«Ja nie viedaju, ci jon žyvy». Cichanoŭskaja zapisała zvarot z nahody treciaj hadaviny zatrymańnia jaje muža Siarhieja
Siońnia spaŭniajecca try hady, jak za kratami znachodzicca Siarhiej Cichanoŭski. Błohiera zatrymali ŭ Hrodnie 29 maja 2020 hoda na pieradvybarčym pikiecie. Z hetaj nahody Śviatłana Cichanoŭskaja zapisała videazvarot, u jakim pryznajecca ŭ lubovi da muža i dziakuje biełarusam za padtrymku.
Cichanoŭskaja kaža, što zaŭsiody nosić z saboj tečku z fatahrafijaj muža. Kali surazmoŭcy pytajuć jaje, jak majecca Siarhiej, jana nie viedaje, što adkazać.
«Ja nie viedaju, ci žyvy jon. Užo try miesiacy pra Siarhieja niama nijakaj infarmacyi», — havoryć jana.
Jašče ŭ lutym prapahandysty puskali čutki ŭ svaich kanałach ab tym, što jon pamior u turmie.
«I, viadoma, bačačy takoje, majo serca prosta raździrałasia ad turboty za jaho i jaho žyćcio», — skazała Cichanoŭskaja.
Cichanoŭskaja kaža, što ciapier u miescach źniavoleńnia z palitviaźniami adbyvajucca žudasnyja rečy.
«Ciapier u turmach z palitviaźniami robiacca sapraŭdnyja žachi. Niadaŭna praz prablemy z sercam pamior Mikałaj Klimovič. Uładzimir Hundar całkam ahłuch u karcary, a Viktoryju Kulšu dušyŭ nahladčyk. Ja čytaju žudasnyja naviny štodnia, i ŭ hety momant dumaju pra Siarhieja», — skazała jana.
Śviatłana Cichanoŭskaja havoryć, što chacieła b viarnucca dadomu, być razam z mužam i dziećmi ŭ svabodnaj Biełarusi.
«Za naša ź im trochhadovaje rasstańnie ja pabyvała ŭ takoj kolkaści krain, jakuju raniej navat nie mahła sabie ŭjavić. Choć papraŭdzie ja maru viarnucca dadomu i žyć ź Siarhiejem i dziećmi ŭ svabodnaj Biełarusi.
Usie hetyja try hady ja trymaju siabie ŭ rukach, kali mianie pytajuć pra samaha rodnaha čałavieka. Bo mała chto z tych, chto pytajecca, sapraŭdy razumieje, što heta takoje. Ale razumiejecie vy, maje šanoŭnyja», — kaža Śviatłana.
Jana kaža, što trymajecca dziakujučy biełarusam.
«Kali Siarhiej patelefanavaŭ mnie z turmy, ja skazała jamu: ja trymajusia dziakujučy biełarusam. Tak było tady, tak jość i ciapier. Tamu siońnia ja jašče raz chaču skazać dziakuj usim vam: tym, chto vieryć i padtrymlivaje Siarhieja; tym, chto vieryć i padtrymlivaje mianie; tym, chto padtrymlivaje samich siabie, svaich blizkich ci navat nieznajomych ludziej, jakija akazalisia ŭ ciažkaj situacyi.
Pahadziciesia, što padtrymka i kłopat zdolnyja sahravać sercy navat u samyja ciažkija momanty. Tamu ja prašu vas bierahčy adno adnaho, čaściej dapamahać i dziakavać adno adnamu i ni ŭ jakim razie nie davać abstavinam pazbavić vas emocyj i pačućciaŭ», — skazała jana.
Pradprymalnik i videabłohier Siarhiej Cichanoŭski mieŭ namier udzielničać u prezidenckich vybarach 2020 hoda. Kali jaho papularnaść stała raści, to ŭ mai 2020 hoda jaho zatrymali, a paźniej asudzili na 18 hadoŭ uzmocnienaha režymu.
U lutym hetaha hoda jamu byŭ vyniesieny novy prysud — u 1,5 hoda pazbaŭleńnia voli pa spravie ab niepadparadkavańni patrabavańniam administracyi kałonii.
