«Mih-19 zabrali ŭ bamžoŭ za dźvie skryni harełki». Što ciapier z muziejem avijatechniki, što byŭ u Baravoj
U 2009 hodzie ŭ vioscy Baravaja adkryŭsia pieršy ŭ Biełarusi muziej avijacyjnaj techniki. Žychary Minskaha rajona nie raz chadzili tudy na ekskursii až da vosieni 2023 hoda, kali muziej pierastaŭ pracavać z-za pierajezdu. «Prystaličča» daviedałasia, što ciapier ź im.
Usie fota: «Prystaličča» i archiŭ surazmoŭcy
Muziej avijatechniki, pieršy i adziny ŭ krainie, zjaviŭsia ŭ kancy 90-ch namahańniami načalnika Minskaha aerakłuba DTSAAF Mikałaja Mačanskaha.
— Ideja naradziłasia ŭ 1998 hodzie, kali ja pryjšoŭ u Minski aerakłub. U toj čas vielmi aktyŭna pravodziłasia skaračeńnie avijacyjnaj techniki, na heta było žudasna hladzieć. Ja źviartaŭsia ŭ mnohija struktury, kab usio ž zachavać choć niešta, ale ŭsiudy atrymlivaŭ admovu, — raskazvaje Mikałaj Piatrovič. — Tady vyrašyŭ źbirać avijacyjnuju techniku na aeradromie ŭ Baravoj, kab jaje nie źniščyli. A dalej čas pakaža…
Tak lotčyk pačaŭ zvozić nikomu nie patrebnuju avijacyjnuju techniku ŭ Minski aerakłub. Pieršy dazvoł na pieravozku čatyroch bartoŭ byŭ dadzieny pastanovaj Savieta Ministraŭ u studzieni 2001-ha. Tady novy dom atrymali Su-17, Jak-28, MiH-25 i viertalot Mi-8.
Samaloty, viertaloty Mikałaj Mačanski źbiraŭ na avijacyjnych bazach, u pijanierskich łahierach, navučalnych avijacyjnych centrach, nie tolki biełaruskich.
Kali ŭ 2009 hodzie ŭ muziei było 25 samalotaŭ, to ŭ sioletnim naviedvalnikam budzie pradstaŭlena ŭžo 47 ekspanataŭ.
— Adzin samalot z Bresta. Raniej u im było kafe, potym muziej, potym jon uvohule hareŭ — i stajaŭ, dahnivaŭ. Miascovyja žychary aburalisia, što ja chaču jaho zabrać, mitynhi navat ładzili, pisali zapiski i lapili ich na samalot. Ja im adkazvaŭ: my adramantujem, adrestaŭrujem, potym vierniem. Nielha było jaho ŭ takim stanie trymać, prosta kuča mietału! — uspaminaje lotčyk-instruktar 1-ha kłasa avijacyi DTSAAF. — A voś samalot MiH-19 zabirali ŭ Minskaj vobłaści ŭ bamžoŭ. U im žyli piać čałaviek. Zhandlavalisia za dźvie skryni harełki vosieńniu i dźvie skryni vina viasnoj.
Mih-21 Mikałaj Mačanski, jaki adsłužyŭ u Afhanistanie, zabraŭ u dyrektara kałhasa Mikałaja Danileviča. Try hady išli pieramovy. Uzamien akazali sadziejničańnie ŭ pastaŭcy ekśpierymientalnaha sielhaskambajna.
Ciapier muziej avijacyjnaj techniki pierajechaŭ na aeradrom Lipki. Tam idzie budaŭnictva novych paviljonaŭ, kafe, akulturvajecca prylehłaja terytoryja.
Tam ustalujuć altanki, uładkujuć viarovačny haradok, skaładrom, cir, pałasu pieraškod, valejbolnuju placoŭku, łaziertah. Abnoŭleny muziej pačnie pracavać hetaj vosieńniu.
Čytajcie taksama:
Biełaruś pradstaviła viertalot — «zabojcu» marskich dronaŭ, jaho źbirajucca pradavać Rasii
U viciebskim Letnim amfiteatry sabrali piacitysiačnuju masoŭku, a paśla jaje evakujavali
