Jašče dva polskija sałdaty atrymali ranieńni na miažy ź Biełaruśsiu
Za apošnija dva dni ŭ Padlaskim adździaleńni, na miažy ź Biełaruśsiu, było ździejśniena bolš za 300 sprobaŭ niezakonnaha pierasiačeńnia miažy.
Polskija pamiežniki patrulujuć miažu na takich kvadracykłach. Fota: podlaski.strazgraniczna.pl
U sieradu było zarehistravana 152 vypadki, źviazanyja ź nielehalnaj mihracyjaj. «Ahresiŭnyja zamiežniki, jakija znachodzilisia za techničnym barjeram, niekalki razoŭ atakavali polskija słužby. U vyniku takich ahresiŭnych pavodzin paciarpieli dvoje vajskoŭcaŭ, jakich dastavili ŭ balnicu», paviedamlaje padlaskaje adździaleńnie Polskaj pamiežnaj słužby.
Polska-biełaruskuju miažu mihranty sprabavali niezakonna pierasiekčy na ŭčastkach, jakija achoŭvajucca zastavami ŭ Biełaviežy, Dubičach Carkoŭnych, Naraŭcy, Michałovie i Čaremšy.
Učora taksama byli zatrymanyja čatyry kurjery, jakija pieravozili ahułam 19 zamiežnikaŭ. U adnym z vypadkaŭ zatrymany ŭ rajonie Hajnaŭki hramadzianin Polščy ŭ lehkavym Volkswagen pieravoziŭ 9 mihrantaŭ.
Try razy za apošnija dva dni pamiežniki akazvali dapamohu zamiežnikam, jakija mieli patrebu ŭ miedycynskaj dapamozie, čatyry čałavieki byli dastaŭleny ŭ balnicu.
Z pačatku hetaha hoda na ŭčastku, jaki achoŭvajecca Padlaskim atradam pamiežnaj achovy, u Polšču sprabavali praniknuć ludzi z 35 krain, padsumoŭvaje polskaja pamiežnaja słužba.
Raniej u pačatku tydnia paviedamlałasia pra ranieńnie polskaha sałdata ŭ vyniku napadu mihrantaŭ.
