«Razhledzieli zvarot z vyjezdam na miesca». Ułady Hrodna adkazali na pytańnie, kudy źnikła šylda ŭ honar Kaściuški
Hrodzienski haradski vykanaŭčy kamitet adkazaŭ na kalektyŭny zvarot z pytańniem, što zdaryłasia z pamiatnaj šyldaj u honar Tadevuša Kaściuški i padziej paŭstańnia 1794 hoda. 30 hod jana pravisieła kala ŭvachodu ŭ Novy zamak i źnikła ŭ krasaviku 2024 hoda, piša Hrodna.life.
Uvachod u Novy zamak da taho, jak źniali šyldu, pryśviečanuju paŭstańniu Kaściuški. Krynica: fejsbuk-staronka Vasila Hierasimčyka
U kancy krasavika hrodziency stvaryli pietycyju na adras haradskich uładaŭ z prośbaj rastłumačyć, kudy i čamu źnikła pamiatnaja šylda, a taksama kali jaje płanujuć viarnuć na miesca. Zvarot padpisali 83 čałavieki. Aŭtary byli pierakananyja, što demantaž doški niehatyŭna paŭpłyvaje na turystyčny patencyjał Hrodna, abiadniaje našuju historyju, idzie ŭ razrez z pryniatymi kancepcyjami raźvićcia turyzmu i haścinnaści Biełarusi.
Haradskija ŭłady adkazali prosta: «Hrodzienski harvykankam nie maje źviestak pra abjekt, ukazany ŭ zvarocie».
Pad adkazam staić podpis namieśnicy staršyni harvykankama Zoi Kulešy. Pavodle jaje słoŭ, kalektyŭny zvarot razhladali navat z vyjezdam na miesca.
Anałahičny adkaz — «harvykankam nie maje źviestak pra abjekt» — byŭ atrymany paśla źniknieńnia ŭ Hrodnie ŭ žniŭni 2023 hoda pamiatnaha znaka ŭ honar paŭstańnia 1863 hoda. Znak raźmiaščaŭsia na hrodzienskim čyhunačnym vakzale. Aŭtarkaj adkazu na pietycyju tady taksama była Zoja Kuleša. Praŭda, tym razam harvykankam na miesca źniknieńnia znaka nie vyjazdžaŭ, a paźniej vyśvietliłasia, što jaho demantavali supracoŭniki Hrodzienskaj haradskoj žyllova-kamunalnaj haspadarki.
Čytajcie taksama:
Hrodziency patrabujuć rastłumačyć, kudy źnikła miemaryjalnaja doška Tadevuša Kaściuški
U Hrodnie z Novaha zamka prybrali miemaryjalnuju šyldu Kaściuški
