Fizik, bard i šmatdzietny baćka — chto taki Barys Nadzieždzin, za vyłučeńnie jakoha ŭ Rasii ludzi stajać u čerhach, kab pakinuć svoj podpis
Padavałasia, što prezidenckaja elektaralnaja kampanija ŭ Rasii nie pryniasie ničoha cikavaha. Ale ŭ apošnija dni ŭ internecie stali pašyracca kadry, na jakich vidać čerhi ludziej la punktaŭ zboru podpisaŭ za vyłučeńnie ŭ kandydaty na vybarach Barysa Nadzieždzina. Raskazvajem, čym jon admietny.
Barys Nadzieždzin. Fota: staronka palityka ŭ VKantakcie
Chto padtrymlivaje Nadzieždzina
U padtrymku Barysa Nadzieždzina vykazaŭsia Michaił Chadarkoŭski. «Pastaŭcie podpis za Barysa Nadzieždzina. U vas zastałosia mienš za tydzień, kab takim čynam vykazać svaju antyvajennuju pazicyju, navat kali Nadzieždzin — nie vaš kandydat», — napisaŭ palityk u svaim telehram-kanale.
Sajt Barysa Nadzieždzina.
Paplečnica Alaksieja Navalnaha Luboŭ Sobal u X (Twitter) napisała: «Nie źmianiajučy svajho staŭleńnia da Nadzieždzina, dałučajusia da zaklikaŭ pakinuć za jaho podpis. Podpis nie roŭna hałasavańnie i nie abaviazvaje taho, chto padpisaŭ, ni da čaho, ale jon daje mahčymaść pakazać, što ŭ rasijskaha hramadstva jość zapyt na palityčnaje pradstaŭnictva i novyja hałasy».
Jak piša BBC, pakinuć podpis za Nadzieždzina zaklikajuć i inšyja čalcy kamandy Navalnaha — Hieorhij Ałburaŭ i Rusłan Šaviedździnaŭ. U padtrymku zboru vykazalisia palitołah Kaciaryna Šulman, błohiery Maksim Kac i Illa Varłamaŭ, žurnalistka Kaciaryna Duncova, jakaja taksama źbirałasia ŭdzielničać u vybarach, ale CVK jaje nie zarehistravaŭ.
U štabach pa zbory podpisaŭ za Nadzieždzina miascovyja apazicyjaniery. Siarod ich — demakraty z 1990-ch, byłyja i siońniašnija členy partyi «Jabłoko», eks-členy likvidavanaj u 2023 hodzie Partyi narodnaj svabody (PARNAS), jakaja vyražała intaresy šmattysiačnych mitynhaŭ «Za česnyja vybary» ŭ 2011-2013 hadach.
Takoje raznastajnaje koła palitykaŭ i aktyvistaŭ, jakija nie zaŭsiody ładziać pamiž saboj, ale ciapier hurtujucca vakoł Barysa Nadzieždzina, u peŭnaj stupieni adlustroŭvaje jahony palityčny šlach apošnich 35 hadoŭ. Nadzieždzina za hety čas kidała šmat kudy, a tamu dla ŭsich libieralnych apanientaŭ pucinskaha režymu jon adnačasova i nie vielmi svoj, i nie vielmi čužy. Karaciej, kampramisnaja fihura. Chto ž jon taki i adkul uziaŭsia?
Spačatku pra asabistaje
Maci naradziła Barysa dastatkova rana (u 20 hadoŭ) u Taškiencie ŭ 1963 hodzie, a praz try hady siamja pierajechała ŭ Daŭhaprudny pad Maskvoj.
Barys Nadzieždzin byŭ trojčy žanaty, maje čatyroch dziaciej. Pieršaja dačka naradziłasia ŭ 1982 hodzie, a apošni syn — u 2013 hodzie, kali Barys užo byŭ dziedam.
Chobi Nadzieždzina — aŭtarskaja pieśnia. Jon vypuściŭ čatyry dyski ŭłasnych pieśniaŭ. Taksama palityk nie chavaje, što zachaplajecca kampjutarnymi hulniami i pieražyŭ dva infarkty mijakardu (2008 i 2019 hady).
Ad zachapleńnia fizikaj da palityki
Barys ź dziacinstva prajaŭlaŭ zdolnaści da fiziki, skončyŭ śpiecyjalizavanuju škołu-internat fizika-matematyčnaha profilu, a zatym z adznakaj Maskoŭski fizika-techničny instytut. Nadzieždzin chutka abaraniŭ kandydackuju dysiertacyju i staŭ navukovym supracoŭnikam Usiesajuznaha navukovaha centru pa vyvučeńni ŭłaścivaściaŭ pavierchni vakuumu.
U časy pierabudovy ŭ 1988 hodzie Nadzieždzin zasnavaŭ kaapieratyŭ «Intehrał» (zajmaŭsia repietytarstvam i vydańniem vučebnaj litaratury), a ŭ 1990 hodzie staŭ deputatam Daŭhaprudskaha harsavieta. U kastryčniku 1991 hoda jon dałučyŭsia da Ruchu demakratyčnych reformaŭ, lidarami jakoha byli Haŭryił Papoŭ i Anatol Sabčak.
