Valfovič anansavaŭ źmieny ŭ Kancepcyi nacbiaśpieki
Dziaržaŭny sakratar Rady biaśpieki Alaksandr Valfovič na naradzie ŭ Łukašenki raskazaŭ pra budučyja źmieny ŭ Nacyjanalnaj kancepcyi biaśpieki.
Fota: BiełTA
Padrabiaznaściaŭ mała. Jak piša BiełTA, u novym prajekcie Kancepcyi nacbiaśpieki źjaviłasia, naprykład, hradacyja pahroz —ryzyka, vyklik i niepasredna sama pahroza. Tak, ryzyka aznačanaja jak niebiaśpieka nacyjanalnym intaresam, jakaja zaradžajecca, vyklik — niebiaśpieka, jakaja abjektyŭna farmujecca, pahroza — realnaja niebiaśpieka nacyjanalnym intaresam.
«Skarektavanyja paniaćci krynicy pahrozy i ŭłasna samoj pahrozy nacyjanalnaj biaśpiecy. U pieralik stratehičnych nacyjanalnych intaresaŭ upieršyniu ŭklučanyja novyja pałažeńni ab nieabchodnaści ŭsiamiernaj abarony naroda Biełarusi jak unikalnaj histaryčnaj supolnaści i adzinaj krynicy dziaržaŭnaj ułady», — vykazaŭsia Alaksandr Valfovič.
U liku nacyjanalnych intaresaŭ zamacavanyja nacyjanalnaja samabytnaść, dabrabyt i roskvit, sacyjalnaja adkaznaść hramadzian, hramadskaja zhoda.
Taksama źjaviŭsia novy termin — «elektaralny suvierenitet». Alaksandr Valfovič patłumačyŭ, što heta «prava biez umiašańnia zvonku pravodzić vybary i refierendumy».
Asobnym novym błokam u kancepcyi zamacavanaja bijałahičnaja biaśpieka. Źjaŭleńnie hetaj śfiery tłumačycca ŭ tym liku pandemijaj i jaje ŭpłyvam na palityčnuju sistemu i ekanomiku. BiełTA piša, što ŭličvałasia taksama «vyjaŭleńnie bijałabaratoryj, arhanizavanych pad ehidaj ZŠA, na terytoryi Ukrainy i inšych postsavieckich krain» (lehienda prapahandystaŭ).
Źjavilisia novyja subjekty nacbiaśpieki — Usiebiełaruski narodny schod, status asobnych subjektaŭ nacbiaśpieki nadadzieny orhanam prakuratury i KDK.
Prajekt kancepcyi abiacajuć vynieści na abmierkavańnie, ale heta chutčej farmalnaść, bo jon užo padtrymany Łukašenkam.
