«Lepš nazad na zavod ci jość varyjant viarnucca ŭ Biełaruś». Jak ajcišniki ŭ Polščy žyvuć na minimałku
Ajcišniki ŭ Polščy raspaviali kanału Dzik Pic, jak jany žyvuć na siaredni polski zarobak (8-8, 5 tysiačy złotych bruta abo $2025-2150+), abo navat minimałku ($1065 bruta).
Ilustracyjnaje fota
«Zastajecca 50 złotych na niepradbačanyja vydatki»
— Ja Full-Stack raspracoŭščyk na pazicyi Junior+ u adnoj z aŭtsors-kampanii z karaniami ŭ RB. Da krasavika atrymlivaŭ 4300 złotych ($1089), ciapier moj zarobak blizu 6000 złotych bruta ($1520).
Paśla vypłaty padatkaŭ na rukach zastajecca 4400 złotych ($1114). Na arendu žylla z apłataj kamunałki sychodzić jašče 2800 złotych, na mabilnuju suviaź i internet — 150 złotych. Na rukach zastajecca kala 1450 złotych. Da pavyšeńnia zarobku zastavałasia kala 150 złotych.
Ja žyvu razam z žonkaj, na ježu ŭ nas sychodzić jašče 1400 złotych ($355). Zastajecca jašče 50 (amal $13) złotych na niepradbačanyja vydatki. Da pavyšeńnia zarabotnaj płaty žyli na źbieražeńni, jakija ŭdałosia zrabić jašče ŭ Biełarusi.
Zabavy — albo za košt źbieražeńniaŭ, albo biaspłatnyja. U Polščy šmat mierapryjemstvaŭ ź biaspłatnym uvachodam.
Pakul ni ab jakim adnaŭleńni aščadžeńniaŭ havorki nie išło, choć by pierastać žyć u minus. Pamianiać pracu pakul nie mahu, bo ŭ kampanii, u jakoj pracuju, ja prajšoŭ stažyroŭku i abaviazany adpracavać jak minimum 18 miesiacaŭ z momantu padpisańnia pracoŭnaj damovy.
Za čas paśla pierajezdu žonka vyvučyła polskuju da kamunikatyŭnaha ŭzroŭniu i niadaŭna ŭładkavałasia na pracu. U mianie raście dośvied, a čas da zakančeńnia damovy pamianšajecca. Tamu z aściarožnym aptymizmam hladzim u budučyniu, choć razumiejem, što budzie nialohka.
«Adkładać dakładna nie atrymlivajecca»
— Moj zarobak — 5400 złotych ($1367). Pačała pracavać HR jašče da pierajezdu (rełakavałasia z-za vajny). Niejkich bonusaŭ pa pierajeździe kampanija nie prapanoŭvała, zarobak z pačatku vajny taksama nie pavyšali.
Atrymlivajecca, z hetych hrošaj 1/3 sychodzić na padatki, 1/3 na arendu pakoja ŭ Varšavie (ja zdymaju sa znajomaj dobruju dvušku ŭ adnym z centralnych rajonaŭ), trochi sychodzić na ipateku, jakaja zastałasia tam. Adkładać dakładna nie atrymlivajecca. U vypadku nieabchodnaści biaru niešta z paduški biaśpieki.
U cełym, na ježu i bytavyja štuki (typu dla myćcia, uborki i inšaha), arendu, sioje-toje z adzieńnia, časam zabavy (kancert, kafe) chapaje. U niejkija miesiacy davodzicca ekanomić bolš. Pracu šukaju pavolna, bo jašče čakaju DNŽ.
Płanuju pierajechać u inšy horad, dzie arandavać kvateru budzie tańniej. Nu i znajści pracu chacia b ź siarednim polskim zarobkam. Napeŭna, dziaŭčatam trochi praściej žyć na taki zarobak, bo ja nie tak šmat jem.
«Skazali, što viłka ŭ $1300-1800 dla Polščy — šmat»
— Ja Data Engineer, žyvu ŭ Biełastoku, atrymlivaju 5000 złotych bruta ($1265).
Pa adukacyi ja ekanamist. U Polšču pryjechaŭ u pačatku 2021 hoda, pracavaŭ na budoŭlach, na zavodach. IT zacikaviŭsia hadoŭ 7 tamu. Ale heta było, chutčej, chobi. Pavoli vučyŭsia, čytaŭ knihi, prahramavaŭ. I prykładna paŭtara hoda tamu ŭbačyŭ vakansiju ŭ telehramie, što kampanija ź Biełarusi šukaje Data Engineer. Prajšoŭ sumoŭje i z tych časoŭ pracuju ŭ ich.
Na dvušku ŭ Biełastoku sychodzić 1300 złotych, z kamunałkaj — 2100-2200 u miesiac. Astatniaje — na žyćcio. U samym pačatku suma zadavalniała, ale čym dalej, tym bolš razumieju, što, pa-mojmu, lepš nazad na zavod.
Ale zavod — heta minus lohkija, ruki i nohi, šmat minusaŭ. A mnie ŭžo nie 20, jość žonka, syn, i ja razumieju, što zmahu atrymlivać dobryja hrošy na zavodzie ŭ momancie. Ale što sa mnoj budzie hadoŭ praz 15 — heta pytańnie.
