Prezident Italii vykazaŭsia za bolš chutkaje dałučeńnie Ukrainy da ES
Prezident Italii Sierdža Matareła zajaviŭ, što mir pa vynikach vajny abaviazkova pavinien być spraviadlivym dla Ukrainy, a taksama vykazaŭsia za bolš chutkaje dałučeńnie dziaržavy da Jeŭrasajuza. Heta adbyłosia na sustrečy z premjer-ministram Ukrainy Dzianisam Šmyhalem u Kvirynalskim pałacy, piša «Ukrainskaja praŭda».
Dzianis Šmyhal i Sierdža Matareła. Fota z aficyjnaha sajta prezidenta Italii
Na sustrečy abmiarkoŭvali pytańni patencyjnych mirnych pieramoŭ, jadziernaj biaśpieki i paślavajennaha adnaŭleńnia.
«Italija vykazvaje rašučuju padtrymku tamu, kab Ukraina dałučyłasia da ES u samy chutki mahčymy termin, i my vitajem abaviazacielstvy ŭkrainskaj ułady ruchacca pa šlachu reformaŭ», — skazaŭ italjanski prezident.
Matareła adznačyŭ, što Italija nastrojena ŭ poŭnaj miery padtrymlivać Ukrainu va ŭsich śfierach i stolki, kolki heta budzie nieabchodna.
«Abarona niezaležnaści, svabody i terytaryjalnaj cełasnaści Ukrainy — heta fundamientalnaja kaštoŭnaść dla ŭsich krain, jakija vystupajuć za svabodu narodaŭ i svabodu. My ŭsie chočam miru, ale heta pavinien być spraviadlivy mir, z pavahaj da terytaryjalnaj cełasnaści Ukrainy», — padkreśliŭ prezident Italii.
