U Polščy zatrymali jašče adnaho rasijskaha špijona. Jaho hramadzianstva nie raskryvajecca
Słužba vajskovaj kontrraźviedki Polščy zatrymała ŭ Hdańsku zamiežnika, vystaviŭšy jamu abvinavačańni ŭ špijanažy na karyść Rasii. Pra heta ranicaj 27 sakavika paviedamiŭ partał Onet i inšyja polskija ŚMI.
Fota: pixabay
Pa infarmacyi prakuratury horada Hdańska, padazravany pryznaŭsia ŭ pracy na rasijskija śpiecsłužby, a taksama padrabiazna apisaŭ abstaviny svajoj viarboŭki i dalejšaj dziejnaści.
«Śledstva pakazała, što padazravany dziejničaŭ u intaresach rasijskaj raźviedki, atrymlivaŭ i źbiraŭ infarmacyju, u tym liku ab krytyčnaj infrastruktury ŭ Pamorskim i Kujaŭska-Pamorskim vajavodstvach. Padazrony taksama pieradavaŭ rasijskaj vyviedcy źviestki i ab dziejnaści miascovych słužbaŭ i orhanaŭ biaśpieki», — zajaviła pres-sakratar prakuratury Hdańska Hražyna Vaŭryniuk.
Pa jaje słovach, mužčynu schilili da supracoŭnictva z rasijskimi śpiecsłužbami, a svaju dziejnaść na karyść Rasii jon pačaŭ jašče z pačatku 2023 hoda.
U hety momant mužčyna znachodzicca pad vartaj. Kali jaho vina budzie dakazana, to jamu pahražaje da 10 hadoŭ pazbaŭleńnia voli.
Hramadzianstva i asoba padazravanaha pakul aficyjna nie raskryvajucca.
U siaredzinie sakavika ŭ Polščy była znojdziena i likvidavana, pavodle polskaj prakuratury, rasijskaja špijonskaja sietka, jakaja sačyła za łahistyčnymi maršrutami pastavak zachodniaj zbroi Ukrainie i płanavała dyviersii. U jaje skład taksama ŭvachodziła troje hramadzian Biełarusi.
Čytajcie taksama:
Były achoŭnik pasolstva Brytanii ŭ Bierlinie atrymaŭ 13 hadoŭ za špijanaž na karyść Rasii
