«Nie byŭ chamam». Za zdradu dziaržavie sudziać padpałkoŭnika, jaki «pieražyvaŭ za Ukrainu»
U Minskim haradskim sudzie pačynajecca praces nad padpałkoŭnikam Uzbrojenych sił Biełarusi Antonam Čaramnych, jakoha bolš za hod trymajuć pad vartaj.
Fota: Źviazda
Anton Čaramnych — čarhovy vajskoviec, jaki paśla padziej 2020 hoda stanie pierad sudom pavodle artykuła ab zdradzie dziaržavie. Radyjo Svaboda pahavaryła z čałaviekam, jaki viedaŭ Čaramnych padčas słužby ŭ biełaruskim vojsku i maje svaju viersiju taho, čamu ŭźnikła abvinavačańnie pavodle «śmiarotnaha 356 artykuła».
Pavodle pravaabaroncaŭ «Viasny», vajskoŭca vinavaciać u zdradzie dziaržavie (č. 2 artykuła 356 Kryminalnaha kodeksu) i raspalvańni inšaj sacyjalnaj varožaści (č. 3. artykuła 130 KK). Čaramnych pahražaje da 20 hadoŭ źniavoleńnia, sud nad vajskoŭcam budzie zakryty. Praces viadzie sudździa Siarhiej Kacar.
«Nie byŭ chamam i dziaržymordam»
Padpałkoŭnik Anton Čaramnych słužyŭ namieśnikam pa ideałahičnaj pracy 310-j hrupy artyleryi 120-j asobnaj hvardziejskaj miechanizavanaj bryhady. Jaho aryštavali ŭ studzieni 2023 hodu ŭ vajskovym haradku Baroŭka ŭ Lepielskim rajonie i z taho času trymajuć u SIZA na Vaładarskaha.
Hetuju infarmacyju pravaabaroncam paćvierdziŭ čałaviek, jaki byŭ z Čaramnych u adnoj kamiery. Pavodle hetaj krynicy, spačatku Antona Čaramnych padazravali pa 130 artykule (raspalvańnie rasavaj, nacyjanalnaj albo inšaj varažniečy. — RS), ale paźniej u abvinavačańni źjaviŭsia i artykuł ab zdradzie dziaržavie. Akaličnaści spravy Čaramnych i jahonaje staŭleńnie da abvinavačańnia zastajucca nieviadomyja.
Pra padpałkoŭnika Čaramnych na ŭmovach ananimnaści Svabodzie raskazaŭ były vajskoviec, jaki byŭ znajomy ź im padčas słužby ŭ biełaruskim vojsku.
«Anton — adekvatny, kulturny čałaviek i aficer. Z maralnymi i čałaviečymi pryncypami. Mahčyma, niekatoryja aficery ŭsprymali jaho jak dastatkova miakkaha, ale tut chutčej toj momant, što jon nie byŭ chamam i dziaržymordam, jak niekatoryja», — raskazała krynica Svabody.
Surazmoŭca taksama zhadaŭ vodhuki pra Antona Čaramnych, jakija bačyŭ u miedyja nieŭzabavie paśla aryštu padpałkoŭnika.
«Pamiataju jak u ŚMI pisali pra jaho, i vidać było, što vykazvalisia byłyja jahonyja terminoviki (vajskoŭcy terminovaj słužby. — RS). Tam była nie zusim pachvalnaja infarmacyja pra jaho, ale tut treba raźmiažoŭvać. Kali kamandzir padtrymlivaje dyscyplinu ŭ mužčynskim kalektyvie, jaki składajecca nie z chłopčykaŭ-zajčykaŭ, i kali aficer pieravyšaje paŭnamoctvy. Dyk voś adnosna Antona: jon — heta pieršy prykład».
Pavodle źviestak inšaha vajskoŭca, ź jakim u sakaviku 2023 hodu havaryŭ karespandent «Lusterka», Anton Čaramnych u 2020 hodzie padpisvaŭsia za alternatyŭnaha kandydata na pasadu prezidenta. A paśla 2022 hoda nie chavaŭ, što nie padtrymlivaje vajny, jakuju pačała Rasija suprać Ukrainy.
«Pryniaŭ vajnu va Ukrainie vielmi blizka da serca», — kazaŭ pra padpałkoŭnika Čaramnych čałaviek, ź jakim razmaŭlała «Lusterka». Surazmoŭca Svabody hetyja źviestki nie paćvierdziŭ, ale i nie abvierh.
