Čamu aficyjnaja viersija zatrymańnia «dyviersantaŭ SBU» vyhladaje niepraŭdziva. Važnyja padrabiaznaści
Prapahanda vypuściła videa, na jakim pakazvajuć dopyt tych, kaho pradstaŭlajuć jak ukrainskich dyviersantaŭ, a taksama ich rečy — jakija jany byccam musili pranieści praź miažu. BYPOL patłumačyŭ, čamu nie vieryć u aficyjnuju viersiju, a «Naša Niva» adšukała jašče niekalki niestykovak.
Zatrymanyja padčas apieracyi KDB u Lelčyckim rajonie. Skrynšot z praŭładnaha kanału
Pa mierkavańni BYPOL, toje, što na videa vydajuć za vybuchoŭku — tolki mulažy.
«Aficer KDB tłumačyć, što płastykavy korpus abstalavany vybuchovym rečyvam kala paŭtara-dvuch kiłahramaŭ, i adrazu ž palcami pavaročvaje jaho. To-bok vybuchovaha rečyva tam, chutčej za ŭsio, niama — było b fizična składana jaho tak krucić u rukach.
Momant ź videa, kali kedebist varočaje toje, što na BT nazyvajuć bombaj
Toje samaje z himnastyčnym matam. Miarkujučy pa dyjamietry i tym, što pakazvaje vajskoviec, tam musić być razy ŭ dva bolš vybuchoŭki, čym u kantejniery. Ale supracoŭnik biez asablivaj napruhi padymaje jaho dałońniu, niahledziačy na dyjamietr — pasprabujcie tak zrabić chacia b z dvuchlitrovaj butelkaj.
Momant na videa, kali kedebist padchoplivaje toje, što nazyvajuć «tubusam z vybuchoŭkaj»
Taja ž situacyja z tym, što vydajuć za kasietnyja bojeprypasy: jany važać pa dva z pałovaj kiło, a supracoŭnik uvohule padymaje ich dvuma palcami».
Momant, kali kedebist padymaje palcami toje, što ŭ videa nazyvajuć «kasietnym bojeprypasam»
Taksama ŭ bajpołaŭcaŭ jość pytańni da ryštunku. Naprykład, u videa pakazvajuć pulty dystancyjnaha ŭzvodu, akumulatary dy inšy ryštunak takoha kštałtu. Bajpołaŭcy kažuć, što kampanienty — heta niejkaja salanka: «Adčuvańnie takoje, što heta rabili nie śpiecsłužby dziaržavy, jakaja vajuje i robić heta ŭ pramysłovych maštabach, a byccam ich nabyli na niejkaj barachołcy abo paprostu dastali sa schronaŭ KDB».
Vyhlad rečaŭ, jakija ŭ videa nazyvajuć kampanientami dla stvareńnia bombaŭ
Da taho ž bajpołaŭcy adznačajuć, što prafiesijnyja śpiecsłužbisty nie zachoŭvajuć bomby hatovymi, bo heta niebiaśpiečna. Pa viersii kedebešnikaŭ, vybuchoŭka na vyjavach byccam by adrazu hatovaja dy prymianieńnia.
Taksama ich ździŭlaje toje, što zatrymanamu Siarhieju Kabarčuku davieryli takuju adkaznuju spravu, choć va Ukrainie jamu pahražała šmathadovaje źniavoleńnie. Heta dziŭna, kali jon moh prosta ŭ luby momant źbiehčy i nie siadzieć svoj termin. Taksama pytańni vyklikaje toje, što jon pajšoŭ na zadańnie razam z synam, jaki taksama byŭ pad śledstvam. Jany mahli źbiehčy ŭdvaich i zdacca biełaruskim siłavikam.
Zatrymanyja Siarhiej i Pavieł Kabarčuki (źleva naprava)
BYPOL adznačaje, što dyviersanty rehularna ździajśniajuć ataki na terytoryi Rasii i FSB nijak nie moža ich złavić, a biełaruskija kedebisty byccam biez prablem vyličyli prafiesijanalnych ahientaŭ. Heta, pa mierkavańni byłych siłavikoŭ, vyhladaje niepraŭdziva.
Jašče adna akaličnaść — toje, što, kali mierkavać pa sacsietkach, biełarus Vital Ułasiuk — adkryty prychilnik «ruskaha śvietu» va ŭsich sacsietkach (pra heta my pisali raniej). Dziŭna, kab ukrainskaja śpiecsłužba ŭklučyła jaho choć u niejkuju apieracyju, nie pravieryŭšy.
Skrynšot sa staronki Vitala Ułasiuka
BYPOL zaŭvažaje: niezrazumieła, jak dyviersanty kaardynavali svaje dziejańni i jak uvohule musili sustrecca ŭ Biełarusi. Racyj ci inšych srodkaŭ suviazi, akramia smartfonaŭ, u videa nie pakazvajuć.
