Jakija kvatery i damy maje siamja Andrejčanki
Uładzimir Andrejčanka — doŭhažychar siarod nabližanych da Łukašenki ludziej. Jon 16 hadoŭ zajmaŭ pasadu staršyni Pałaty pradstaŭnikoŭ Nacyjanalnaha schodu. Jakuju majomaść prydbała za hety čas jaho siamja? «Lusterka» razam z «Biełpołam» pravieryli, što ličyłasia za Andrejčankam na siaredzinu 2021 hoda.
Uładzimir Andrejčanka. Skrynšot ź videa
Uładzimir Andrejčanka maje kvateru ŭ mikrarajonie Drazdy ŭ Minsku pa adrasie vulica Pijanierskaja, 7. Heta trochpakajoŭka ŭ šmatkvaternym budynku, jaje płošča — bolš za 113 «kvadrataŭ». Žyllo było nabyta ŭ 2009 hodzie, a ŭ 2010-m jaho pryvatyzavali. U hetaj ža kvatery prapisanaja žonka Andrejčanki — 69-hadovaja Kaciaryna.
Dom №7 na vulicy Pijanierskaj u Minsku. Fota: «Jandeks. Karta»
Ciapier u hetym domie pradajecca niekalki kvater. Košt samaj tannaj trochpakajovaj — 918 356 rubloŭ (285 000 dalaraŭ), samaj darahoj — 1 124 583 rubli (349 000 dalaraŭ).
Nieruchomaść jość i ŭ Kaciaryny Andrejčanki — dom № 10a na vulicy 8-j Łuhavoj u Viciebsku. Žyllo zajmaje płošču amal 350 «kvadrataŭ», u im jość sklep, mansarda, terasa, navies. Na ŭčastku majucca łaźnia i chleŭ.
Dačka Andrejkanki, 41-hadovaja Natalla, žyvie taksama ŭ pasiołku Drazdy ŭ Minsku niepadalok ad baćkoŭ. Pa damovie dareńnia ŭ 2021 hodzie da jaje pierajšoŭ dom № 21 na vulicy Vierbnaj. Budynak zajmaje płošču bolš za 253 «kvadraty».
Dom №21 na vulicy Vierbnaj u Minsku. Fota: «Jandeks. Karta»
Taksama Natalla maje dvuchpakajovuju kvateru płoščaj 55,6 m² u panelnym domie № 90 na vulicy Cimirazieva, jon znachodzicca za spartyŭna-zabaŭlalnym kompleksam «Minsk-Arena». Viadoma, što žančyna pracavała juryskonsultam u kampanii «Biełtranshaz», a taksama firmach «Delikatfud» i «Mantana».
Dom № 90 na vulicy Cimirazieva ŭ Minsku. Fota: «Jandeks. Karta»
U Andrejčankaŭ taksama jość 49-hadovy syn Uładzisłaŭ, niadaŭna jon pakinuŭ pasadu hienieralnaha dyrektara kampanii «MTS», jakuju zajmaŭ z kastryčnika 2021 hoda. Da hetaha mužčyna byŭ na kirujučych pasadach u Viciebskim i Mahiloŭskim filijałach kampanii.
Uładzisłaŭ Andrejčanka. 2024, Minsk. Fota: MTS
Za Uładzisłavam na siaredzinu 2021 hoda ličylisia čatyry abjekty nieruchomaści ŭ Viciebskaj vobłaści:
- kvatera ŭ Viciebsku ŭ domie № 22 na vulicy Miru;
- haraž na vulicy Łazo ŭ Viciebsku;
- dom na samym bierazie Zachodniaj Dźviny — u vioscy Padbiareźzie Viciebskaha rajona;
- u vioscy Marjanava Loźnienskaha rajona — ziamielny ŭčastak. Adznačym, što Marjanava — rodnaja vioska Uładzimira Andrejčanki.
Dom №22 na vulicy Mira ŭ Viciebsku. Fota: «Jandeks. Karta»
Što tyčycca aŭtamabilaŭ, to va Uładzimira Andrejčanki była Toyota Land Cruiser 2006 hoda vypusku. Ciapier aŭto takoj madeli i hoda kaštuje prykładna 62-67 tysiač rubloŭ.
Dačka čynoŭnika jeździła na Audi Q5 2015 hoda vypusku. Košt hetaj mašyny siońnia varjirujecca ŭ miežach 64-87 tysiač rubloŭ.
Uładzisłaŭ Andrejčanka mieŭ Nissan Qashqai 2018 hoda vypusku. Heta aŭto siońnia možna kupić ad 43 da 74 tysiač rubloŭ.
Čytajcie taksama:
Jakaja majomaść jość u Kosinca? Dom u Drazdach, kvatera na Hvardziejskaj… I čatyry stvały
