U Biełarusi ŭžo niekalki hadoŭ ažyjataž na bankaŭskija jačejki. U čym pryčyna?
Znajści volnuju jačejku dla zachoŭvańnia kaštoŭnaściaŭ u Biełarusi składana ŭžo niekalki hadoŭ. Vakantnyja siejfy moža prapanavać mienš za tracinu bankaŭ. Office Life vyśvietliŭ, z čym źviazany taki ažyjataž, jak źmianilisia ceny na hetuju pasłuhu i čamu banki nie pavialičvajuć kolkaść schoviščaŭ u adkaz na źmianieńnie popytu.
Popyt na depazitarnyja pasłuhi, a mienavita na bankaŭskija jačejki, u Biełarusi pačaŭ raści niekalki hadoŭ tamu. Užo ŭ 2020—2021 hadach znajści svabodny siejf, prynamsi, u Minsku stała prablemaj.
Z taho času situacyja mała źmianiłasia. Vakantnyja jačejki tearetyčna znajści možna, ale daloka nie ŭsiudy jany buduć patrebnaha pamieru i navat u patrebnym horadzie, nie kažučy ŭžo pra raźmiaščeńnie pablizu. Dy i ceny na takuju pasłuhu za apošnija paru hadoŭ vyraśli ŭ siarednim na 25—30%.
Poŭnaja kanfidencyjnaść, ale biez harantyj
Arenda bankaŭskaj jačejki zručnaja pa mnohich pryčynach. Tam možna adnosna biaśpiečna zachoŭvać lubyja kaštoŭnaści: najaŭnyja hrošy, kaštoŭnyja mietały, juvielirnyja ŭpryhažeńni, važnyja dakumienty (naprykład, akcyi i ablihacyi).
Čamu adnosna? Tamu što bank nie niasie adkaznaści za toje, što ŭ jačejcy. Što ŭ joj zachoŭvajecca — nichto, akramia ŭładalnika, nie viedaje, bo nijaki vopis nie składajecca. Adpaviedna, klijent ničym nie moža paćvierdzić svaje straty ŭ vypadku fors-mažoru (da prykładu, pry stychijnym biedstvie abo rabavańni).
Na hety vypadak, darečy, u bankaŭ jość pasłuha daviernaha zachoŭvańnia, kali pradmiety i kaštoŭnaści pieradajucca klijentam pavodle vopisu i aceńvajucca.
Ale navat z ulikam zhadanaj ryzyki zachoŭvać kaštoŭnaści ŭ banku ŭsio ž taki bolš biaśpiečna, čym doma. A zabrać ich možna biez usialakich abmiežavańniaŭ u luby čas.
Praŭda, jość niuansy: hrošy ŭ jačejcy, u adroźnieńnie ad depazitaŭ, nie pracujuć, i, bolš za toje, ich zachoŭvańnie stvaraje dadatkovyja vydatki. Zatoje takaja pasłuha zabiaśpiečvaje maksimalnuju ŭ našych umovach kanfidencyjnaść. Možna dadać, što ŭ Biełarusi hetaja pasłuha dastupnaja jak dla hramadzian krainy, tak i dla nierezidentaŭ.
Rekord pa časie karystańnia jačejkaj — 17 hadoŭ
Praces karystańnia jačejkaj maksimalna prosty. Klijent prychodzić u bank z dakumientam i adnym klučom, jaki jamu vydajecca paśla padpisańnia damovy.
U kožnaj jačejki pa zmoŭčańni dva zamki. Kluč ad druhoha znachodzicca ŭ banku. Paśla taho, jak siejf adčyniajuć, rabotnik banka vychodzić, i klijent moža niešta adtul zabrać abo pakłaści. Pryčym miesca, dzie jon usio heta robić, znachodzicca pa-za polem zroku videakamier, jakija zdymajuć tolki ahulny płan pamiaškańnia.
Važna, što adnačasova ŭ depazitaryi moža znachodzicca tolki adzin klijent. Tamu čas na hetuju apieracyju zvyčajna abmiežavany 15—20 chvilinami, kab nie stvarać čarhi.
Što jašče zručna: niezaležna ad taho, na jaki čas zaklučany dahavor arendy jačejki, jaho možna pradoŭžyć da zakančeńnia terminu na luby pieryjad. Zrazumieła, pry ŭmovie pieradapłaty.
Jak kažuć u bankach, samyja raspaŭsiudžanyja terminy — ad troch miesiacaŭ da hoda. Ale sustrakajucca i značna bolš praciahłyja — 5, 10 hadoŭ i navat bolš. U adnym depazitaryi skazali, što maksimalny termin, na jaki klijent u ich zaklučaŭ dahavor zakrytaha bankaŭskaha zachoŭvańnia, skłaŭ 17 hadoŭ.
