Aŭtar pieśni «Mury», papularnaj u Biełarusi padčas pratestaŭ, staŭ prezidentam «Nacyjanalnaj asamblei Katałonii»
Katałonski paet i bard Łuis Ljak byŭ abrany novym prezidentam arhanizacyi hramadzianskaj supolnaści «Nacyjanalnaja asambleja Katałonii», jakaja vystupaje za niezaležnaść Katałonii ad Ispanii, paviedamlaje Radyjo Svaboda.
Chordify.net
Łuis Ljak staŭ piatym prezidentam z momantu stvareńnia Katałonskaj nacyjanalnaj asamblei ŭ 2012 hodzie, jaho abrali bolšaściu hałasoŭ (48 hałasoŭ z 72).
Biełarusam Łuis Ljak (Lluís Llach) viadomy jak aŭtar pieśni «Mury», adzin ź biełaruskich pierakładaŭ jakoj nabyŭ novuju papularnaść na mitynhach Śviatłany Cichanoŭskaj u 2020 hodzie, kali jana stała kandydatkaj u prezidenty paśla aryštu muža.
U aryhinalnaj viersii pieśnia nazyvajecca L'Estaca, Ljak napisaŭ jaje ŭ 1968 hodzie. Pieśnia adrazu stała simvałam baraćby katałoncaŭ suprać režymu Fransiska Franka, a paźniej adnym z himnaŭ katalonskich niezaležnikaŭ. Jość niekalki pierakładaŭ pieśni na biełaruskuju movu.
Ljak aktyŭna ŭdzielničaje ŭ katałonskim ruchu za niezaležnaść i navat byŭ abrany ŭ parłamient Ispanii ŭ 2015 hodzie ad niezaležnickaha aljansu. Padčas palityčnaj kampanii jon śpiavaŭ svaju znakamituju pieśniu.
Napiaredadni, 31 traŭnia, parłamient Ispanii pryniaŭ zakon, što praduhledžvaje amnistyju sotniaŭ katałonskich sieparatystaŭ, jakim pahražaje sudovy pieraśled za ŭdzieł u niaŭdałaj sprobie adździaleńnia Katałonii ad Ispanii ŭ 2017 hodzie.
Refierendum 2017 hodu vyklikaŭ palityčny kryzis u Ispanii: rehijanalny parłamient Katałonii abviaściŭ niezaležnaść ad krainy, a Madryd uvioŭ pramoje kiravańnie rehijonam. U 2019 hodzie Viarchoŭny sud Ispanii asudziŭ 9 katałonskich palitykaŭ i ŭradoŭcaŭ za ich rolu ŭ niesankcyjanavanym refierendumie ab niezaležnaści i ŭ abviaščeńni niezaležnaści.
