Francyja pieršaj u śviecie aficyjna zamacavała prava na abort u Kanstytucyi
Emanuel Makron nazvaŭ rašeńnie nacyjanalnym honaram i sihnałam usiamu śvietu.
Fota: Oleg Cetinic / AP
Francyja stała pieršaj krainaj u śviecie, jakaja zamacavała prava na abort u Kanstytucyi. Raniej hetuju prapanovu ŭchvalili Sienat i Nacyjanalny schod krainy, piša Bi-bi-si.
4 sakavika abiedźvie pałaty francuzskaha parłamienta praviali sumiesnaje pasiadžeńnie ŭ Viersalskim pałacy i kančatkova zaćvierdzili papraŭku ŭ Asnoŭny zakon. Deputaty vitali pryniatyja źmieny burnymi apładysmientami.
Heta 25-ja papraŭka da pryniataj u 1958 hodzie Kanstytucyi i pieršaja z 2008 hoda. U Francyi prava na abort zamacavana ŭ zakonie z 1975 hoda.
Prezident Francyi Emanuel Makron nazvaŭ rašeńnie nacyjanalnym honaram i sihnałam usiamu śvietu.
U honar hetaj padziei ŭ Mižnarodny žanočy dzień 8 sakavika ŭ krainie płanujecca praviadzieńnie śpiecyjalnaj publičnaj cyrymonii.
Premjer-ministr Francyi Habryel Atal nazvaŭ pryniatyja źmieny «fundamientalnym krokam, jaki ŭvojdzie ŭ historyju».
Apytańni hramadskaj dumki pakazvajuć, što bolšaść žycharoŭ krainy padtrymlivajuć papraŭku ŭ Kanstytucyju.
Pry hetym Vatykan paśla hałasavańnia ŭ Francyi znoŭ vykazaŭsia suprać abortaŭ i zajaviŭ, što «nie moža być «prava» na pazbaŭleńnie čałavieka žyćcia».
Nivodnaja z asnoŭnych palityčnych partyj krainy nie stavić pad sumnieŭ prava žančyn na abort, ale farmuloŭka, vykarystanaja ŭ papraŭcy, była pierahledžana paśla hałasavańnia 2022 hoda, kali Nacyjanalny schod uchvaliŭ «prava» na abort.
U minułym miesiacy jon znoŭ prahałasavaŭ za «svabodu abortaŭ «paśla taho, jak urad Makrona zaklikaŭ unieści papraŭki ŭ artykuł 34 Kanstytucyi, kab pakazać na «harantavanuju žančynam svabodu žančyn źviartacca da abortu».
Mienavita hetaja novaja farmuloŭka «harantavanaj svabody» była ŭchvalena sienatam u minułuju sieradu.
U minułym hodzie prezident Francyi Emanuel Makron paabiacaŭ zrabić svabodu žančyn źviartacca da pierapynieńnia ciažarnaści «niezvarotnaj», uklučyŭšy jaje ŭ Kanstytucyju.
U razmovie z ahienctvam AFP niekalki kansiervatyŭnych sienataraŭ zajavili, što na ich akazvaŭsia cisk, kab jany ŭchvalili papraŭku.
U ZŠA debaty ab abortach nie ścichajuć z taho času, jak u červieni 2022 hoda Viarchoŭny sud admianiŭ ahulnanacyjanalnaje prava na pierapynieńnie ciažarnaści.
Štaty ZŠA, u jakich va ŭładzie znachodziacca respublikancy, aktyŭna prasoŭvajuć zakonaprajekty, jakija abmiažoŭvajuć dostup da abortaŭ. Demakraty tradycyjna vystupajuć suprać takich abmiežavańniaŭ.
U 2020 hodzie Kanstytucyjny sud pieravažna katalickaj Polščy pryznaŭ nie adpaviednym Asnoŭnamu zakonu pałažeńnie zakanadaŭstva, jakoje dazvalała žančynie pierapynić ciažarnaść u vypadku vyjaŭleńnia ŭ płodu ciažkaha i niezvarotnaha defiektu abo nievylečnaj chvaroby, jakaja pahražaje jaho žyćciu.
Z tych časoŭ u Polščy nie raz prachodzili pratesty z patrabavańniem viarnuć žančynam prava na abort, adnak zakanadaŭstva zastajecca ŭ sile.
Čytajcie taksama:
Žančyny, jakija pieražyli paślarodavuju depresiju, raskazali, jak adolvali ciažki stan
