Harcujeva: Ja była śviedkaj na viasielli Ejsmant. Ciapier nie viedaju, ci zmahu pahladzieć joj u vočy
U novym vypusku tok-šou «Žyćcio-malina» aktorka Kupałaŭskaha teatra Valancina Harcujeva raskazała pra svajo siabroŭstva z Natallaj Ejsmant, pres-sakratarkaj Alaksandra Łukašenki.
Valancina Harcujeva i Natalla Ejsmant. Kałaž
Jak zhadvaje Valancina Harcujeva, z Natallaj Ejsmant jany pastupili na adzin akciorski kurs:
«Naša siabroŭstva pačałosia na druhim kursie. U mianie byŭ składany charaktar. Jana taksama nie padarunak. Dzieści na hetaj hlebie my syšlisia. Zdajecca, my byli najlepšymi siabroŭkami. Heta častka majho minułaha žyćcia, i tam nie było ničoha drennaha».
Harcujeva zhadvaje, što była śviedkaj na viasielli Natalli Ejsmant. «Na im była častka supracoŭnikaŭ telebačańnia i častka teatralnaj supołki. My raźbilisia na hrupki. Voś heta ja zapomniła. Heta byli dźvie tusovački».
Aktrysa pryhadvaje, što na momant pryznačeńnia Natalli Ejsmant pres-sakratarkaj Łukašenki jany vielmi redka sustrakalisia:
«Skončyłasia studenctva, skončylisia ahulnyja intaresy. Kožny budavaŭ svajo žyćcio. Jana źviazała jaho ź dziaržaŭnym telebačańniem. Ja — z teatram. Nie stała ahulnych tem, kab parazmaŭlać».
Valancina Harcujeva. Skryn videa malina_by / YouTube
Pa słovach Harcujevaj, apošni raz sa svajoj byłoj siabroŭkaj jana sustrełasia prykładna ŭ 2019 hodzie na aficyjnym mierapryjemstvie, jakoje prachodziła ŭ budynku «BiełEkspa»:
«Ja była z nahody pryznačeńnia [zvańniaŭ] zasłužanych, narodnych artystaŭ. Kali razdavalisia miedali, hramaty. Tady mnie dali miedal Francyska Skaryny. Voś tam jana padyšła da mianie, skazała, što vielmi za mianie radaja. Ja padziakavała».
Na pytańnie, što ciapier Valancina Harcujeva skazała b svajoj byłoj siabroŭcy pry sustrečy, jana adkazała:
«Tak nie staniecca. Kali idzie razmova pra złačynstvy takoha maštabu, to ja nie viedaju, što tut možna kazać. Hety čałaviek byŭ dla mianie siabram. Ja pamiatała Natašu, jak čałavieka, jaki ŭ ciažkuju chvilinu dapamoža, jakoj možna patelefanavać nočču, jakomu možna było davieryć sakrety.
Ja absalutna ničoha nie viedaju i nie źviedaju pra čałavieka, jaki źjaŭlajecca častkaj režymu, jaki na hety režym pracuje i, mahčyma, udzielničaŭ u hvałcie. Tamu, prabačcie, ja nie dumaju, što kali-niebudź štości zmahu joj skazać, navat pahladzieć u vočy».
Čytajcie taksama:
Prapahanda sprabuje admyć Natallu Ejsmant: kažuć, što jaje «Roleks» kaštuje $100
«Narmalnaja ž była. Što ź joj zdaryłasia?» Što Natalla Ejsmant chavaje pra 2020 hod
