Siaredni zarobak u Estonii vyras da 1741 jeŭra. Heta roŭna ŭ try razy bolš, čym u Biełarusi
U pieršym kvartale 2023 hoda siaredni miesiačny bruta-zarobak u Estonii skłaŭ 1741 jeŭra, što na 13,3% vyšej, čym u hety ž čas u minułym hodzie. Miedyjanny — 1424 jeŭra.
Miedyjanny zarobak u Estonii skłaŭ 1424 jeŭra (kali pałova rabotnikaŭ atrymlivaje bolš za hetu ličbu, a druhaja pałova mienš za hetu ličbu). U pieršym kvartale hetaha hoda realny zarobak skłaŭ 1443 jeŭra, h. zn. na 3,2% mienš, čym letaś, paviedamlaje Postimees. Kali adminusavać padatki, to heta budzie 1395 jeŭra «čystymi».
U razrezie śfier dziejnaści siaredniaja miesiačnaja bruta-zarpłata ŭ pieršym kvartale była najbolš vysokaj u śfierach infarmacyi i suviazi (3160 jeŭra), finansavaj i strachavoj dziejnaści (2952 jeŭra) i ŭ enierhietycy (2435 jeŭra).
«Najmienšaj siaredniaja miesiačnaja bruta-zarpłata była ŭ śfiery pasłuh pa pražyvańni i charčavańni (1124 jeŭra), inšych vidaŭ pasłuh (1142 jeŭra) i apieracyj ź nieruchomaściu (1209 jeŭra)». Bolš za ŭsio siaredni zarobak vyras u śfierach adukacyi (19,8%) i pasłuh pa pražyvańni i charčavańni (17,3%), — raskazaŭ analityk Arha Tarkiajnien.
Darečy ŭčora Biełstat adčytaŭsia ab siarednim zarobku ŭ Biełarusi za krasavik. Kali vieryć hetaj arhanizacyi, to siaredni zarobak za minuły miesiac skłaŭ 1795 rubloŭ 90 kapiejek «brudnymi». Pa siońniašnim kursie jeŭra heta 569 jeŭra. To-bok u 3 razy mieniej, čym u Estonii. Čystymi heta 1543 rubli, abo 489 jeŭra.
Miedyjanny zarobak u Biełarusi nazyvajecca dva razy ŭ hod: u listapadzie i mai. Za listapad minułaha hoda miedyjanny zarobak skłaŭ 1248 rubloŭ. Tady heta było 505 jeŭra (pa siarednim kursie za listapad), a ŭ śniežni, za košt rostu jeŭrapiejskaj valuty, heta było 461 jeŭra. Taksama ŭ try razy mieniej, čym miedyjanny zarobak u Estonii.
