Jak padličvajuć bały na centralizavanym ekzamienie i čamu heta schiema vyklikała abureńnie
Respublikanski instytut kantrolu viedaŭ, jaki raspracavaŭ sistemu padliku bałaŭ na centralizavanym ekzamienie, nie raskryvaje hałoŭnaje — formułu kančatkovaha padliku vynikaŭ.
Vypuskniki iduć na centralizavany ekzamien. 14 maja 2023 hoda. Fota: BiełTA
Sistema padliku bałaŭ centralizavanaha ekzamienu składajecca ź niekalkich etapaŭ.
Spačatku vyznačajecca pieršasny bał.
Za kožnaje pravilna ci častkova pravilna vykananaje zadańnie naličvajecca 1 ci 2 pieršasnyja bały (u zaležnaści ad typu zadańnia).
Zatym ich suma pa peŭnaj formule pieravodzicca ŭ testavy bał. Heta i jość vynik centralizavanaha ekzamienu, jaki paznačajecca ŭ siertyfikacie.
Jak naličvajucca pieršasnyja bały
Dla hetaha, akramia błanka adkazaŭ, spatrebicca admysłovaja tablica, raspracavanaja Respublikanskim instytutam kantrolu viedaŭ. U joj vykładzienaja schiema naličeńnia pieršasnych bałaŭ pa ŭsich pradmietach centralizavanaha ekzamienu.
Błank zadańniaŭ centralizavanaha ekzamienu 2023 hoda. Skryn z sajta Respublikanskaha instytuta kantrolu viedaŭ
U błanka z zadańniami častki «A» vybirajecca adzin pravilny adkaz. Pieršasny bał za jaho roŭny 1.
U zadańniach ź niekalkimi pravilnymi varyjantami abituryjent atrymlivaje 1 ci 2 bały (zaležyć ad taho, całkam pravilna jon adkazaŭ ci častkova).
U častcy «V» treba ŭpisać karotki adkaz. Jaho vaha — 2 bały (za častkova pravilny daduć 1).
Schiema naličeńnia pieršasnych bałaŭ. Skryn z sajta Respublikanskaha instytuta kantrolu viedaŭ
Adkaz moža być častkova pravilnym u zadańniach, dzie treba abrać niekalki varyjantaŭ abo paznačyć pravilnyja suadnosiny ŭ farmacie «A1B2V3H4».
Kali abituryjent nie vykonvaje zadańnie abo dapuściŭ u im bolš za adnu pamyłku, to atrymlivaje 0 bałaŭ.
Što takoje maksimalny pieršasny bał
Heta suma pieršasnych bałaŭ, jakuju abituryjent moža atrymać, kali test projdzieny biespamyłkova.
Kolkaść zadańniaŭ pa pradmietach adroźnivajecca, i maksimalny pieršasny bał dla kožnaha pradmieta svoj.
Naprykład, pa biełaruskaj i ruskaj movach — heta 80 bałaŭ, pa fizicy i matematycy — 50, pa chimii, bijałohii, hieahrafii, hramadaznaŭstvie, suśvietnaj historyi i historyi Biełarusi — 60, pa zamiežnych movach — 62.
A jak atrymać 100 bałaŭ?
Suma pieršasnych bałaŭ pa peŭnaj formule paśla pieraličvajecca. Biespamyłkova zdadzieny test musić aceńvacca ŭ 100 bałaŭ.
Naprykład, pa biełaruskaj movie 20 bonusnych bałaŭ abituryjentu dadaduć za składanaść zadańniaŭ. Składanaści majuć 4 uzroŭni.
Dyrektar Instytuta kantrolu viedaŭ Jury Miksiuk tłumačyć raźbiežku ŭ 20 bałaŭ tym, što padlik ažyćciaŭlajecca pavodle peŭnaj mietodyki.
«Pry padliku, naprykład, uličvajecca statystyka vykanańnia navučencami zadańniaŭ — jak padyspytnyja ź imi spravilisia», — kaža jon.
Pa jaho słovach, jašče adna admietnaść u tym, što kampjutarnaja sistema aŭtamatyčna, biez udziełu ludziej vyličvaje vyniki.
Prablema ŭ tym, što formuła pieravodu pieršasnych bałaŭ u testavyja nieviadomaja.
Tamu vypuskniki, jakim za adzin niapravilny adkaz zdymali da 10 bałaŭ, nie razumiejuć, čamu taki vysoki košt pamyłki i sumniavajucca ŭ pravilnaści padliku.
«Naša Niva» — bastyjon biełaruščyny
PADTRYMAĆHladzicie taksama:
Stvaryli kamisiju dla pravierki vynikaŭ centralizavanaha ekzamienu i abiacajuć pamianiać sistemu
U skandał z centralizavanym ekzamienam svaje piać kapiejek ustaviŭ Łukašenka
