Biudžet 6 miljonaŭ jeŭra, štat 50 supracoŭnikaŭ. U Varšavie prezientavali prajekt Nacyjanalnaha daśledčaha ŭniviersiteta
U varšaŭskim startap-chabie «Imahuru» 29 traŭnia pradstavili Kancepcyju stvareńnia Biełaruskaha nacyjanalnaha daśledčaha ŭniviersiteta, piša «Radyjo Svaboda». Ideja stvareńnia BNDU naležyć biełaruskim navukoŭcam-humanitaryjam, jakija apynulisia ŭ vyhnańni.
U zapłanavanym univiersitecie nie budzie bakałaŭryjatu, tolki mahistratura i daktarantura. U jakoj kankretna krainie jon budzie pracavać, pakul nieviadoma.
Pavodle aŭtaraŭ prajekta, bazavymi movami navučańnia i daśledavańniaŭ va ŭstanovie buduć biełaruskaja i anhlijskaja movy. Biełaruskaja budzie movaj spravavodstva, jana budzie daminavać u publičnaj kamunikacyi, zapeŭnivajuć inicyjatary.
«Misija ŭniviersiteta — stvareńnie volnaj prastory dla raźvićcia krytyčnaha myśleńnia, jakoje nie było b abmiežavanaje palityčnymi, ekanamičnymi miežami», — havoryć prafiesar Pavieł Cieraškovič.
Jon padkreślivaje, što hałoŭny akcent budzie rabicca mienavita na daśledčyckuju pracu.
Miarkujecca, što budzie stvorana 5 asnoŭnych daśledčych centraŭ, jakija prezientavaŭ fiłosaf Pavał Barkoŭski.
- Centr histaryčnych daśledavańniaŭ;
- Centr abo Departament adukałohii (Maryna Sakałova, Śviatłana Mackievič);
- Centr fiłasofskich daśledavańniaŭ (Pavieł Barkoŭski, Volha Šparaha);
- Centr antrapałahičnych daśledavańniaŭ (Pavieł Cieraškovič);
- Centr daśledavańniaŭ mižnarodnych adnosin (Viktar Šadurski, Roza Turarbiekava).
Taksama ŭ pierśpiektyvie buduć stvoranyja jašče 3 struktury:
- Instytut sacyjałohii i Centr empiryčnych daśledavańniaŭ (Hienadź Koršunaŭ i Andrej Vardamacki);
- Biełaruski instytut publičnaj historyi (Ihar Stankievič i Alaksiej Łastoŭski);
- Instytut biełaruskaj movy (Lilija Płyhaŭka).
U bolš addalenych płanach — stvareńnie Centra mižnarodnaha prava i Centra kahnityŭnych i kampjutarnych navuk.
Papiaredni biudžet prajekta — 2 miljony jeŭra ŭ hod, adpaviedna, 6 miljonaŭ jeŭra na 3 hady (biez uliku dadatkovaha biudžetu aŭtanomnych adzinak).
Miarkujecca, što adbudziecca pracaŭładkavańnie kala 50 čałaviek (35 navukovych supracoŭnikaŭ, 11 čałaviek — administracyjny i dapamožny piersanał. Plus rektar i 8 strukturnych adzinak na departamienty).
Papiaredniaja struktura napaŭnieńnia biudžetu:
- Hrantavyja prahramy;
- Danaty i fond raźvićcia;
- Indyvidualnyja i instytucyjnyja mižnarodnyja daśledčyja hranty;
- Płatnyja pasłuhi.
Inicyjatary śćviardžajuć, što pradstaŭniki biełaruskaha biznesu taksama hatovyja ŭkłaścisia ŭ finansavańnie Biełaruskaha nacyjanalnaha daśledčaha ŭniviersiteta.
Rehistracyja i akredytacyja ŭniviersiteta ŭ adnoj z krain Jeŭrasajuza zapłanavanaja na 2025—2026 hady. Miarkujecca, što adbuducca kamunikacyi z palitykami i profilnymi ministerstvami nastupnych krain Jeŭrasajuza: Polščy, Litvy, Niamieččyny, Čechii, Estonii.
Pakul nieviadoma, jakaja kraina pahodzicca pryniać Biełaruski nacyjanalny daśledčy ŭniviersitet.
Čytajcie taksama:
Historyki ŭ vyhnańni stvaryli Biełaruski instytut publičnaj historyi
EHU i BEROC buduć navučać ekanamistaŭ z karjernymi pierśpiektyvami ŭ Jeŭropie
