Protadyjakan minskaha Pietra-Paŭłaŭskaha sabora pajšoŭ vajavać za Rasiju. Vienijamin błahasłaviŭ
Śviatar Andrej Łohvinaŭ z Kastramy, baćka protadyjakana ź minskaha sabora Śviatych Piatra i Paŭła Maksima Łohvinava, u razmovie z adyjoznym duchoŭnikam Śviata-Jelisaviecinskaha manastyra protaijerejem Andrejem Lemiašonkam raskazaŭ, što jahony syn ciapier vajuje va Ukrainie. Videa było apublikavana na kanale manastyra, zaŭvažyła «Chryścijanskaja vizija».
Protadyjakan Maksim Łohvinaŭ
Pa słovach Łohvinava-starejšaha, u kastryčniku 2022 hoda protadyjakan Maksim pryjechaŭ u rodnuju Kastramu, kab zrabić sabie prapisku ŭ domie baćki. Paśla hetaha jon adrazu pajšoŭ u vajenkamat i zapisaŭsia dobraachvotnikam dla ŭdziełu ŭ t. zv. «śpiecyjalnaj vajennaj apieracyi».
Taksama śviatar padzialiŭsia, što na hety krok protadyjakana błasłaviŭ sam mitrapalit Minski i Zasłaŭski Vienijamin. Bolš za toje, kirujučy archirej nakazaŭ protadyjakanu Maksimu vykładać śviatoje pryčaście rasijskim vajskoŭcam i nadzialiŭ jaho vyklučnym pravam prymać spoviedzi, ale paviedamlajučy imiony samomu mitrapalitu ŭ Minsk, kab toj moh pračytać «dazvolnuju malitvu».
U dni Vielikodnaha tydnia i na śviata Vialikadnia protadyjakan Maksim budzie, jak paviedamlajecca, słužyć u Pietra-Paŭłaŭskim sabory — jon pryjechaŭ u Minsk u adpačynak.
48-hadovy protadyjakan Maksim Łohvinaŭ — namieśnik staršyni Sinadalnaha adździeła pa spravach moładzi Biełaruskaj pravasłaŭnaj carkvy. Jon viadomy tym, što ŭznačalvaŭ vajskova-patryjatyčnaje bractva ŭ honar śviatoha Daŭmonta Pskoŭskaha, jakoje dziejničała pry Pietra-Paŭłaŭskim sabory. Vychavancy jaho bractva vyjazdžali na treniroŭki pa stralbie ŭ vajskovuju čaść 3214, jakoj kiravaŭ sumnaviadomy Dźmitryj Paŭličenka. U 2015 hodzie protadyjakan Maksim pravodziŭ źlot pravasłaŭnaj moładzi na Linii Stalina.
Čytajcie taksama:
Protaijerej Lemiašonak pachvaliŭ Łukašenku za padtrymku Rasii ŭ vajnie i nie tolki
Śviatar: Biełaruskuju Pravasłaŭnuju Carkvu pierafarmatavali całkam pad dyktatara
