Dla vyjaŭleńnia terarystaŭ u Hazie i ŭdarach pa ich Izrail vykarystoŭvaŭ bazu danych na asnovie štučnaha intelektu?
Instrumient štučnaha intelektu, navučany izrailskimi vajskovymi śpiecyjalistami, prasiejvaŭ vializnyja masivy danych nazirańnia i inšaj infarmacyi, kab znajści celi dla ataki.
Izrailski avijaŭdar pa žyłym domie ŭ horadzie Haza. Fota: AP Photo / Fatima Shbair
Jak piša The Washington Post, Izrail pa ŭsioj vierahodnaści vykarystaŭ dla vybaru celaŭ dla ataki bajevikoŭ u siektary Haza prahramu «Łavanda» na asnovie štučnaha intelektu.
Prahrama pa apracoŭcy danych, navučanaja izrailskimi vajskovymi śpiecyjalistami, prasiejvała vializnyja masivy danych nazirańnia i inšaj infarmacyi, kab znajści celi dla napadu. Mahčyma, jana adyhrała važnuju rolu, asabliva na rańnich etapach vajny, kali Izrail nanosiŭ pa terytoryi Hazy bieśpierapynnyja avijaŭdary, źmiatajučy ź ziamli damy i cełyja kvartały.
Rasśledavańnie ab prahramie «Łavanda» pravioŭ izrailski žurnalist i režysior Juval Abracham (Yuval Abraham). Jano zasnavana na pakazańniach šaści ananimnych aficeraŭ izrailskaj raźviedki, jakija słužyli padčas vajny i mieli niepasrednyja adnosiny da vykarystańnia štučnaha intelektu ŭ vybary celaŭ dla likvidacyi.
Pa słovach Abrachama, «Łavanda» vyznačyła dla likvidacyi da 37 tysiač paleścincaŭ jak miarkujemych bajevikoŭ i ich damy dla mahčymych pavietranych udaraŭ.
«Na rańnich etapach vajny armija davała aficeram dazvoł na vykarystańnie śpisaŭ «Łavandy», pry hetym nie patrabavałasia staranna praviarać, čamu mašyna zrabiła taki vybar, ci vyvučać danyja zachodniaj raźviedki, na jakich jany byli zasnavanyja», — cytuje The Waschington Post Abrachama.
Pa słovach adnoj z krynic, čałaviečy piersanał časta słužyŭ jak «štamp» — aŭtaryzacyja na rašeńnie mašyny. Zvyčajny na aŭtaryzacyju kožnaj celi pierad bambardziroŭkaj zatračvałasia kala 20 siekund. Nieabchodna było tolki ŭpeŭnicca, što cel, paznačanaja «Łavandaj», źjaŭlajecca mužčynaj.
I heta adbyvałasia, jak adznačaje krynica, niahledziačy na toje, što było viadoma ab tym, što sistema dapuskaje pamyłki prykładna ŭ 10% vypadkaŭ i časam paznačaje asobaŭ, jakija majuć słabuju suviaź z bajavymi hrupoŭkami ci ŭvohule jaje nie majuć.
Heta moža dapamahčy rastłumačyć maštab razbureńniaŭ, jakija Izrail abrynuŭ na Hazu, sprabujučy pakarać CHAMAS, a taksama vialikuju kolkaść achviar.
Jak adznačaje vydańnie, u papiarednich raŭndach kanfliktu pamiž Izrailem i CHAMAS Armija abarony Izrailu vykarystoŭvała bolš praciahły praces vybaru celaŭ, zasnavany na danych raźviedki i inšych krynic. Zaraz ža, pa słovach adnaho z aficeraŭ raźviedki, pakazańni jakoha apublikavała The Guardian, «na nas uvieś čas cisnuli: «Dajcie nam bolš celaŭ». Jany sapraŭdy kryčali na nas».
Mnohija z bojeprypasaŭ, jakija Izrail skinuŭ na celi, abranyja «Łavandaj», byli «tupymi» bombami — ciažkaj niekirujemaj zbrojaj, jakaja nanosić značnuju škodu i pryvodzić da hibieli mirnych žycharoŭ.
Pavodle spravazdačy Abrachama, izrailskija čynoŭniki nie chacieli «marnavać» daražejšyja bojeprypasy z dakładnym naviadzieńniem na bajevikoŭ CHAMAS małodšaha ranhu, vyjaŭlenych sistemaj. I jany taksama nie prajaŭlali asablivaj piedantyčnaści, skidajučy hetyja bomby na budynki, dzie spali siemji ludziej, vyznačanych jak celi.
U adkaz na materyjał Abrachama ab prahramie «Łavanda» CACHAŁ vydaŭ svaju zajavu. U joj jon charaktaryzuje sistemu jak bazu danych, pryznačanuju dla pierakryžavanych spasyłak na krynicy raźvieddanych dla atrymańnia abnoŭlenaj infarmacyi ab bajevikach terarystyčnych arhanizacyj i adznačaje:
«CACHAŁ nie vykarystoŭvaje sistemu štučnaha intelektu, jakaja identyfikuje bajevikoŭ-terarystaŭ i sprabuje pradkazać, ci źjaŭlajecca čałaviek terarystam. Infarmacyjnyja sistemy — heta tolki instrumienty dla analitykaŭ u pracesie identyfikacyi celi».
Čytajcie jašče:
Izrail rychtujecca da ataki Irana
Uradženiec Mazyra ŭznačaliŭ Upraŭleńnie raspracoŭki novych mietadaŭ viadzieńnia boju CACHAŁ
