«U mianie samaja darahaja chvaroba ŭ śviecie». Biełaruski stendapier raskazaŭ pra strašnaje zachvorvańnie
Alaksandr Kalinkin raskazaŭ, što chvory na SMA — śpinalnuju myšačnuju atrafiju.
«U mianie samaja darahaja chvaroba ŭ śviecie — śpinalnaja myšačnaja atrafija. Kali koratka, to ŭ mianie pastupova admirajuć usie myšcy ŭ arhaniźmie, pačynajučy ad ruk, noh, śpiny, serca. A dalej — vy viedajecie.
Navat takija prostyja rečy, jak ustać z kresła ci padniacca pa schodach u mianie vyklikajuć ciažkaści.
Niekatoryja zachaplajucca mnoj i maim imknieńniem da žyćcia. Ale ŭ mianie prosta niama vybaru.
Ab čym ja maru? Prosta žyć, jak zvyčajny čałaviek», — kaža jon u videa.
Na stendapie Alaksandr kazaŭ, što chadzić jamu ciažka, bo jaho źbiła mašyna. U kamientarach pad videa ciapier tłumačyć: «Ciažkaja tema. Tak było skazać lahčej».
SMA (śpinalnaja myšačnaja atrafija) — hienietyčnaje niervova-myšačnaje zachvorvańnie, jakoje paražaje ruchalnyja niejrony śpinnoha mozhu i pryvodzić da narastajučaj myšačnaj słabaści. Zachvorvańnie nosić prahresujučy charaktar, słabaść pačynajecca z myšcaŭ noh i ŭsiaho cieła i z raźvićciom zachvorvańnia dachodzić da myšcaŭ, jakija adkazvajuć za hłytańnie i dychańnie. Pry hetym intelekt chvorych SMA absalutna zachavany.
U zaležnaści ad ciažkaści simptomaŭ vyłučajuć 4 asnoŭnyja typy praksimalnaj SMA: SMA 1, SMA 2, SMA 3. SMA 4. Čym raniej vyjaŭlajucca pieršyja prykmiety chvaroby, čym jarčej vyjaŭlenyja simptomy, tym jany ciažejšyja i tym chutčej prahresuje zachvorvańnie.
Leki ad SMA vielmi darahija, bolš za miljon dalaraŭ.
Čytajcie taksama:
Minzdaroŭja raskazała, kolki dziaciej sa SMA ŭžo atrymali samy darahi ŭ śviecie preparat
U Biełarusi ŭpieršyniu zaćvierdzili pratakoł lačeńnia dziaciej sa SMA
