Znajści
Ałharytmičny łacinski varyjant
Raboty na sajcie
15.09.2023 / 08:28RusŁacBieł

Vučonyja stvaryli nanamateryjał, jaki zabivaje bolš za 99% bakteryj

Novy inavacyjny materyjał na asnovie čornaha fosfaru moža być intehravany ŭ paviazki na rany, impłantanty i miedycynski instrumient, što dapamoža pieraduchilić bakteryjalnyja infiekcyi.

Šarapadobnyja formy — bakteryi, a «list» — čorny fosfar pad mikraskopam (vyjavy byli razmalavanyja pry postapracoŭcy). Fota: Aaron Elbourne i kalehi, Univiersitet RMIT.

Ustojlivaść da antybijotykaŭ źjaŭlajecca surjoznaj hłabalnaj pahrozaj zdaroŭju, vyklikajučy kala 700 tysiač śmierciaŭ štohod. Śpiecyjalisty prahnazujuć, što hetaja ličba moža vyraści da 10 miljonaŭ śmierciaŭ na hod da 2050 hoda biez raspracoŭki novych antybakteryjnych mietadaŭ lačeńnia.

Vučonyja ź Mielburhskaha karaleŭskaha technałahičnaha ŭniviersiteta (RMIT) raspracavali, a ich kalehi z Univiersiteta Paŭdniovaj Aŭstralii (UniSA) praviali dakliničnyja vyprabavańni nanamateryjału na asnovie čornaha fosfaru. Atrymanyja vyniki, apublikavanyja ŭ časopisie Advanced Therapeutics, pakazali, što jon efiektyŭna lečyć infiekcyi, zabivajučy zvyš 99% bakteryj, uklučajučy kišečnuju pałačku i «załacisty stafiłakok», jaki zvyčajna nazyvajuć supierbakteryjaj. Pry hetym nanamateryjał nie nanosić škody inšym kletkam.

Čorny fosfar zjaŭlajecca najbolš stabilnaj formaj fosfaru — rečyva, jakoje ŭ naturalnaj formie prysutničaje ŭ šmatlikich praduktach charčavańnia. Jon lohka raskładajecca pad uździejańniem kisłarodu, što robić hetaje rečyva idealnym srodkam dla źniščeńnia mikrobaŭ.

Jak tłumačać vučonyja, pa miery razbureńnia nanamateryjału z čornaha fosfaru jaho pavierchnia ŭstupaje ŭ reakcyju z atmaśfieraj, utvarajučy tak zvanyja reaktyŭnyja formy kisłarodu. Heta chimičnyja złučeńni, jakija źmiaščajuć kisłarod i majuć vysokuju reakcyjnuju zdolnaść, dapamahajuć źniščać bakteryjalnyja kletki, razryvajučy ich miembrany.

Štodzionnaje miascovaje prymianieńnie nanamateryjału prademanstravała vyniki, paraŭnalnyja ź dziejańniem antybijotykaŭ: zažyŭleńnie ranaŭ na 80% adbyłosia za siem dzion.

Jak adznačajuć aŭtary raspracoŭki, nanamateryjał zabiaśpiečvaje chutkaje antymikrobnaje ŭździejańnie, a paśla źniščeńnia pahrozy samaraskładajecca.

Papiaredniaje daśledavańnie, praviedzienaje RMIT, pakazała efiektyŭnaść čornaha fosfaru ŭ źniščeńni mikrobaŭ pry naniasieńni nanatonkim słojem na pavierchni, jakija vykarystoŭvajucca dla vyrabu bavaŭnianych paviazak na rany i tytanavych impłantataŭ. Čorny fosfar nie nazapašvajecca ŭ arhaniźmie čałavieka i nie patrabuje dadatkovaj utylizacyi.

Vučonyja spadziajucca, što ŭkaranieńnie ich vynachodnictva ŭ kliničnuju praktyku dazvolić paźbiehnuć rostu ŭstojlivaści bakteryj da lekaŭ, bo supierbakteryi nie buduć viedać, što ich paraziła.

Čytajcie jašče:

Čałaviectva staić na miažy najsurjoźniejšaha antybijatyčnaha kryzisu, papiaredžvaje SAAZ

Navukoŭcy vyjavili supierbakteryi, jakim nie škodziać antybijotyki 

Antybijotyk novaha pakaleńnia stvarajuć z małaka kačkanosaŭ, jakoje maje ŭnikalnyja ŭłaścivaści

Antoś Župran

Chočaš padzialicca važnaj infarmacyjaj
ananimna i kanfidencyjna?

Клас
9
Панылы сорам
1
Ха-ха
1
Ого
2
Сумна
1
Абуральна
2
Kab pakinuć kamientar, kali łaska, aktyvujcie JavaScript u naładach svajho braŭziera
Kab skarystacca kalendarom, kali łaska, aktyvujcie JavaScript u naładach svajho braŭziera
sakavikkrasavikmaj
PNSRČCPTSBND
1234567
891011121314
15161718192021
22232425262728
2930