Pamiatajecie «paśpiachovuju miljanierku» Zareckuju? Vyhladaje, što jaje kampanija — usio
Jak možna zrazumieć z publičnych estonskich rejestraŭ, jaje kampanija LaavaTech dažyvaje svaje apošnija časy, skaraciŭšysia da adnaho-dvuch supracoŭnikaŭ.
Taćciana Zareckaja. Skrynšot ź jutub-kanała «Žyćcio-malina»
U 2022-m u biełaruskaje miedyjapole ŭvarvałasia pradprymalnica Taćciana Zareckaja, jakaja razdała šerah intervju, u jakich pazicyjanavała siabie paśpiachovaj biznes-vumien i miljanierkaj.
Dziaŭčyna prapanoŭvała svaju dapamohu Ofisu Cichanoŭskaj, i ŭ vyniku była zaprošanaja ŭ Kabiniet pradstaŭnikoŭ ministram finansaŭ. U chutkim časie ŭskryłasia, što biznes Zareckaj nie vyrablaje realnych tavaraŭ, a ŭsiaho tolki zasvojvaje jeŭrapiejski hrant. A pasada, najchutčej, była patrebna dla salidnaści.
Čytajcie: Paśpiachovaja startapierka ci baranesa Miunchhaŭzien? Jak Taćciana Zareckaja trapiła ŭ Abjadnany kabiniet i čamu jana jaho pakinuła
Zareckaja była vymušana pakinuć Kabiniet pradstaŭnikoŭ Cichanoŭskaj pa ŭłasnym žadańni napiaredadni publikacyj kampramietujučaj jaje infarmacyi, a dla hramadstva historyju sychodu jana abstaviła tak, nibyta nie vytrymała «tysiač pahroz» praz svaju palityčnuju dziejnaść.
Što ciapier adbyvajecca ź biznesam Zareckaj? Apošni tranš jeŭrapiejskaha hranta na 2 387 109 jeŭra Laava Tech musiła atrymać da 31 studzienia 2023 hoda.
Značyć, užo bolš za hod kampanija pavinna žyć na ŭłasnyja srodki. Ci atrymlivajecca? Nie.
Vyhladaje, što historyja pryjšła da svajho łahičnaha zaviaršeńnia. Heta vidać z adkrytych estonskich rejestraŭ jurydyčnych asobaŭ.
Skrynšot inforegister.ee
Pavodle infarmacyi inforegister.ee i ariregister.rik.ee, ź pieršaha kvartała 2023 hoda i biez taho małalikaja Laava Tech pačała imkliva skaračacca.
Apošnija prykmiety finansavaha žyćcia kampanija Laava Tech padavała ŭ druhim kvartale 2023 hoda.
Skrynšot inforegister.ee
Nie paźniej za 30 červienia 2024 Laava Tech pavinna była padać finansavuju spravazdačnaść za 2023 u estonskija orhany, ale nie zrabiła hetaha, praterminavaŭšy zdaču.
Infarmacyja pra ścipły abarot na čałavieka (26 jeŭra ŭ pieršym kvartale 2024) i kolkaść supracoŭnikaŭ (2 čałavieki ŭ 2023 i 1 čałaviek u 2024) — heta acenačnyja ličby, jakija hruntujucca na ličbach naličanych padatkaŭ, jakija prachodziać praź inšaje viedamstva.
Dakładnyja danyja źjaviacca ŭ rejestry tady, kali kampanija zdaść praterminavanuju finansavuju spravazdaču.
Ź jaje taksama stanie jasna, na što pajšli hrošy z apošnich hrantavych tranšaŭ.
U raniejšyja hady asnoŭnyja vydatki išli na zarobki piersanału, častka ź jakoha — blizkija svajaki Zareckaj. U 2022 na zarobki pajšło 614 tysiač jeŭra, u 2021 — 324 tysiačy jeŭra.
Darečy, u 2022 hodzie kampanija Laava Tech pakazała čystyja straty ad dziejnaści pamieram 106 020 jeŭra.
Na staroncy Jeŭrakamisii z detalami hranta jašče nie źjaviłasia poŭnaj spravazdačnaści pa prajekcie, ale jość ścisłaja.
U joj Zareckaja dała spravazdaču pra «stvareńnie 80 zialonych pracoŭnych miescaŭ i socień inšych pa miery rostu abjektaŭ našych klijentaŭ, što dapamahło zapuścić ekanamičnaje post-kavidnaje adnaŭleńnie ŭ niekatorych najbolš paciarpiełych haradskich rajonach». Nijakich detalaŭ nie pryvodzicca, u prafiesijnaj sietcy Linkedin z hetych «80 supracoŭnikaŭ» tolki niekalki čałaviek (uklučna z samoj Zareckaj) paznačyli miescam svajoj pracy Laava Tech.
U kampanii taksama źmianiŭsia skład ułaśnikaŭ: ź liku zasnavalnikaŭ źnikli baćka Zareckaj, Aleh Zarecki, jahony siabar Siarhiej Radyjonaŭ, a taksama muž Zareckaj, fin Jusi Macijas Pikarajnien. Ciapier akcyi Laava Tech raźmierkavanyja tak: 90% u samoj Zareckaj i jašče 10% u Jany Saŭčuhovaj.
A Taćciana Zareckaja, miarkujučy pa jaje instahramie, u kamandziroŭkach sprabuje znajści hrošy na svoj novy startap. Jon budzie źviazany ź likvidacyjaj škodnych vykidaŭ u pavietra.
