Łukašenka: My pavinny być hatovyja da vajny i mientalna, i stratehična
Za piać dzion da vybaraŭ Alaksandr Łukašenka pravioŭ «pašyranuju naradu pa biaśpiecy», na jakoj nakručvaŭ hramadstva pahrozaj Treciaj suśvietnaj vajny i abvinavaciŭ apazicyju ŭ supracy z Zachadam.
«U bližejšy čas projduć najvažniejšyja dla krainy mierapryjemstvy: adziny dzień hałasavańnia, farmiravańnie UNS. Nas znoŭku pasprabujuć raschistać. Heta vidavočna. Schiema nie źmienicca. Ale my pavinny być hatovy da taho, što jany prydumajuć novyja tryhiery dla destabilizacyi hramadstva», — zajaviŭ Alaksandr Łukašenka.
Pavodle jaho, praciŭniki dyktatury razhladajuć try asnoŭnyja scenary.
Pieršy, źmienu ŭłady ŭ Biełarusi padčas vybaraŭ 2024 hoda, jon nazvaŭ małaimaviernym.
Druhim jon ličyć źmienu ŭłady padčas prezidenckich vybaraŭ u 2025 hodzie.
Trecim scenaryjem jon nazvaŭ hulniu ŭ doŭhuju z šyrokim naboram instrumientaŭ miakkaj siły na vypadak pravału pieršych dvuch varyjantaŭ raźvićcia padziej.
Łukašenka ličyć, što mienavita treci scenaryj moža być realna zadziejničany, bo pieršych dvuch scenaryjaŭ u Biełarusi nie dapuściać.
«Tak, siońnia asobnyja instrumienty hetaj miakkaj siły niejtralizavanyja. My kardynalna pierahledzieli padychody da dziejnaści antybiełaruskich fondaŭ i nibyta pravaabarončych arhanizacyj unutry Biełarusi. Praviali pierarehistracyju partyj. Ludzi ŭbačyli antynacyjanalnuju sutnaść tak zvanych lidaraŭ apazicyi, jakija žabrujuć u zachodnich stalicach. U Biełarusi jany pa-za zakonam», — skazaŭ Łukašenka.
Što tyčycca hłabalnych hulcoŭ na palityčnaj arenie, tam staŭki vyšejšyja, ličyć Łukašenka. «Hiehiemonu nadakučyła łamać zuby ab Biełaruś, jakuju navat nie kožny amierykaniec znojdzie na karcie śvietu», — skazaŭ jon.
Łukašenka havoryć, što ŭ jaho jość usio nieabchodnaje, kab abaranić siabie i nanieści praciŭniku nieprymalnuju škodu.
Jon raspavioŭ, što ŭ stroj pastaŭlenyja najnoŭšyja ŭzory biełaruskaj RSZA «Pałanez-M» dalokaściu da 300 km, na ŭzbrajeńnie pastupili 2 zienitnych rakietnych dyvizijona S-400 i 2 dyvizijona rakietnych kompleksaŭ «Iskander-M». Na terytoryi krainy raźmieščana taktyčnaja jadziernaja zbroja.
«Siońnia heta najvažniejšy elemient strymlivańnia luboha praciŭnika», — skazaŭ Łukašenka.
«I davajcie ščyra: što datyčyć bieśpiłotnaj avijacyi, dronaŭ-kamikadze, maštabnaha zabieśpiačeńnia imi vojska, padrychtoŭki apierataraŭ dronaŭ my ŭžo adstajom», — pryznaŭ Łukašenka.
Alaksandr Łukašenka zajaviŭ, što tolki šmatpalarny śviet zdolny ŭstalavać raŭnavahu i zabiaśpiečyć biaśpieku na ŭsich kantynientach.
Pad «šmatpalarnym śvietam» rasiejskaja i łukašenkaŭskaja prapahanda majuć na ŭvazie rost upłyvu Rasiei i Kitaja i pamianšeńnie ŭpłyvu krain jeŭraatłantyčnaha błoka.
«Pierachod da jaho vielmi stresavy i dramatyčny. A pa-inšamu i nie moža być», — skazaŭ Łukašenka, namiokam apraŭdvajučy vajnu va Ukrainie.
U toj ža čas Alaksandr Łukašenka ŭ charakternaj dla siabie niepramoj maniery zajaviŭ pra niežadańnie ŭklučacca ŭ pramyja vajennyja dziejańni va Ukrainie, ukłaŭšy hetuju dumku ŭ vusny nibyta nataŭskaha hienierała: «U nas na rukach zakrytaja infarmacyja. My dakładna viedajem, što dumaje z hetaj nahody načalnik Hienieralnaha štaba adnoj z krain-členaŭ NATA: «My nie zmahli ŭciahnuć Biełaruś u kanflikt. Aktyŭny ŭdzieł Minska ŭ vajnie padarvaŭ by režym u Biełarusi i Alaksandra Łukašenku. Hetaja mahčymaść usio jašče adkrytaja».
«Nam vajna nie patrebnaja, tamu my pavinny być da jaje hatovyja i mientalna, i stratehična. Što tyčycca ŭśviedamleńnia surjoznaści momantu. Adkiniem usie iluzii ab mahčymaści dypłamatyčnaha ŭrehulavańnia hłabalnaha kanfliktu. Nie ŭ siłach źniać napružańnie i mižnarodnaje prava», — dadaŭ Łukašenka.
Čytajcie taksama:
Chrenin: Savieckija voiny sarvali płany Zachadu ŭ Afhanistanie
Siły śpiecapieracyj praciahvajuć znachodzicca na ŭkrainskaj miažy
Łukašenka davioŭ hienierałam, što Polšča i Litva značna horšyja navat za vajnu va Ukrainie
A ciapier "Rychtuj vajnu"???!!!