Łukašenka nie pajedzie na inaŭhuracyju Erdahana
Stała viadoma, chto pradstavić Biełaruś na inaŭhuracyi prezidenta Turcyi Redžepa Taipa Erdahana.
Alaksandr Łukašenka i Redžep Taip Erdahan u Ankary ŭ krasaviku 2019 hoda. Fota: trpresidency / Twitter
Staršynia Pałaty pradstaŭnikoŭ Nacyjanalnaha schodu Uładzimir Andrejčanka pradstavić Biełaruś na inaŭhuracyi prezidenta Turcyi Redžepa Taipa Erdahana 3 červienia. Pra heta paviedamiŭ pres-sakratar MZS Biełarusi Anatol Hłaz, piša BIEŁTA.
Pavodle jaho słoŭ, 1 červienia biełaruski bok atrymaŭ zaprašeńnie pryniać udzieł u cyrymonii inaŭhuracyi pieraabranaha prezidenta Turcyi Redžepa Taipa Erdahana.
«Uličvajučy vysoki ŭzrovień palityčnych i handlova-ekanamičnych adnosin z Turcyjaj, a taksama aktyŭnaje mižparłamienckaje ŭzajemadziejańnie bakoŭ, u hetym uračystym mierapryjemstvie prymie ŭdzieł staršynia Pałaty pradstaŭnikoŭ Nacyjanalnaha schodu Respubliki Biełaruś Uładzimir Andrejčanka», — raskazaŭ Anatol Hłaz.
Čamu, «uličvajučy vysoki ŭzrovień palityčnych i handlova-ekanamičnych adnosin z Turcyjaj», na inaŭhuracyju nie pajedzie Łukašenka, nie paviedamlajecca.
Čytajcie taksama:
Kiraŭnik vybarkama Turcyi aficyjna abviaściŭ pieramohu Erdahana ŭ druhim tury prezidenckich vybaraŭ
Orban raskazaŭ, što maliŭsia za pieramohu Erdahana. «Inakš była b trahiedyja»
Łukašenka i Pucin pavinšavali Erdahana ź pieravybrańniem na pasadu prezidenta Turcyi