Dziŭna, zaznačaje BYPOL, što «ahienty SBU» ŭ pachod na sutki nie ŭziali z saboj ani ježy, ani vady. Zatoje bieraściejec Ułasiuk «na spravu» nabraŭ niečakanych rečaŭ — naprykład, malitoŭnik (na fota — sini) i ružovyja dziciačyja nažnicy.
Rečy, jakija kanfiskavali ŭ bieraściejca Ułasiuka
«Naša Niva» zaŭvažyła jašče try admietnyja akaličnaści.
Pa-pieršaje, publična dastupnyja numary ludziej, jakich pakazvajuć u videa, «prabivali» ŭ rasijskim servisie, jaki nazyvajecca «Voka Boha». Im karystajucca, siarod inšaha, śpiecsłužby Rasii i Biełarusi.
Naprykład, numar zatrymanaha Paŭła Kabarčuka prahladali z dapamohaj funkcyi «Pašyrany pošuk» (vykarystoŭvajecca, kali na čałavieka niedastatkova infarmacyi) naprykancy minułaha hoda, a numar bieraściejca Vitala Ułasiuka — pazaŭčora dniom, užo paśla abjaŭlańnia antyterarystyčnaj apieracyi ŭ Lelčyckim rajonie, ale da taho, jak jahonaje imia stała publičnym.
Skrynšoty z servisa «Voka Boha»
Hetuju funkcyju treba aktyvavać dadatkova, jana płatnaja. Možna vykazać zdahadku, što śpiecsłužby nasamreč daŭno ich «viali» i prosta viedali, chto i kali budzie pierachodzić miažu z ukrainskaha boku.
Pa-druhoje, na videa Siarhiej Kabarčuk kaža, što suprać jaho zaviali kryminalnuju spravu pa artykule 309 KK Ukrainy (heta «narkatyčny» artykuł, anałah pieršaj častki biełaruskaha 328 KK RB). Jon śćviardžaje, što, maŭlaŭ, za heta jamu pahražała ad dzieviaci da dvanaccaci hadoŭ. Ale samaja surovaja sankcyja hetaha artykuła va Ukrainie praduhledžvaje pakarańnie ad piaci da vaśmi hadoŭ.
Skrynšot z Kryminalnaha kodeksu Ukrainy. Navat treciaja častka artykuła praduhledžvaje da vaśmi hadoŭ turmy
Nasamreč abodvuch mužčyn abvinavačvajuć zusim pa inšych artykułach — č. 3 art. 307 KK Ukrainy, č. 3 art. 15, č. 2 art. 305, č. 3 art. 15, č. 3 art. 305. Heta kantrabanda narkotykaŭ arhanizavanaj hrupaj abo ŭ asabliva bujnym pamiery i zamach na ichni raspaŭsiud. Za heta im sapraŭdy pahražała da 12 hadoŭ.
U siužecie dziaržaŭnaha telebačańnia kažuć, što za pieravozku vybuchoŭki SBU abiacała ci to «zakryć spravu», ci to dźvie tysiačy dalaraŭ.
Nasamreč abodvuch mužčyn vypuścili pad zakład pa rašeńni suda, a sprava išła jak idzie — 21 lutaha musiŭ adbycca jašče adzin sud pa vybary miery strymańnia. Nieviadoma, chto ŭnios zakład, ale abodva Kabarčuki byli vinnyja vialikija sumy hrošaŭ, pa niekalki socień tysiač hryŭniaŭ kožny.
Apisańnie ichniaj spravy z Adzinaha rejestru sudovych rašeńniaŭ Ukrainy
Pa-treciaje, mierkavanyja dyviersanty SBU ź liku ŭkraincaŭ — ludzi z sumniŭnaj bijahrafijaj, jakija znachodziacca pad śledstvam pa ciažkim artykule. Małaimavierna, kab SBU daviaraŭ takim nienadziejnym ludziam kaštoŭnyja pasyłki nakštałt vybuchoŭki, jakuju jany nibyta musili pierapravić u Biełaruś dla ździajśnieńnia teraktaŭ u Rasii.
Taksama admietna, što Pavieł Kabarčuk užo pryciahvaŭsia va Ukrainie da administratyŭnaj adkaznaści za niezakonnaje pierasiačeńnie miažy ź Biełaruśsiu ŭ 2017-m hodzie.
Infarmacyja pra administratyŭnuju spravu nad Paŭłam Kabarčukom za pierasiačeńnie miažy
«Naša Niva» — bastyjon biełaruščyny
PADTRYMAĆČytajcie taksama:
«Sprava AHSB»: jak KDB arhanizoŭvaŭ «terakty»
U KDB raskazali, što nibyta zatrymali ŭ Lelčyckim rajonie dyviersantaŭ SBU
