U Hruzii kiroŭnaja partyja ŭniesła ŭ parłamient pakiet zakonaŭ suprać ŁHBT
Śpikier parłamienta zapeŭnivaje, što hałasoŭ chopić.
Tbilisi. Foto: vecteezy / felix960588
Deputaty ad kiroŭnaj partyi «Hruzinskaja mara» ŭnieśli ŭ parłamient Hruzii pakiet zakonaŭ, jakija abmiažoŭvajuć pravy ŁHBT.
Členy parłamienta pradstavili zakonaprajekt «Ab siamiejnych kaštoŭnaściach i abaronie niepaŭnaletnich» i papraŭki da 18 zakonaŭ.
Zakonaprajekty praduhledžvajuć uviadzieńnie zabarony na źmienu połu, usynaŭleńnie i apieku nad niepaŭnaletnimi dla adnapołych par, a taksama na praviadzieńnie schodaŭ, nakiravanych na «papularyzacyju» adnapołych šlubaŭ, źmienu połu i ŭsynaŭleńnie dziaciej adnapołaj paraj, piša «Nastojaŝieje vriemia».
Miarkujecca taksama zabaranić raspaŭsiud u tvorach, prahramach i inšych materyjałach kantentu pra adnapołyja šluby, incest, usynaŭleńnie dziaciej adnapołymi parami i apieracyi pa źmienie połu. Heta tyčycca ŭ tym liku adukacyjnych ustanoŭ, ŚMI i kinateatraŭ. U dziaržaŭnych dakumientach i błankach buduć paznačacca tolki žanočy ci mužčynski poł, adpaviedny hienietyčnym danym.
Taksama inicyjatary zakonaprajektaŭ prapanujuć ustalavać 17 traŭnia dziaržaŭnaje śviata — «Dzień śviataści siamji». 17 traŭnia mnohija krainy śvietu adznačajuć Dzień baraćby suprać hamafobii i transfobii.
Spačatku kiroŭnaja partyja mieła namier unieści šerah takich normaŭ u Kanstytucyju, adnak dla źmianieńniaŭ Asnoŭnaha zakona joj nie chapaje hałasoŭ. Dla pryniaćcia ž zvyčajnych zakonaŭ bolšaści «Hruzinskaj mary» dastatkova.
Kiroŭnaja partyja raniej pryniała zakon ab zamiežnym upłyvie, jaki vyklikaŭ u Hruzii masavyja pratesty. Krainy Zachadu pahražajuć krainie sankcyjami i pazbaŭleńniem statusu kandydata ŭ siabry ES.
Čytajcie taksama:
Śpikier parłamienta Hruzii padpisaŭ zakon ab zamiežnych ahientach. Z hetaha dnia jon nabyvaje moc
U Tbilisi razhramili ofis najbujniejšaj hruzinskaj apazicyjnaj partyi
Hruzija maje namier da 2030 hoda viarnuć Abchaziju i Paŭdniovuju Asieciju i stać členam ES