Ja šukaju pracu ŭ IT, prachodžu sumoŭi, ale ŭ mianie nie vielmi dobraja anhlijskaja i polskaja. Niadaŭna sprabavaŭ sumoŭje ŭ adnu kampaniju na midł-raspracoŭnščyka Golang. Nie prajšoŭ abjektyŭna pa skił. Ale jašče da «sabiesu» mnie skazali, što viłka ŭ $1300-1800, na jakuju ja raźličvaju, dla Polščy šmat. Bo tut kuča naroda z SND, hatovaha pracavać za ježu.
I jašče ja hramadzianin Rasii, nam ciapier vielmi składana z dazvołami na pracu. Nie kožny pracadaŭca budzie zahaniacca z vajavodskim dazvołam na pracu. Tak što mnie treba nie tolki znajści pracu, ale jašče i pracadaŭcy, hatovaha zaniacca dakumientami. Płanuju praz hod padavacca na kartu rezidenta ES, tam užo pavinna być lahčej.
«Nie abmiažoŭvaju siabie ni ŭ čym»
— Pracuju ŭ polskaj firmie aŭtsors, PHP Developer. Atrymlivaju 5800 złotych bruta ($1470).
Z vydatkaŭ: 1800 ($460) złotych za kavalerku ŭ Biełastoku, jašče ±500zł ($130) kamunalnyja. Na ježu, zabavy — ±1000zł ($260). Astatniaje albo adkładajecca, albo idzie na roznyja chaciełki abo padarožžy.
Nie abmiažoŭvaju siabie ni ŭ čym. Ale zaŭsiody chočacca bolš, tamu čakaju rašeńnia pa hramadzianstvie i šukaju lepšuju pracu.
Žyvuć na siaredni zarobak
«U paraŭnańni ź Biełaruśsiu niečakana šmat sychodzić na ŭsio»
— Pracuju ŭ IT biez małoha dva hady na pazicyi raspracoŭščyka jak JDG u Polščy. Kampanija kampiensuje padatki, ZUS, buchhałtara. Nieta vychodzić kala $1800.
Za jeŭratrojku sychodzić kala $800 (z usimi čynšami, telefonami, internetam). Jašče $400 — na charčavańnie (vyklučna pradukty + raz u tydzień dastaŭku čaho-niebudź), kala $50 na bar, jašče $50-100 na adukacyju, $50 na kredytku, stolki ž — na ŭsiakaha rodu padpisačnyja servisy i ličbavyja zabavy. Što zastajecca, źjadaje stamatałohija, kupli niejkaha chatniaha načyńnia, adzieńnia.
Časam atrymoŭvajecca vydatkavać mienš i niešta ŭmoŭna adkłaści. Ale ŭ asnoŭnym boŭtajusia «kala nula». U bližejšy čas da mianie pavinny pierajechać žonka ź niemaŭlom. Tamu «paduška biaśpieki» budzie rastavać chutčej.
U paraŭnańni ź Biełaruśsiu niečakana šmat sychodzić na ŭsio: arenda, pradukty, miedycyna, eating out. Biez svajho žylla žyć na polskuju siaredniuju i ŭžo tym bolš minimałku na adnaho davoli sumna. A kali jość siamja, dyk heta zusim stanovicca padobna na čelendž.
Na prykmietny pierahlad zarobku najbližejšym časam nie raźličvaju. Paziraju na polski rynak pracy, adnak treba padciahvać viedańnie polskaj.
«Jość varyjant viarnucca ŭ RB»
— Ja ajcišnik, jaki žyvie akurat na 8900 złotych bruta ($2253). Ja adzin pracuju ŭ siamji zaraz, hetaja suma — na čaćviarych.
My žyviom u pryharadzie Varšavy, miesca vybirali, kab trochi sekanomić na arendzie, što ŭ cełym napačatku spracavała. Ale praz paŭhoda haspadar pačaŭ pavyšać košt. Zaraz za ŭsio (arenda+miedyja) atrymlivajecca amal 4000 ($1012). To bok, kvatera źjadaje pałovu siamiejnaha biudžetu.
Padychod prosty: namahacca ekanomić. Zakupy tolki ŭ Lidl, Biedronka na źnižkach i pa kuponach (časam na kirmašach). Ale, na žal, heta nie spracoŭvaje. Usio adno padjadajucca reziervy. Tamu zaraz hałoŭnaja stratehija — pošuk novaj pracy. Nu i plus čakajem kartu pobytu vielmi doŭha, i tady možna budzie narešcie padacca na dziciačyja vypłaty (pa 800 złotych na dzicia), što było b istotnaj padtrymkaj.
Nu i, na žal, hety scenar taksama całkam nielha admaŭlać. Jość varyjant viarnucca ŭ RB. Heta na vypadak, kali reziervy całkam skončacca i z pracaj buduć prablemy.
Čytajcie taksama:
Ajcišniki ź Biełarusi źniali pałovu ofisnaj Vilni — ale ciapier traciać cikavaść
Dystancyjščyk płacić 6500 rubloŭ padatkaŭ u Biełarusi, ale ŭsio roŭna staŭ «darmajedam». Jak tak?
