«Pracavać na karyść Radzimy». Homielski deputat nie dačakaŭsia zakančeńnia paŭnamoctvaŭ i źjechaŭ u Rasiju
Deputat Homielskaha harsavieta, dyrektar filijała «Homielskija ciepłavyja sietki» RUP «Homielenierha» Michaił Pačynok źjechaŭ ź Biełarusi. Pierad hetym jon «syšoŭ u cień» — z pačatku vosieni presa pra jaho nie pisała, zaŭvažyŭ «Fłahštok».
Michaił Pačynok. Fota: administracyja Savieckaha rajona Homiela
Jak stała viadoma «Fłahštoku», u kancy vosieni 2023 hoda Pačynok niečakana dla padnačalenych zvolniŭsia z pasady kiraŭnika pradpryjemstva «pa ŭłasnym žadańni». Jahonaja žonka Natalla Pačynok tady ž zvolniłasia z pasady načalnicy servisna-raźlikovaha centra «Enierhazbytu» RUP «Homielenierha».
Termin deputackich paŭnamoctvaŭ Pačynka jašče nie skončyŭsia — jak farmalny pradstaŭnik vybarščykaŭ Savieckaha rajona Homiela jon pavinien pravodzić pryjomy hramadzian i dapamahać vyrašać ich prablemy. Ale, jak udakładniŭ «Fłahštok», svaje deputackija abaviazki Pačynok nie vykonvaje.
Na zvanok ad imia vybarščyka, jaki choča zapisacca na pryjom da deputata, u administracyi Savieckaha rajona Homiela adkazali:
«Michaił Michajłavič, na žal, za miežami Respubliki Biełaruś. Jon pakul nie prymaje. Jon, viadoma, praciahvaje zastavacca dziejnym deputatam, ale kali kamandziroŭka ŭ čałavieka ci inšyja abstaviny składvajucca… Pakul jon u Rasijskaj Fiederacyi, pakul pryjomu nie budzie. Kali pryjedzie ŭ toj čas, pakul jon jašče budzie dziejnym deputatam, to pryjom praviadzie».
Apošniaja zhadka Michaiła Pačynka była zafiksavanaja ŭ haziecie Homielskaha harvykankama 6 vieraśnia. Tady jon z pafasam razvažaŭ pra toje, jak «važna być patryjotami i pracavać na karyść Radzimy».
Skrynšot sajta haziety «Homielskija viedamaści»
Brat deputata Aleh Pačynok z 2016 hoda žyvie ŭ Rasii. Jon zajmaje pasadu hienieralnaha dyrektara ZAT «UK «Evalucyja» (daččynaja kampanija rasijskaj «Transnafty») u Maskvie. Pierad hetym jon zrabiŭ karjeru čynoŭnika ŭ Homieli: zajmaŭ pasady hienieralnaha dyrektara Homieltransnafty «Družba», namieśnika staršyni abłvykankama, byŭ kiraŭnikom Čyhunačnaha i Navabielickaha rajonaŭ Homiela. U 2020 hodzie, znachodziačysia ŭ Rasii, u praŭładnym čacie jon raskazvaŭ, jak nieabchodna zmahacca z pratestami ŭ Biełarusi.
Čytajcie taksama:
Bresckaja deputatka parłamienta išła na pieravybary — ale raptoŭna źniała svaju kandydaturu
Kolki zarablajuć łukašenkaŭskija deputaty ŭ pravincyi? Ich dachodam pazajzdrościać mnohija
Hałasuj nie hałasuj. Spoviedź byłych deputataŭ pra toje, jak Łukašenka pryznačaŭ ich u parłamient
