Brytanskaja śpiavačka vypuściła liniejku adzieńnia, kab abaraniacca ad 5G. Tam jość i šapačka z folhi
Raskazvajem, što heta za daśpiechi rycara ŭ epochu sučasnych technałahičnych vojnaŭ i kolki jany kaštujuć.
Śpiavačka M.I.A. u panamie z folhi — miedna-nikielevaj ekranizujučaj tkaniny. Fota: instahram vytvorcy OHMNI
Brytanskaja śpiavačka M.I.A., jakaja vystupała suprać vakcynacyi padčas pandemii i vykazvałasia ab suviazi pamiž 5G i COVID-19, praciahvaje prytrymlivacca kanśpirałahičnych teoryj ab niehatyŭnym upłyvie sučasnych technałohij. Zhodna ź imi, suviaź 5G, jak i inšyja vidy suviazi (naprykład, Bluetooth), niebiaśpiečnaja dla zdaroŭja, bo moža vyklikać roznyja ciažkija zachvorvańni.
Śpiavačka M.I.A. u lehinsach i ponča, jakija, jak śćviardžajecca, abaraniajuć ad 5G. Fota: sajt vytvorcy OHMNI
Niekalki dzion tamu śpiavačka abviaściła ab vypusku liniejki adzieńnia, jakoje rekłamujecca jak «daśpiechi sučasnaha rycara ŭ epochu sučasnych technałahičnych vojnaŭ».
Jak paviedamlajecca na sajcie jaje brenda OHMNI, hetaje adzieńnie — «apošni rubiež u zachavańni vašaj kanfidencyjnaści, aŭtanomii i pravoŭ na cieła i vašy danyja» ŭ «epochu razumnych haradoŭ, ličbavaj kryptavaluty, štučnaha intelektu, NeuraLink, ludziej, jakich mohuć uzłamać chakiery, nulavoj kanfidencyjnaści, DeepMind, zboru danych unutry cieła i biespryncypnaha sačeńnia».
Košt adzieńnia, jakoje «na 99,99% abaraniaje ad 5G-vypramieńvańnia», składaje ad 50 da 400 dołaraŭ. Naprykład, za 50 dalaraŭ možna nabyć sumačku dla telefona ci trusy-baksiory, jakija, jak śćviardžaje vytvorca, pašytyja z tkaniny, jakaja na 80% składajecca sa srebra.
Trusy-baksiory. Fota: sajt vytvorcy OHMNI
Za 100 dalaraŭ prapanujecca nabyć panamu, jakaja z adnaho boku vykanana z čornaj bavoŭny, a z druhoha — ź miedna-nikielevaj ekranizujučaj tkaniny. «Panama z folhi — mienavita toje, čaho vy čakali», — zajaŭlena na sajcie vytvorcy.
Panama. Fota: sajt vytvorcy OHMNI
Ponča i lehinsy kaštujuć pa 200 dalaraŭ. A 400 dalaraŭ daviadziecca zapłacić za sukienku ci puchavik, jaki maje «patajnuju kišeniu-kletku Faradeja, jakaja dazvalaje adklučyć vašy pryłady ad Wi-Fi i pieradačy danych, umomant stać nieadsočvanym i nie paddacca ŭzłomu».
Puchavik i sukienka. Fota: sajt vytvorcy OHMNI
«Kali prychilniki teoryi zmovy pamylajucca — vy ŭsio roŭna budziecie ŭ plusie, u vas budzie vydatnaje adzieńnie, zroblenaje z čystaha srebra i kaštoŭnych mietałaŭ. Ale kali jany majuć racyju, vy možacie vyratavać budučaje čałaviectva.
Vitajem u OHMNI. Ja mahu być hienijem, ja mahu być machlarkaj», — napisała śpiavačka.
Čytajcie taksama:
Tunel pad sinahohaj u Ńju-Jorku abudziŭ najhoršyja teoryi zmovy
Prapahandysty znoŭ źviarnulisia da kanśpirałohii. Kozyr z «Płanam Dalesa» dastaŭ Kirył Kazakoŭ
