Kim Čen Yn zaklikaŭ «jak nikoli» rychtavacca da vajny i vyvučyŭ makiet Sieuła
Kim Čen Yn naviedaŭ Vajenna-palityčnuju akademiju i zaklikaŭ kursantaŭ naraścić padrychtoŭku kadraŭ dla stvareńnia «mahutnaha vojska».
Kim Čen Yn padčas naviedvańnia Vajskovaj akademii. Fota: Korean Central News Agency
Kim Čen Yn zaklikaŭ vojska «jak nikoli» rychtavacca da vajny. Takim mierkavańniem kiraŭnik KNDR padzialiŭsia padčas vizitu ŭ Vajenna-palityčnuju akademiju imia Kim Čen Ira, paviedamlaje Paŭnočna-karejskaje telehrafnaje ahienctva.
Lidar KNDR taksama padkreśliŭ hatoŭnaść «abaviazkova źniščyć vorahaŭ, biez vahańnia zadziejničaŭšy ŭsie našy srodki».
U suviazi z hetym Kim Čen Yn padkreśliŭ vyklučnuju rolu Vajenna-palityčnaj akademii ŭ stvareńni «mahutnaj armii» i zaklikaŭ vykładčycki skład «dasiahnuć jašče bolšych pośpiechaŭ» dla papaŭnieńnia ŭsich jaje prystupak kvalifikavanymi kamandzirami.
Taksama paviedamlałasia, što Kim naviedaŭ «kabiniet vyvučeńnia apieracyi», dzie aznajomiŭsia z vynikami daśledavańnia vajennych namieraŭ i patencyjnych dziejańniaŭ praciŭnika. Na fotazdymkach, apublikavanych CTAK, paŭnočnakarejski lidar staić pobač z makietam Sieuła — pryčym i makiet, i raźviešanyja na ścienach karty naŭmysna razmytyja.
Kim Čen Yn vyvučaje kartu. Fota: Korean Central News Agency
«Tavaryš Kim Čen Yn pakazaŭ, što [zdolnaść] sarvać kolkasnuju, vajskova-techničnuju pieravahu vorahaŭ pieravahaj idej i vajskovaj techniki — heta zakon Pieramohi ŭ vajnie, jaki nie moža źmianicca i ŭčora, i siońnia, i zaŭtra», — piša CTAK.
U apošnija miesiacy paŭnočnakarejski lidar nieadnarazova kazaŭ pra padrychtoŭku da vajny. U pačatku sakavika Kim naviedaŭ hałoŭnuju bazu Karejskaj Narodnaj armii (KNA) i panaziraŭ za vajennymi vučeńniami. Jak paviedamlaŭ CTAK, lidar KNDR vykazaŭ» vialikaje zadavalnieńnie «ad ubačanaha, pakolki vajskoŭcy» znachodziacca ŭ poŭnaj hatoŭnaści da vajny», piša RBK.
Naziralniki adznačajuć, što bolšaść źjaŭleńniaŭ Kim Čen Yna na publicy z pačatku 2024 hoda była źviazana z vajennymi pytańniami.
U studzieni ekśpiert pa KNDR Robiert Karlin i fizik-jadzierščyk Zihfryd Chiekier pradstaviŭ dakład, u jakim śćviardžałasia, što Kim Čen Yn rychtujecca da vajny, a na Karejskim paŭvostravie skłałasia samaja niebiaśpiečnaja situacyja z časoŭ Karejskaj vajny.
Pry hetym namieśnica pamočnika dziaržsakratara ZŠA ŭ spravach Uschodniaj Azii i Cichaha akijana Čžun Pak, jakaja kuryruje stasunki z KNDR, zajaviła ŭ kancy sakavika, što Vašynhton pakul nie bačyć prykmiet padrychtoŭki Pchieńjana da chutkaha napadu.
Čytajcie taksama:
Kim Čen Yn asabista prateściravaŭ tank na vučeńniach armii KNDR