«Nakont hetaha ničoha nie skažu. Tearetyčna moh vykazvacca adnosna Ukrainy. Ale za takoje naŭrad ci sadžajuć, inkryminujučy zdradu dziaržavie, navat łukašysty. Tym bolš Anton u vojsku daŭno. Nie dumaju, što jon nie viedaŭ, što varta publična kazać, a što nie», — miarkuje znajomy źniavolenaha.
Surazmoŭca Svabody maje svaju viersiju nakont taho, adkul u śledstva mahło zjavicca abvinavačańnie ŭ zdradzie dziaržavie.
«Chutčej za ŭsio, tam budzie jaki-niebudź čat-bot u nexta, ci Motolko, ci Hajun. Dla vajskoŭcaŭ heta adnaznačna inkryminujecca jak supraca z zamiežnymi śpiecsłužbami».
«Mahčyma, unutry pieražyvajuć, ale nie pakazvajuć»
Anton Čaramnych — syn aficera Aleha Čaramnych, jaki vajavaŭ u Afhanistanie. Los baćki paŭpłyvaŭ na vybar žyćciovaha šlachu. Anton skončyŭ biełaruskuju Vajskovuju akademiju pa śpiecyjalnaści «maralna-psichałahičnaje zabieśpiačeńnie vajskovaj dziejnaści», słužyŭ u 120-j asobnaj miechanizavanaj bryhadzie, jakaja dysłakujecca ŭ Minsku. Pavodle byłych tavaryšaŭ pa słužbie, paśla 2020 hoda jon mieŭ dumki nakont zvalnieńnia z vojska, ale vyrašyŭ dačakacca zakančeńnia kantraktu. Miž tym u svajoj častcy aficer byŭ na dobrym rachunku, pra što śviedčyć repartaž, jaki ŭ sakaviku 2022 hodu źjaviŭsia ŭ haziecie «Źviazda». Voś jak namieśnik kamandzira pa ideałahičnaj pracy Anton Čaramnych apisvaŭ mikraklimat u kalektyvie vajskoŭcaŭ terminovaj słužby ŭ suviazi ź niadaŭnimi padziejami:
«Ja b nie skazaŭ, što mižnarodnaja abstanoŭka peŭnym čynam na ich skazvajecca. Mahčyma, unutry jany pieražyvajuć, ale, va ŭsiakim razie, nie pakazvajuć hetaha. Takich vajennasłužačych, jakija b panikavali, dakładna niama. U hetym kirunku tryvała pracujuć aficery, kožny na svaim uzroŭni raskazvaje ab vajenna-palityčnaj abstanoŭcy, tłumačyć detali», — raskazvaŭ Anton Čaramnych praź miesiac ad pačatku vajny va Ukrainie.
Jak Anton Čaramnych stavicca da vystaŭlenaha jamu abvinavačańnia, nieviadoma. Pravaabarončy centr «Viasna» nie ŭnios imia aficera ŭ śpis palityčnych viaźniaŭ.
Pavodle źmienaŭ u 356 artykuł Kryminalnaha kodeksu, jakija byli ŭniesienyja letaś u sakaviku, zdrada dziaržavie słužbovaj asobaj albo vajskoŭcam ciapier karajecca ŭ tym liku śmierciu. Adnak pravaabaroncy źviartajuć uvahu na toje, što źmiena była ŭniesienaja ŭžo paśla aryštu Antona Čaramnych, tamu śmiarotnaja kara na jaho raspaŭsiudžvacca nie moža.
U padpałkoŭnika Čaramnych na voli zastalisia žonka i dvoje niepaŭnaletnich dziaciej.
Samy vialiki termin źniavoleńnia siarod vajskoŭcaŭ, jakich asudzili za zdradu dziaržavie, 18 hadoŭ kałonii, atrymaŭ kapitan Hienštaba Ŭzbrojenych sił Dzianis Urad, jaki ŭ 2020 hodzie vydaŭ źviestki pra padrychtoŭku vajskovych padraździaleńniaŭ da razhonu pratestoŭcaŭ.
Pravaabaroncam viadoma, što ŭ Biełarusi z taho času pavodle 356 artykuła asudzili sama mieniej 44 čałavieki, ź ich dvaich — zavočna. Jašče minimum dziesiać biełarusaŭ utrymlivajuć pad vartaj u čakańni sudu ci pad sudom. Adznačajecca, što ŭ pieravažnaj bolšaści sudy pa 356-m artykule KK prachodziać u zakrytym režymie.
Čytajcie taksama:
Maładuju mieniedžarku EPAM, jakaja viarnułasia z Hruzii, buduć sudzić za «finansavańnie vajny»
