«Fantastyčnaja suma $56 miljardaŭ». Sud u ZŠA anulavaŭ zarobak Maska ŭ kampanii Tesla
Ahulny zarobak Maska ŭ 2021 hodzie prykładna ŭ šeść razoŭ pieravyšaŭ sukupny zarobak 200 samych vysokaapłatnych kiraŭnikoŭ śvietu.
Iłan Mask. Fota: Dimitrios Kambouris / Getty Images
Sudździa ŭ amierykanskim štacie Dełaver anulavała pastanovu Rady dyrektaraŭ kampanii Tesla, jakaja ŭ 2018 hodzie pastanaviła vypłacić Iłanu Masku 55,8 młrd dalaraŭ u jakaści ŭznaharodžańnia za pracu ŭ kiraŭnictvie kampanii, piša Bi-bi-si.
Źjaŭlajučysia hienieralnym dyrektaram i najbujniejšym akcyjanieram vytvorcy elektramabilaŭ, Mask nie atrymlivaje zarobak jak taki. Zamiest hetaha jaho ŭznaharodžańnie pryviazana da asnoŭnych pakazčykaŭ pracy kampanii, takim, jak košt akcyj i prybytkovaść.
Košt jaho pakieta, raźličanaha na 10 hadoŭ, ciapier składaje kala 51 młrd dalaraŭ — z ulikam źmieny koštaŭ akcyj Tesla.
Uznaharodu Maska asprečyŭ u sudzie adzin ź minarytarnych akcyjanieraŭ Tesla Ryčard Tarneta, jakomu naležać usiaho dzieviać akcyj Tesla.
Jon zapatrabavaŭ admianić vypłatu, pakolki, pa jaho słovach, akcyjaniery nie atrymali dastatkova infarmacyi ab tym, ci sapraŭdy Mask svajoj pracaj zasłužyŭ takuju hihanckuju sumu.
Jašče adzin arhumient jurystaŭ pazoŭnika zaklučaŭsia ŭ tym, što Rada dyrektaraŭ pavinna była dziejničać u intaresach akcyjanieraŭ i prapanavać Masku mienšuju sumu vypłaty. Na dumku Tarnety, ad Maska taksama pavinny byli zapatrabavać, kab jon pracavaŭ u Tesla poŭny pracoŭny dzień, nie rastračvajučysia na inšyja prajekty, a kali b jon na takija ŭmovy nie pajšoŭ, znajści inšaha hienieralnaha dyrektara.
Amit Batyš z daśledčaha centra Equilar (jon sočyć za ŭznaharodžańniami top-mieniedžaraŭ bujnych karparacyj) u 2022 hodzie padličyŭ, što ahulny zarobak Maska ŭ 2021 hodzie prykładna ŭ šeść razoŭ pieravyšaŭ sukupny zarobak 200 samych vysokaapłatnych kiraŭnikoŭ śvietu.
Pryznačanaja suma stała najbujniejšaj u karparatyŭnaj historyi Złučanych Štataŭ. Jana dapamahła jamu stać samym bahatym čałaviekam u śviecie. Pavodle acenak Bloomberg i Forbes, na listapad 2023 hoda majomaść Maska składaje ad 198 da 220 młrd dalaraŭ.
Sudovamu pracesu, jaki pačaŭsia ŭ listapadzie 2022 hoda, papiaredničali niekalki hadoŭ jurydyčnych sprečak, padčas jakich baki sprabavali vyrašyć prablemu, nie davodziačy jaje da suda.
Rada dyrektaraŭ Tesla zajaŭlała, što takaja vielizarnaja suma pavinna prymusić Maska nadavać kampanii naležnuju ŭvahu.
Mask nie tolki ŭznačalvaje kampaniju Tesla, ale kiruje niekalkimi inšymi maštabnymi prajektami. U tym liku jon vałodaje kaśmičnaj kampanijaj SpaceX i sacyjalnaj sietkaj Ch (Twitter).
Masku taksama naležyć firma Neuralink, jakaja zajmajecca raspracoŭkaj aparatury, jakaja dazvalaje ŭžyvić u mozh čałavieka čyp dla suviazi z kamputaram.
Adnak sudździa Ketlin Mak-Kormik z pazicyjaj Rady dyrektaraŭ Tesla nie pahadziłasia. U 201-staronkavaj pastanovie, apublikavanaj 30 studzienia, jana adznačyła, što «stymulavańnie» cikavaści Maska nie było asnoŭnaj pryčynaj pryniataj dyrektarami pastanovy ab vypłacie takoj vielizarnaj sumy.
Na jaje dumku, hetyja ludzi akazalisia pad hipnozam zornaha statusu svajho čaściakom supiarečlivaha hienieralnaha dyrektara i nie dali akcyjanieram kampanii dastatkovaj infarmacyi dla apraŭdańnia svajho rašeńnia.
Paśla abviaščeńnia pastanovy, advakat Tarnety apublikavaŭ zajavu, u jakoj havaryłasia, što «heta byŭ dobry dzień dla dobrych ludziej».
Iłan Mask adreahavaŭ na pastanovu sudździ adnym adzinym u sacsietcy X (tak jon pieranazvaŭ tvitar): «Ni ŭ jakim razie nie rehistrujcie svaju kampaniju ŭ štacie Dełavier».
Za hetym było jašče adno paviedamleńnie: «Ja raju rehistravać kampanii ŭ Nievadzie, abo Techasie, kali vy chočacie, kab jaje pytańni vyrašali akcyjaniery».
Zatym jon paprasiŭ svaich fałovieraŭ u Ch uziać udzieł u apytańni, ci nie varta Tesla pierarehistravacca ŭ Techasie, dzie znachodzicca jaje štab-kvatera?
Mnohija bujnyja kampanii, uklučajučy i hihanta internet-handlu Amazon, zarehistravanyja ŭ štacie Dełaver, viadomym nizkimi padatkami.
Čytajcie taksama:
Kampanija Maska ŭpieršyniu ŭžyviła mikračyp u mozh čałavieku
«Techas — naš!» ANT apublikavaŭ fejkavy dopis Maska
Mask zajaviŭ, što ni ŭ jakim razie nie budzie hałasavać za Bajdena
