«Patrebien asobny raździeł». U novym školnym padručniku historyi raskažuć pra padziei 2020 hoda
Ministr adukacyi ličyć, što tema pavinna zaniać bolš za dźvie-try staronki.
Ministr adukacyi Andrej Ivaniec. Fota: BiełTA
Andrej Ivaniec abmierkavaŭ z načalnikami ŭpraŭleńniaŭ adukacyi Minskaj vobłaści novyja padručniki historyi. Dapamožnik dla 10-ha kłasa ŭžo praktyčna hatovy, jon prachodzić testavańnie ŭ 14-ci škołach krainy.
Čakajecca, što pa novym padručniku dziesiacikłaśniki buduć vyvučać historyju ŭžo ŭ nastupnym navučalnym hodzie. U im anansavali bolš zručny šryft, a taksama bolš ciesnuju suviaź historyi Biełarusi z suśvietnaj historyjaj, pakolki dva pradmiety abjadnajuć u adzin, paviedamlaje «Minskaja praŭda».
Čynoŭniki taksama zakranuli padručnik dla 11-ha kłasa, jaki budzie testavacca ŭ nastupnym hodzie. Ivaniec zajaviŭ, što ź im usio budzie kudy składaniej. I anansavaŭ niekalki mahistralnych tem.
Tak, pa słovach Ivanca, u dapamožniku pavinny buduć adlustravać pratesty 2020 hoda, refierendum 2022-ha, a taksama nastupnyja vybary. Pryčym čynoŭnik ličyć, što na hetyja temy nieabchodna advieści ceły raździeł, a nie paru staronak, dla taho, kab «školniki razumieli: historyja tvorycca tut i ciapier».
Ź jakich pazicyj aŭtary novaha padručnika buduć raspaviadać pra padziei 2020 hoda, zdahadacca niaciažka. Ułady ŭžo vykarystoŭvajuć temu pratestaŭ u prapahandzie ŭ škole. Tak, fatahrafii z pratestaŭ uklučanyja ŭ padručniki pa novym fakultatyvie «Hienacyd biełaruskaha naroda».
Aŭtary dapamožnika pravodziać pramyja antyhistaryčnyja paraleli pamiž kałabaracyjanistami časoŭ Druhoj suśvietnaj vajny i pratestoŭcami z nacyjanalnymi ściahami suprać hvałtu i falsifikacyj u 2020-m. Nacyjanalnaja simvolika ŭ hetych padručnikach nazyvajecca «nacysckaj».
Čytajcie taksama:
U 10-ch kłasach historyju Biełarusi abjadnajuć z suśvietnaj historyjaj u adzin kurs
U Biełarusi i Rasii stvorać supolnyja padručniki pa historyi
