Kroksy ad «Marka», martensy ad «Pramienia». Šukajem stylny abutak biełaruskich vytvorcaŭ
My znajšli modnyja pary, jakimi varta dapoŭnić vosieńskija łuki.
Jak i bolšaść pradpryjemstvaŭ biełaruskaj lohkaj pramysłovaści, vytvorcy abutku nie śpiašajucca hnacca za trendami. Šmatlikija madeli raspracavanyja dziesiacihodździ tamu, a jakaść pašyvu pakidaje žadać lepšaha. Ale z socień nieaktualnych par, vyrablenych na ajčynnych pradpryjemstvach, my znajšli niekalki pa-sapraŭdnamu modnych varyjantaŭ.
Belwest: uniseks i kiedy
Rečy «ŭniseks», jakija pasujuć dla abodvuch pałoŭ, tryvała ŭvajšli ŭ modu ŭ pačatku 1960-ch. U toj čas pačali pierahladacca stereatypnyja hiendarnyja roli, u tym liku pieraasensoŭvałasia i stanovišča žančyny ŭ hramadstvie. U znak padtrymki novaj płyni dziaŭčaty mianiali sukienki na mužčynskija štany, a abcasy — na zručnyja boty. Z časam da trendu dałučylisia mužčyny: tak u sučasny mužčynski harderob uvajšli lohkija tkaniny, dalikatnyja kolery i karunki. Apošnija dla adnaho sa svaich vobrazaŭ abraŭ navat muzyka Lavon Volski.
U Belwest taksama jość niekalki hiendarna-niejtralnych madelaŭ. Naprykład, čaraviki ŭ styli military. Kaštujuć takija pary kala 130 dalaraŭ, a znajści ich možna ŭ žanočym adździele.
Fota: sajt brenda Belwest
Amatarkam stylu Old Money možna pryhledziecca da biełych kłasičnych kiedaŭ. Madel doŭha budzie zastavacca aktualnaj i vydatna ŭpišacca ŭ bazavy harderob.
Fota: sajt brenda Belwest
Brend nie abyšoŭ uvahaj mužčyn: im prapanujuć spartyŭnyja čaraviki z nastrojem «Alimpijady-80». Takija vyrablajucca ŭ dvuch kolerach — čornym i bałotna-zialonym. Nasić paru možna jak sa spartovymi łukami, tak i dapaŭniać imi kłasičnyja kamplekty.
Kroksy ad Marko
Viciebski brend uraziŭ najaŭnaściu humavych tapak madeli «Kroks». Para ad Marko mała čym adroźnivajecca ad aryhinała: krychu źmienienyja pamiery dzirak i sam łahatyp. Zrešty, roźnica bačnaja tolki ŭ canie: aryhinał kaštuje kala 50 dalaraŭ, biełaruskaja kopija — 7.
Źleva — Crocs, sprava — «Marka». Fota: sajty brendaŭ
U vosieńskaj kalekcyi možna vyłučyć žanočyja batyljony na ŭstojlivym abcasie. Takija buduć dobra hladziecca ŭ spałučeńni ź lohkimi i karunkavymi sukienkami i palito-aviersajz. Abydziecca para ŭ 93 dalary.
fota: sajt brenda
U mužčynskaj siekcyi našu ŭvahu pryciahnuli čaraviki z nubuku. Jany nie majuć jarkaha dyzajnu, zatoje mohuć stać niadrennaj kłasičnaj bazaj na vosień. Darečy, kaštujuć takija tańniej za žanočyja — usiaho 73 dalary ZŠA.
Lidski abutak: pary dla kreatyŭnych
Prahułka pa kramie «Lidski abutak» padobnaja da ekskursii ŭ minułaje: stolki sastarełych madelaŭ možna znajści chiba što ŭ kaściumiernaj «Biełaruśfilma». Naprykład, hetyja vydatnyja tufli za 11 dalaraŭ nahadvajuć paślavajennyja madeli — z hrubaj bavoŭny i sa słabym supinataram.
Fota: sajt «Lidskaha abutku»
Dyzajniery pradpryjemstva pasprabavali ažyvić i madel pačatku 60-ch, rasfarbavaŭšy jaje ŭ źmiainy prynt. Kaštujuć kreatyŭnyja tufli 22 dalary, a znajści ich možna ŭ mužčynskim adździele.
Fota: sajt «Lidskaha abutku»
«Lidski abutak» znakamity svaimi kiedami. Takija madeli źjaŭlajucca nieśmiarotnaj kłasikaj, tamu na ich nie škada vydatkavać hrošy. Varta adznačyć rasfarboŭku kiedaŭ: jany vyrablajucca ŭ trendavych kolerach i ni ŭ čym nie sastupajuć zachodnim anałaham. Kaštuje spartovaja para ŭsiaho 21 dalar.
«Pramień», ci Dr. Martens pa-biełarusku
Minskaja marka paradavała raznastajnaściu stylnaha abutku. U žanočym adździele my zaŭvažyli cikavyja tufli na nizkim chodzie. Eklektyčny abutak spałučaje brutalnaść i elemienty «bebi-doł», a forma ich naska — trend nastupnaha siezona.
Fota: sajt «Pramienia»
Druhaja para — zamšavyja łofiery, jany vydatna padyduć na suchuju vosień: ich možna spałučać jak z džynsami i štanami, tak i z sukienkami.
Fota: sajt «Pramienia»
Anałah znakamitych čaravikaŭ Dr. Martens taksama źjaviŭsia ŭ «Pramienia». Madeli vykananyja sa skury i zamšy i majuć šyrokuju kalarovuju palitru. Na žal, na sajcie kampanii nie paznačany ceny, ale, miarkujem, jany buduć nie vyšejšyja za canu aryhinała.
Čytajcie taksama:
Alaksandr Hleb sabraŭ u škołu dačku-pieršakłaśnicu. Ci chapiła rekamiendavanaj čynoŭnikami sumy?