Paźniej (u 1993 hodzie) Nadzieždzin atrymaŭ jurydyčnuju adukacyju, pracavaŭ u Fondzie majomaści Maskoŭskaj vobłaści, byŭ namieśnikam dyrektara Instytuta strukturnaj i inviestycyjnaj palityki ŭ Maskvie.
U 1997-1998 hadach Barys Nadzieždzin byŭ daradcam tahačasnaha namieśnika staršyni ŭrada Rasii Barysa Niamcova, pamočnikam staršyni ŭrada Siarhieja Kiryjenki. U 1999 hodzie staŭ deputatam Dziaržaŭnaj dumy ad błoka «Sajuz pravych sił», byŭ namieśnikam staršyni frakcyi ŭ parłamiencie, jakuju ŭznačalvaŭ Barys Niamcoŭ.
Barys Nadzieždzin i Siarhiej Kiryjenka. Fota: staronka palityka ŭ VKantakcie
Deputactva ŭ Dziarždumie stała pakul pikam palityčnaj karjery Nadzieždzina. Paźniej jon sprabavaŭ znoŭ tudy patrapić, ale nie zdoleŭ. U 2007 hodzie marnaj była i sproba stać deputatam Maskoŭskaj abłasnoj dumy. Tolki ŭ 2019 hodzie Barys Nadzieždzin byŭ abrany ŭ haradski saviet Daŭhaprudnaha ad partyi «Adzinaja Rasija».
Akramia palityčnaj dziejnaści, Nadzieždzin da 2016 hoda ŭznačalvaŭ kafiedru prava Maskoŭskaha fizika-techničnaha instytuta.
Na vybarach u Dziaržaŭnuju dumu ŭ 2021 hodzie Nadzieždzin byŭ kandydatam ad partyi «Spraviadlivaja Rasija». Sustaršynia partyi Zachar Prylepin vykazvaŭ niezadavolenaść hetym, bo ličyŭ, što prahramnyja idei partyi nie adpaviadajuć libieralnym pohladam Nadzieždzina. U vyniku vybary Barys prajhraŭ.
U 2023 hodzie Nadzieždzin vyłučaŭ svaju kandydaturu na vybarach hubiernatara Maskoŭskaj vobłaści ad partyi «Hramadzianskaja inicyjatyva», ale jamu admovili ŭ rehistracyi.
U śniežni 2023 hoda Barys Nadzieždzin byŭ vyłučany kandydatam na prezidenckija vybary ad partyi «Hramadzianskaja inicyjatyva».
Palityčnyja pohlady
U bijahrafii Nadzieždzina jość pieryjad z 2008 pa 2011 hod, kali jon uvachodziŭ u Fiederalny palityčny saviet pravacentrysckaj partyi «Pravoje dieło» Michaiła Procharava i byŭ lidaram maskoŭskaha abłasnoha adździaleńnia.
U toj čas jon vystupiŭ z nacyjanalistyčnymi łozunhami kštałtu «Padmaskoŭje — heta ruskaja ziamla» i zajavaju, što ŭ maskoŭskaje abłasnoje adździaleńnie partyi ŭstupajuć aficery i «maładyja brytahałovyja». U vyniku niekatoryja členy partyi prapanoŭvali vyklučyć Nadzieždzina ź jaje šerahaŭ.
U kancy śniežnia 2011 hoda Nadzieždzin pakinuŭ partyju. A ŭ lutym 2012 hoda jon adpraviŭ u pieradvybarnyja štaby ŭsich kandydataŭ na prezidenckich vybarach prapanovu stać davieranaj asobaj. U vyniku Nadzieždzin staŭ davieranaj asobaj Siarhieja Mironava.
Telehledaču Nadzieždzin viadomy jak udzielnik roznych palityčnych šou, dzie vykazvaje apazicyjnyja pohlady. Naprykład, u sakaviku 2023 hoda ŭ pieradačy «Miesca sustrečy» na NTB Nadzieždzin vykazaŭsia kateharyčna suprać raźmiaščeńnia ŭ Biełarusi jadziernaj zbroi.
A jahonaja dumka, što Łukašenka, «kali tut budzie kryzis ci smuta ŭ Rasii, pieršy pabiažyć z našaj jadziernaj zbrojaj zdavacca na Zachad» vyklikała burnuju reakcyju Vadzima Hihina.
U mai 2023 hoda ŭ efiry fiederalnaha telekanała «NTV» Nadzieždzin skazaŭ:
«Pry ciapierašnim palityčnym režymie nam nie śviecić viarnucca ŭ Jeŭropu. Treba prosta vybrać inšaje kiraŭnictva krainy, jakoje spynić hetuju historyju z Ukrainaj i vybuduje narmalnyja adnosiny ź jeŭrapiejskimi krainami».
Čytajcie jašče:
U Rasii vystrojvajucca čerhi, kab padpisacca za kandydata Nadzieždzina
