U Minsku admianili aficyjnaje adkryćcio rok-kłuba TNT
Uviečary 1 lutaha ŭ sacyjalnych sietkach minskaha rok-kłub TNT zjaviłasia abjava ab tym, što aficyjnaje adkryćcio, jakoje pavinna było adbycca 3 lutaha a 17:00, mianiaje farmat, na što źviarnuŭ uvahu Citydog.
«Pa niezaležnych ad nas pryčynach, my vymušanyja skarektavać płany na hetyja vychadnyja. My adčyniajem svaje dźviery ŭ piatnicu ŭ 17:00 i budziem pakul pracavać u režymie paba da 23:00 štodnia. Na žal, vystupy hurtoŭ my pieranosim na niavyznačany momant, ale vy ŭsio roŭna zmožacie dobra pabavić čas u lubimych ścienach, paznajomicca z našaj kamandaj, naciešycca napojami i ježaj», — napisana ŭ sacsietkach ustanovy.
Pieršapačatkova adkryćcio miełasia adbycca z udziełam niekalkich muzyčnych kalektyvaŭ, jakija płanavali vystupać z 21:00.
Rok-kłub TNT adkryŭsia ŭ lipieni 2012 hoda na Revalucyjnaj, 9 u Minsku i pazicyjanavaŭ siabie nie tolki jak rok-kłub i kaviarnia, ale jašče i jak muziej rok-kultury, dzie možna było ŭbačyć miedyjatary, adzieńnie rok-zorak, płakaty i vinił, hitary znakamitych muzykaŭ.
Uviesnu 2022 hoda pradstaŭniki ŭstanovy dzialilisia ŭ intervju «Našaj Nivie», što paśla epidemii karanavirusa (tady kłub uvohule začyniŭsia) i z pačatkam vajny va Ukrainie ŭstanova pieražyvaje adzin z samych składanych pieryjadaŭ.
Praz 10 hadoŭ paśla adkryćcia — u lipieni 2022 hoda — rok-bar TNT abviaściŭ pra sychod na vakacyi.
Što adbyłosia?
Mahčyma, sprava ŭ novym zakanadaŭstvie ab praviadzieńni masavych mierapryjemstvaŭ, jakoje mnohija kłuby pastaviła ŭ ciažkaje stanovišča.
Zhodna z Zakonam «Ab masavych mierapryjemstvach u Respublicy Biełaruś», ciapier lubaja viečarynka ad 1000 čałaviek moža być pryraŭnanaja da «schodaŭ, mitynhaŭ, vuličnych šeściaŭ, demanstracyj i pikietavańnia» — adpaviedna, nieabchodna kožny raz atrymlivać dazvoł na jaje praviadzieńnie ŭ miascovym vykanaŭčym i rasparadčym orhanie, za 15 dzion.
Čytajcie taksama:
«Hłabalnaje paciapleńnie idzie dastatkova chutka». Ekśpiertka — pra toje, što adbyvajecca z klimatam i ci hatovaja Biełaruś da hłabalnaha paciapleńnia
Riestoran hruzinskoj kuchni, nieapolitanskaja picca i stiendap-bar. Vot kakije zaviedienija otkryliś (i zakryliś) v Minskie v janvarie
