z raźliku prykładna 80-90 čałaviek na padaču ŭ adzin dzień. Chto išoŭ paźniej hetaj adznaki, atrymlivaŭ zapis na nastupnyja daty.
Tak, u 15:20 pakazvali, što tałony vydavali na 26 červienia.
Dni čakańnia apastyl Michaił praviadzie ŭ haściach u svajakoŭ.
U Hanny situacyja bolš składanaja. Padčas našaj hutarki jana sprabavała padać dakumienty na lehalizacyju ŭžo treci dzień. Dziela jurydyčnaj pracedury dziaŭčyna pryjechała z Hrodna. Žyvie ŭ staličnym chostele, za sutki płacić Br30.
«Svajaki zapisali mianie [u sšytak. — Tochka.by] na padaču jašče na minułym tydni. I ja była aptymistyčna nastrojena, dumała, što prymuć chutka. Spadziavałasia, što padamsia ŭ paniadziełak, ale nie vyjšła», — pryznałasia Hanna.
Nie atrymałasia addać dakumienty i ŭ aŭtorak, 18 červienia. U sieradu — treciaja sproba, na jakuju dziaŭčyna ŭskładała vialikija nadziei.
Termin razhladu atestataŭ
Volha z dačkoj da 11 ranicy paśpieli prastajać u dvuch čerhach: na vypadak, kali nie paśpiejuć padacca ŭ «sšytkavych», uziali tałon u «aficyjnaj».
«Znajomyja pryjšli padavacca raniej za vosiem. Paprasili ich zaniać nam čarhu, a sami pryjšli da dzieviaci. Tamu tałon uziali za paŭhadziny. Dumaju, tyja, chto paźniej pryjechaŭ, prastajać daŭžej», — padzialiłasia svaimi nazirańniami Volha.
Siarod płanaŭ u mamy z dačkoj — zamiežny adpačynak, tamu zajmacca apastyl treba mienavita ciapier.
U čarzie ź fizičnych asob znajšlisia i jurydyčnyja asoby —pradstaŭniki biuro pierakładaŭ. Pa davieranaści jany padajuć na apastyl papiery svaich klijentaŭ.
«[Čarha. — Tochka.by] heta štohadovaja situacyja, bo dla padačy dakumientaŭ jość abmiežavańni pa časie. Hatovyja lehalizavanyja papiery treba padać u termin», — raspaviała pradstaŭnica biuro.
Pavodle jaje słoŭ, lehalizacyjaj atestataŭ i dypłomaŭ zvyčajna zajmajucca až da pačatku žniŭnia.
Pa aficyjnych dadzienych, termin prastaŭleńnia apastyla składaje adzin dzień. Adnak niekatoryja ŭdzielniki čata śćviardžali, što atestaty, padadzienyja jurasobami, śpiecyjalisty departamienta mohuć razhladać da 15 dzion.
Čytajcie taksama:
Minadukacyi z 1 lipienia mianiaje hrafik pryjomu dakumientaŭ na apastyl — RASKŁAD
Minadukacyi adreahavała na zvaroty hramadzian nakont apastylu