Kolki kaštuje arenda jačejki ŭ Biełarusi i susiednich krainach
Zvyčajna cana za arendu jačejki vyznačajecca pasutačna i zaležyć ad praciahłaści dahavora (čym bolšy termin — tym tańniej), a taksama ad pamieru jačejki.
Za apošnija dva hady hetaja pasłuha prykmietna padaražeła: u siarednim prykładna z 0,5—0,7 da 0,7—0,9 rubla za sutki. U niekatorych bankach u zaležnaści ad katehoryi klijentaŭ i pamieru jačejki taryfy navat dasiahajuć 1,4—1,5 rubla.
Mnoha heta ci mała? U siarednim hadavy «abaniemient» u Biełarusi ŭ pieraliku na valutu składaje ad $70—100. Dla paraŭnańnia: u Polščy takaja pasłuha kaštuje 1700—1800 złotych ($400—450), u Litvie — €150—300. U rasijskim Aščadbanku — 19 tysiač rasijskich rubloŭ za hod, ci krychu bolš za $200.
Pry hetym treba ŭličvać, što za miažoj arandavać siejf u banku časta moža tolki rezident, a taksama jość šmat inšych abmiežavańniaŭ. Naprykład, zabaroniena zachoŭvać tam najaŭnyja, što jość nastupstvam jeŭrapiejskaha trendu na baraćbu z admyvańniem hrošaj. Mahčyma, z toj ža pryčyny kolkaść bankaŭ, jakija prapanoŭvajuć takuju pasłuhu, u jeŭrapiejskich krainach taksama skaraciłasia.
Ažyjataž stymulujuć prodaž kaštoŭnych mietałaŭ i rasijanie
Kab razumieć maštab popytu na jačejki, možna pahladzieć na prykład Biełhazprambanka: u jaho bolš za 500 jačejek tolki ŭ Minsku, a ŭ cełym pa Biełarusi — zvyš 1000. Vakantnyja ź ich ciapier nie bolš za 15%, i ŭ asnoŭnym samyja maleńkija. A najbolš zapatrabavanyja siarednija (210 × 320 × 290 mm) i vialikija (590 × 410 × 220 mm).
Pryčyny rostu popytu na arendu jačejek u bankach nazyvajuć roznyja.
Alaksandr Śvincycki, načalnik adździeła roźničnych apieracyj Biełhazprambanka, kaža:
— U cełym za apošni hod popyt na pasłuhu pradstaŭleńnia fizičnym asobam u arendu jačejek dla depazitarnaha zachoŭvańnia kaštoŭnaściaŭ vyras prykładna na 40% i praciahvaje raści, asabliva ŭ Minsku.
My źviazvajem heta pierš za ŭsio z pavieličeńniem prodažu kaštoŭnych mietałaŭ nasielnictvu. Zrazumieła, źlitki zručniej zachoŭvać u banku, čym doma. Termin ich zachoŭvańnia bolš praciahły, što taksama adbivajecca na kolkaści svabodnych jačejek. Da taho ž dla pakupnikoŭ miernych źlitkaŭ i trymalnikaŭ premijalnych kartak banka prapanujecca akcyjnaja cana. Takija prapanovy zvyčajna dobra zapatrabavanyja.
Možna mierkavać, što svaju rolu adyhrała i źnižeńnie stavak pa valutnych depazitach, praz što zachoŭvańnie valuty na rachunkach ciapier stała mienš pryvabnym.
Darečy, u popycie na bankaŭskija jačejki, akazvajecca, jość faktar siezonnaści. Naprykład, u pieryjad letnich adpačynkaŭ jon zaŭsiody ŭzrastaje. Anałahična, źjazdžajučy na praciahły termin pa pracy, ludzi taksama imknucca zaścierahčy svaje kaštoŭnaści — adnieści ich na hety čas u bank.
Čamu prapanavańnie nie paśpiavaje za popytam
Cikava, što banki, niahledziačy na vidavočna ŭzrosłuju kolkaść klijentaŭ, nie śpiašajucca pavialičvać svaje depazitaryi. U bolšaści ź ich takuju pasłuhu akazvajuć maksimum adno-dva CBP u stalicy i pa adnym — u abłasnych centrach. A ŭ mnohich bankaŭ jačejek niama naohuł.
Pryčyny hetaha ŭ bankach nie kamientujuć. Ci zhadvajuć, što da pamiaškańnia depazitaryja pradjaŭlajucca peŭnyja patrabavańni pa abaronienaści i techničnym asnaščeńni, što niaprosta i doraha.
Možna taksama vykazać zdahadku, što z ulikam vydatkaŭ na ŭtrymańnie i absłuhoŭvańnie schoviščaŭ hetaja pasłuha dla bankaŭ mienš vyhadnaja, čym adkryćcio rachunkaŭ, dzie na hrašach klijentaŭ pry spryjalnych ekanamičnych umovach možna zarabić bolš. Tak, ciapier u sistemie praficyt likvidnaści, ale jak doŭha heta praciahniecca, nichto nie viedaje.
